Ɛsit 5 - LAWA A BOO SONBORE 2011

Ɛsitɛɛrɛ n woe kii li

¹ A lɛawaa sɔɔbaa ǹ wɔ pinaa, sii mɛn nə n zɛnaa, bɛ á ke: Ɛsitɛɛrɛ ná a kii lɔ mɔnaan wɔ, á woo golee kii a sumu gɔ́ɔ̃ nɛ, kii a kion yɔrɔ-a. Bɛ á zɛnɛɛ, bɛ̀ kii lɛ á giã-n tán a kii dankan nɛ, wɔ ǹ kiɛnlɛ kɛ yɔrɔ-a pepere.

² Kii lɛ bɛ́ a ná a lɔ Ɛsitɛɛrɛ lɛ yɛ golee-n sumu lɛ nɛ, Ɛsitɛɛrɛ a sii kaa a foo la. Sana bàlà mɛn bɛ́ kii lɛ gɔn, á tɔ́n bɛ saa á dia Ɛsitɛɛrɛ la. Ɛsitɛɛrɛ nə́ n zɔ̃ á dɔ, á n gɔn da bàlà lɛ giala ganaa.

³ Kii lɛ tɔ́n nɔ̀n da la: «Maa lɔ Ɛsitɛɛrɛ, wàa na a baa? Ma n giɛ wàa li? Ta masɛ a gána kɛa talɛɛ nɛ, n tá yii.»

⁴ Sɛnɛ Ɛsitɛɛrɛ ná a lɛ si: «Má zɔ́n màn-bii zɛnaa n wɔ lɛa, bɛ̀ á n dùũ baa, n die n da bɛa bǎã-n pelo kun ka Haman nɛ.»

⁵ Kii lɛ tɔ́n pɛ: «Ka wo boo da ka Haman nɛ fufuu a lɛ kɔ Ɛsitɛɛrɛ a lɛ-dia lɛ ganaa.» Bɛ kio, kii lɛ woo kun ka Haman nɛ Ɛsitɛɛrɛ a zɔ́n màn bii ǹ bǎã lɛ nɛ.

⁶ Zɔ́n màn-bii lɛ a nya kio, kii lɛ wusoo á pɛ Ɛsitɛɛrɛ nɛ: «N bɛ́ giɛ màn mɛn li, n tá re bɛ yii! N gɔ́ɔ̃ n wàa ganaa? Ta gána lɛ a talɛɛ nɛ, á giala yii!»

⁷ Ɛsitɛɛrɛ ná a lɛ si: «Ma bɛ́ giɛ màn mɛn li...? Ma gɔ́ɔ̃ bɛ́ màn mɛn ganaa...?

⁸ Ma bɛ́ giɛ màn mɛn li, ma gɔ́ɔ̃ bɛ́ màn mɛn ganaa, bɛ̀ maa sii kaa n foo la, bɛ̀ á n din dùũ baa, masɛ bɛ́ re zɔ́n màn-bii mɛn zɛnɛɛ kaa wɔ lɛa, n die n da kun ka Haman nɛ bɛa bǎã-n doo. Biɛ̃, ma á re n lɛ sii.»

⁹ Haman na á goã á soo bɛa pinaa lɛ nɛ, n nyɛnyɛɛ a foo n kɔɔ̃nɛ. Sɛnɛ Haman bɛ́ á Mardoose yɛ tán kii a kiɛnlɛ-a, a ná a ba yui a gɔ̀nɔn nə́ bìn diɛ a nyɛɛn wa, a foo yoo Mardoose li taãn-taãnɛ.

¹⁰ Sɛnɛ Haman kirə́ə a foo la á woo piɛ. Bɛ kio, á minin dia woe giɛ a giaáran li, ka a lɔ Zerɛsi ni.

¹¹ Haman nə́ n din laakalaa bɛn yɔrɔ-a. A gɔn màn sonboren kɛn laanka a nɛgiĩ gigiã kɛ nɛ, á bɛn boo da. Kii lɛ goledɛnaabaa mɛn kɔ la, á saa á da a kiodɛnan laanka a dí-nyali dadaraan mìi la, a lɛ dɔ bɛ dɔ ganaa.

¹² Bɛ kio, Haman wusoo á woo nyɛɛnɛ ka boo ne: «Ka bɛ dɔ nɛ, kii a lɔ Ɛsitɛɛrɛ goã á zɔ́n màn-bii gole mɛn zɛnaa, a na á goã á lɛ dia masɛ dinsɔɔ̃ laanka kii la a bǎã nɛ. A wusoo á pɛ mà masɛ din da biɛ̃ doo, kun ka kii lɛ nɛ.

¹³ Sɛnɛ, masɛ Zuifun giĩ Mardoose kɛ yɛ giã-n tán kii a kiɛnlɛ-a lɔn, bɛa siin kɛn kɔn din ba màn kɔn lɛa masɛ gɔn wa.»

¹⁴ Haman a lɔ Zerɛsi lɛ laanka a giaáran lɛn tumaa pɛ nɛ: «Ǹ die ǹ gɔn yɔrɔ bɔ ǹ da bii-a, a wo lon nə goã mɛtərə fuəwensooro. Biɛ̃ baayɛlɛ, n pɛ kii lɛ nɛ, mà ǹ die ǹ Mardoose bɔlɔ yu bɛa gɔn lɛ ganaa lon. Bɛ kio, n wo zɔ́n màn bii ǹ bǎã lɛ nɛ kun ka kii lɛ nɛ, n foo n kɔɔ̃nɛ.» Sii lɛ kɔɔ̃n kɔ Haman ganaa, á tɔ́n nə ǹ kaa gɔn lɛ a yɔrɔ bɔ ganaa.