Ɛsit 8 - LAWA A BOO SONBORE 2011

Kii bǐɛ̃ kɔ Zuifun ganaa

¹ A din pinaa lɛ nɛ, Haman mɛn lɛ á ke boe Zuifun yii ni, màn mɛn din tumaa bɛ́ a wɔ lɛa, kii Zɛrzɛsi lɛ bɛ yii kũ á si, á kɔ a lɔ Ɛsitɛɛrɛ la. Tɔrɔbaa mɛn bɛ́ Ɛsitɛɛrɛ laanka Mardoose bii, Ɛsitɛɛrɛ goã á bɛ boo da kii lɛ nɛ. Kii lɛ tɔ́n lɛ dia Mardoose la, á daa a yɔrɔ-a.

² Kii lɛ goã á wusoo a ná a gòon ganaa ǹ kaaran mɛn si Haman la, á bɛ bɔ a gòon ganaa, á kɔ Mardoose la. Bɛ kio, màn mɛn din tumaa bɛ́ Haman wɔ lɛa, Ɛsitɛɛrɛ Mardoose da bɛn mìi la.

³ Ɛsitɛɛrɛ wusoo doo á boo da kii lɛ yɔrɔ-a. A na á kaa tán kii lɛ giulun, á wuu pɛ, a ná a nyankɔ, mà Agaagi tɔrɔ Haman lɛ bɛ́ giɛ li a da ka koe mɛn nɛ, mà kii lɛ bɛ lɛ goa. Mà Haman sii mɛn yɔrɔ bɔ á die ne Zuifun lɛn gialaa nɛ, mà kii lɛ bɛ lɛ goa.

⁴ Kii lɛ sana bàlà lɛ saa á dia Ɛsitɛɛrɛ la. Ɛsitɛɛrɛ tɔ́n yoo á golee lon kii lɛ yɔrɔ-a.

⁵ A n toa: «Bɛ̀ kii lɛ dùũ ni, bɛ̀ masɛ a sii kaa a foo la, bɛ̀ sii lɛ kii lɛ foo si, bɛ̀ masɛ tá kɔɔ̃nɛ a ganaa, Hamedaata a nɛgiĩ Haman lɛ, Agaagi tɔrɔ lɛa, bɛ goã á sɛ́wɔn mɛnɛn yɔrɔ bɔ, á ǹ kiɛ̃ mà ǹ die ǹ kii lɛ a gána a bǎãn tumaa a Zuifun dɛ lenlen, mà ǹ wusoo ǹ sɛ́wɔ kiɛ̃, ǹ bɛa sɛ́wɔn lɛn boo sàabaa nɛ.

⁶ Koe mɛn bɛ́ die boe masɛ tɔrɔn lɛn ganaa, man boe la ma bɛ yɛ, ma boo la ma si ma ganaa lɔn? Man boe la man tɔrɔn yɛ papaɛ̃, ma boo la ma bɛ si ma ganaa lɔn?»

⁷ Kii Zɛrzɛsi lɛ tɔ́n a lɔ Ɛsitɛɛrɛ laanka Zuifun giĩ Mardoose lɛ lɛ si á pɛ: «Á ke, má Haman gɔn màn tumaa kɔ Ɛsitɛɛrɛ la, a dinmaa ke, ǹ ná a bɔlɔ yu gɔn ganaa lon, a giala, a na á goã giɛ li a Zuifun dɛ.

⁸ Sisia, ka dɔn nə sɛ́wɔ kiɛ̃ ka dinin foo yii li, ka dia Zuifun lɛn la ka kii tɔ nɛ, ǹ kii a gòon ganaa ǹ kaaran lɛ bǎã da la. A giala, bɛ̀ sɛ́wɔ nə́ n kiɛ̃ ka kii tɔ nɛ, kii a gòon ganaa ǹ kaaran kɛ bǎã nə́ n da la, bɛa boo ba boe la a n bɔyaa doɛ̃ doo wa.»

