Ɛsit 4 - LAWA A BOO SONBORE 2011

Mardoose n giɛ Ɛsitɛɛrɛ a dɔmalɛ li

¹ Sii mɛn yii nə n zɛnaa, Mardoose bɛ́ á bɛ ma, foo-ziziɛ̃ taman yii, á ná a mɔnaan tɔtoɛ̃, á gɛ̀ koa ǹ mɔnaa wɔ, á ton yu a din ganaa. A soo kiwi lɛ bii, á n lɛ dɛ kɔsɛkɔsɛ.

² Bɛ kio, á woo yǎa kii a kiɛnlɛ-a. A giala, bɛ̀ min nə́ gɛ̀ koa ǹ mɔnaa wɔ, ǹ dɛnaa ba boe la a wɔ kii a kion wa.

³ A da yaa, kii a boo lɛ laanka a lɛ-dia lɛ goã á dɔ gána lɛ a bǎã mɛn yii ni, a naa n baa ka gɛ̀-koa gole bɛ́ lɔn Zuifun li: lɛ-sɔɔ nɛ, yii mu ni, panparan bɔ nɛ. Gɛ̀-koa ǹ mɔnaa laanka ton na á goã gigiã a piì lɛa.

⁴ Kii a lɔ Ɛsitɛɛrɛ lɛ a nɛlɔ dí-nyalin lɛn laanka kii a sumu dí-nyalin nə́ daa a boo da Ɛsitɛɛrɛ nɛ. Nyɛ́ɛ Ɛsitɛɛrɛ kũ parsiini. Bɛ kio, á minin dia woe mɔnaan koe Mardoose la, mà a ǹ wɔ, a gɛ̀-koa ǹ mɔnaa lɛ bɔ. Sɛnɛ Mardoose lɛ kɔ wa.

⁵ Ɛsitɛɛrɛ tɔ́n lɛ dia Hataaki la. Bɛ n kii a sumu dí-nyali goon lɛa, á kɔ Ɛsitɛɛrɛ la mà a tá re diɛ dí ganaa, mà a wo nɔ̀n da Mardoose la, mà wàa na a ganaa? Mà wàa na á baa, á kɛ miã zɛnaa?

⁶ Hataaki lɛ woo Mardoose li, kiwi lɛ a bǎã kɛ nɛ kii a kiɛnlɛ yɔrɔ-a.

⁷ Sii mɛn yii tumaa Mardoose yɛ, Mardoose tɔ́n bɔ ka bɛ yii ni, á pɛ Hataaki ni. Haman bɛ́ á goã mà asɛ tá wɔrɔ lɛ mɛn kiɛ gána lɛ gɔn màn li, ń giɛ ǹ tá Zuifun lɛn dii lenlen ǹ nə ǹ nya, Mardoose bɛ dɔ boo da nɛ.

⁸ Ǹ goã ǹ nə́ pàã sɛ́wɔ mɛn dɔ a boo a lɛ dia Suuzu kiwi, Zuifun lɛn dɛ a nya ǹ wɔ lɛa, Mardoose bɛ lɛ a goon dɔ kɔ Hataaki la, màn mɛn bɛ́ toɛ a nyaa Ɛsitɛɛrɛ nɛ, a na a boo da nɛ, a pɛ nɛ mà a wo kii lɛ li, a gòã-kũ da a ganaa, a na a nyankɔ a tɔrɔn lɛa.

⁹ Hataaki daa Mardoose a boon lɛn pɛ Ɛsitɛɛrɛ nɛ.

¹⁰ Ɛsitɛɛrɛ tɔ́n wusoo á Hataaki dia woe pii Mardoose-n kɛnɛn:

¹¹ Kii a kiodɛnan tumaa laanka gána lɛ a minin tá doɛ̃, mà bɛ̀ min woo min woo kii lɛ li a sumu kɛ gɔ́ɔ̃ nɛ, lɛ-dia ná a dɔ ǹ dɛnaa ganaa wa, giĩ hinlaa lɔ n ka ǹ dɛnaa nɛ, dɔlɔ kɔsɔ banban bɛ wɔ lɛa, gɛ̀ kio wa. Yǎa tan, bɛ̀ kii lɛ ná a sana bàlà kɛ dia ǹ dɛnaa la, ǹ dɛnaa yii tɔn boo la a goã koo. Ma á ke, ma lɛawaa pɔsɔɔ n ke, ǹ tɔn ma bíi, má woo kii lɛ li wa.

¹² Ǹ nə́ Ɛsitɛɛrɛ a boon lɛn pɛ Mardoose ne.

¹³ Mardoose tɔ́n boo da á Ɛsitɛɛrɛ lɛ si-n kɛnɛn: «N baran taasɛ, mà n bɛ́ kii a piɛ, mà bɛ n die toɛ n dinsɔɔ̃ nə n bɔ sii lɛ nɛ Zuifun lɛn tumaa bii wa.

¹⁴ A giala, sii kɛ lɛ gɔ́ɔ̃ nɛ, bɛ̀ n dɔ nə́ n lɛ tã ń giã tán, Zuifun tá re dɔmalɛ yii a bɔ paǹ kɔsɔ li ka lɔlɔ a da ǹ kirisibaa. Sɛnɛ, n din laanka n kion minin tá re bɔ̀n biɛ. Die n doɛ̃? Kɔntan, sii kɛ lɛ miã tɔrɔ taman yii ni, ń kii a lɔ baa.»

¹⁵ Ɛsitɛɛrɛ dɔ boo da á Mardoose lɛ si-n kɛnɛn:

¹⁶ «Zuifun mɛnɛn tumaa bɛ́ Suuzu kiwi, wo ǹ tumaa sɔkɔn, ǹ nə n lɛ sɔɔ masɛ a lɛa. Ǹ lɛawaa sɔɔ zɛnaa, ǹ nə́ ǹ ba màn bii wa, ǹ nə́ ǹ ba màn mii wa, penleen laanka tèlò ne. Masɛ dɔ á die bɛ miã lɛ-sɔɔ lɛ we kun ka maa nɛlɔ dí-nyalin ni. Bɛ kio, a laanɛ pàã lɛ kɔ-a wa, masɛ n die woe kii lɛ li, ta man die goɛ̃ a nɛ, man goɛ̃ a nɛ.»

¹⁷ Mardoose woo, Ɛsitɛɛrɛ goã á pɛ nɛ mà a sii mɛn tumaa zɛnaa, á bɛ zɛnaa.