Ɛsit 7 - LAWA A BOO SONBORE 2011

Maǹ Haman bɔlɔ yui

¹ Kii lɛ laanka Haman woo zɔ́n màn-bii kun ka kii a lɔ Ɛsitɛɛrɛ lɛ nɛ.

² Bɛa pinaa lɛ-n doo, zɔ́n màn bii lɛ a nya kio, kii lɛ wusoo, á nɔ̀n da Ɛsitɛɛrɛ la: «Ma n giɛ wàa li? Bɛ pɛ, ma á die koe n la. N gɔ́ɔ̃ n wàa ganaa? Ta maa gána kɛ a talɛɛ nɛ, a n giala yii.»

³ Kii a lɔ Ɛsitɛɛrɛ lɛ ná a lɛ si á pɛ: «Kii, bɛ̀ masɛ a sii kaa n foo la, bɛ̀ á n dùũ baa, ǹ die ǹ masɛ yii toa koo. Masɛ n giɛ bɛ lɛ li. Ǹ die ǹ masɛ tɔrɔn dɔn yii toa koo. Masɛ gɔ́ɔ̃ n bɛ lɛ ganaa.

⁴ A giala, maǹ nə́ wɔsɛn sã, masɛ laanka ma tɔrɔn lɛn nɛ, ǹ nə́ wɔ dɛ ǹ nə́ wɔ nya lenlen. Bɛ̀ a n ka maǹ nə́ wɔ sã bɛ̀rɛgiĩn laanka bɛ̀rɛlɔn lɛa kɛnɛn, bɛ̀ masɛ tá n lɛ tiɛ̃. A giala, bɛa bɔma yii-n kɛ dɔ kii nɔmaa ganaa wa.»

⁵ Kii lɛ tɔ́n boo da ka Ɛsitɛɛrɛ nɛ, á pɛ nɛ: «Min mɛn bɛ́ á da a foo ne, mà a n die bɛa sii kɛ lɛ tɔrɔ zɛnɛɛ, die ne? Ǹ dɛnaa n maa?»

⁶ Ɛsitɛɛrɛ ná a lɛ si: «Bɔ minin yii-n wole lɛ, zɔ́ɔ lɛ, Haman nɛ, bɛa min kakaarɛ ke.» Yǎa nyɛ́ɛ tɔn Haman kũ, kii lɛ laanka kii a lɔ lɛ yɔrɔ-a.

⁷ Kii lɛ yoo, á n bɔ tán zɔ́n màn bii ǹ bǎã lɛ nɛ, a foo n yoo ne, á woo a piɛ dù gɔrɔ kɛ nɛ. Haman golee á n nyin nyankɔ kii a lɔ Ɛsitɛɛrɛ la, a giala a yii goã a ganaa mà kii lɛ golee asɛ bɔ̀n baa li.

⁸ Kii lɛ bɛ́ á n toa a piɛ dù gɔrɔ lɛ nɛ, á n bɔyaa á daa zɔ́n màn bii ǹ kion, Ɛsitɛɛrɛ goã tán dankan sasa mɛn la, Haman nə́ n gɔn bɔ a din-a á mɛnaa tán bɛ la palapala. Kii lɛ bɛ́ á yɛ, á tɔ́n nə n toa a ganaa: «Ma n giɛ li dɔn n giã kun ka maa lɔ nɛ ka pàã nɛ, ma din dɔ a kion?» Bɛa boo lɛ bɔ kii lɛ lɛ-n lɔn gɔrɔ, ǹ nə́ mɔnaa kɔ Haman yɔrɔ lɛ.

⁹ Harbonaa mɛn nə́ ke kii a sumu dí-nyali goon lɛa, bɛ́ pɛ kii lɛ yɔrɔ-a: «Mardoose kɛ lɛ á boo da á kii lɛ nyin si ni, Haman goã á gɔn mɛn yɔrɔ bɔ bɛ wɔ lɛa, á ke, bɛa gɔn kɛ lɛ din tá Haman a piɛ, a wo lon nə́ dɔ mɛtərə fuəwensooro.» Kii lɛ nə́ n toa maǹ Haman bɔlɔ yu bɛa gɔn lɛ ganaa lon.

¹⁰ Haman goã á gɔn mɛn yɔrɔ bɔ Mardoose wɔ lɛa, ǹ nə́ tɔ́n Haman dinmaa bɔlɔ yu bɛ ganaa lon. Bɛa biikoo li, kii lɛ foo tɔ́n waa.