⁹ Ǹ nə́ lɛ dia kii a sɛ́wɔ-kiɛ̃lin la a din bǎã nɛ. *Sivan mui ke lɛ̀ a mui sɔɔbaa ǹ wɔ lɛa, bɛa lɛawaa fuəwensɔɔbaa ǹ wɔ nɛ, ǹ nə́ sɛ́wɔ lɛ kiɛ̃, á kɔnpɛ ka Mardoose a da ǹ boon ne. Ǹ nə́ dia Zuifun lɛn la, ka pàãdɛnan nɛ, ka kiwin sii yɔrɔ-bɔlen ne. Ǹ nə́ dia kii a kiodɛnan kɛn la gána lɛ a bǎãn mìi la, bǎã paabiɛ ka fuəwensɔbaa, a saa Ɛndi gána ganaa a wo Etiopii gána yaa. Bǎã gogoonmaa a sɛ́wɔ na á n kiɛ̃, ka a sɛ́wɔ kiɛ̃ ǹ gɔn nɛ, tɔrɔ gogoonmaa a sɛ́wɔ na á n kiɛ̃ a bɔlɔ nɛ. Zuifun dɔn wɔ naá n kiɛ̃ ǹ bɔlɔ nɛ, ka ǹ sɛ́wɔ kiɛ̃ ǹ gɔn nɛ.

¹⁰ Maǹ nə́ sɛ́wɔ lɛ kiɛ̃ ka kii Zɛrzɛsi tɔ nɛ, ǹ nə́ kii gòon ganaa ǹ kaaran bǎã da la, bɛ kio, ǹ nə́ ǹ kɔ dia dí-a wolen la ǹ nə́ woo ǹ koa. Bɛa dia dí-a wolen lɛn man nə́ dii pàã sùin la. Maǹ nə́ bɛa sùin lɛn tɔrɔ bɔ a tɔ-a.

¹¹ Sɛ́wɔ lɛ gɔ́ɔ̃gɔ́ɔ̃ ǹ boo á ke: «Zuifun mɛnɛn bɛ́ kiwi gogoonmaa nɛ, kii zii kɔ ǹ la, ǹ nə́ n sɔkɔn ǹ yɔ bɔ ǹ nyin taman yii. Bǎã mɛn a sɔraasin hinlaa tɔrɔ mɛn a zia-baalin bɛ́ re yui ǹ gialaa, ǹ nə ǹ dɛ ǹ nə ǹ nya lenlen, nɛnyaanan laanka lɔn nɛ, ǹ nə ǹ mànan kokoo.»

¹² Bɛ nə n zɛnaa wasa zii goon toto gɔ́ɔ̃ nɛ, kii Zɛrzɛsi a gána lɛ a bǎãn tumaa nɛ, *Adaara mui ke lɛ̀ a mui a fulupaabaa ǹ wɔ lɛ-a, bɛa lɛawaa fulusɔɔbaa ǹ wɔ li.

¹³ Sɛ́wɔ lɛ a boo n die goɛ̃ a gòãn la pàã boo lɛa gána lɛ a bǎãn tumaa nɛ, a boo nə n da tɔrɔn tumaa nɛ, màn mɛn bɛ́ toɛ, lɛawaa mɛn nə n pɛ, Zuifun lɛn yɔrɔ goã boe ne bɛ li, ǹ dòo bɔ ǹ zɔ̀ɔn lɛn ganaa.

¹⁴ Kii lɛ bɛ́ á boo da, dia dí-a wolen kɛn dii pàã sùin la, bɛ̀ ǹ wo dia malin koa, bɛn nə́ n nanaa ǹ nə́ woo ka belenbelen, boo lɛ a lɛ nə́ n dia Suuzu kiwi gole lɛ dɔ nɛ.

¹⁵ Mardoose tɔ́n soo kii lɛ li, kii dɔnkɛ tã bonbon pàsadɛnaa ná a ganaa, kii bafolo sanadɛnaa kaaraa ná a mìi-a, dɔnkɛ tã gole yii nɔnɔɔ dɔ ná a ganaa. Suuzu kiwi minin man nə́ goã n nyɛnyɛɛ, n lɛ dii.

¹⁶ A na á goã foo kɔɔ̃nbaa laanka susui lɛa, nyɛnyɛɛ laanka gugurubaa lɛa Zuifun lɛn gɔn.

¹⁷ Kii a boo lɛ laanka a lɛ-dia lɛ goã á dɔ gána lɛ a bǎã mɛn tumaa nɛ, a goã á dɔ kiwi mɛn tumaa nɛ, a na á goã foo kɔɔ̃nbaa laanka nyɛnyɛɛ lɛa Zuifun gɔn, a na á goã zɔ́n gole laanka lɛawaa gole lɛa. Gána lɛ a min gigiã na á goã n dinin biɛ Zuifun lɛa, a giala man nə́ goã nyɛ́ɛ biɛ Zuifun lɛn manɛ.