Ɛsit 1 - LAWA A BOO SONBORE 2011

¹ Kii Zɛrzɛsi bɛ́ á goã pàã la ǹ mɛn waáraa, a na á goã gána paabiɛ ka fuəwensɔbaa (127) mìi la. A n kuĩ Ɛndi gána ganaa a wo yǎa Etiopii gána nɛ.

^2-3 Zɛrzɛsi a kiibaa lɛ a lɛ̀ sɔɔbaa ǹ wɔ, a bɛ́ giã nɛ a kiibaa ǹ kion, Suuzu kiwi gole kɛ nɛ, á zɔ́n màn-bii gole zɛnaa a kiodɛnan tumaa laanka a dí-nyalin wɔ lɛa. Pɛrsi gána a sɔraasin ni, Mɛdi gána wɔn nɛ, ka min dadaran laanka gánadɛnan nɛ.

⁴ Kii Zɛrzɛsi lɛ ná a gána lɛ a pàãmabaa gole kɛ nyaa, ka a din a min zíndɛnaabaa gole sonbore kɛ nɛ, bɛ biikoo saa á woo dɔ mui sɔrɔ.

⁵ Bɛa kiɛ̃ kio, min mɛn tumaa goã Suuzu kiwi gole kɛ nɛ, a saa pàãma gole ganaa a wo doobaa tiɛɛ̃n yaa, kii lɛ zɔ́n màn-bii zɛnaa lɛawaa sɔbaa ǹ tumaa wɔ lɛa, dù gɔrɔ kɛ gɔ́ɔ̃ nɛ kii a sumu-n.

⁶ Maǹ nə́ goã ǹ nə́ mɔnaa gɔn fufu laanka a lɔɔdɛnan yii kɔlɔ tɛ-pele bìbìn ganaa lon. Maǹ nə́ ǹ yii ka biɛ nàn tiɛ̃tiɛ̃nɛn laanka a fũfuĩnin ni. Bɛa biɛ nànan lɛn man wowoe ne wɔrɔ kaaranan nɛ. Sana dankan sɔsɔrɔn laanka wɔrɔ dankan sɔsɔrɔn nə́ goã tán banbaran la. Maǹ nə́ bɛa banbaran lɛ zɛnaa ka kɔlɔ kusi ni, a fu ni, a yii lɔlɔkɔn-a nɛ, a tì ni.

⁷ Maǹ nə́ goã duvɛ̃ gii kiɛ sana mànan nɛ. Bɛa sana mànan lɛn kɔn nə bɔ ǹ miã li wa. Kii lɛ a bǐɛ̃baa barka nɛ, duvɛ̃ lɛ na á goã mɔnaa-n taãn-taãnɛ.

⁸ Sɛnɛ ǹ goã duvɛ̃ lɛ a mi biɛ pàã lɛa min kɔn ganaa wa. A giala kii lɛ na á goã á pɛ a kion dí-nyalin tumaa nɛ, mà ǹ didie kũ a dùũ li.

⁹ Ǹ kɔn pinaa, kii a lɔ Vastii dɔ́ zɔ́n màn-bii gole zɛnaa lɔn wɔ lɛa, lɔn mɛnɛn bɛ́ kii a kion.

¹⁰ A lɛawaa sɔbaabaa ǹ wɔ pinaa, kii lɛ bɛ́ á duvɛ̃ mi, a foo goã kɔɔ̃nɛ. A tɔ́n lɛ dia a kiodɛnaa sɔbaa kɛ la dí nyɛɛ a giulun: Mehuman nɛ, Bizitaa nɛ, Arbonaa nɛ, Bigitaa nɛ, Abagataa nɛ, ka Zetaara laanka Karkaasi ni, á pɛ ǹ nɛ:

¹¹ Mà ǹ na asɛ a lɔ Vastii kũ ǹ da nɛ asɛ yɔrɔ-a, ka kii bafolo ne a mìi-a, ǹ na a siĩnbaa kɛ nyaa zaman laanka asɛ kiodɛnan manɛ. A giala, Vastii lɛ goã siĩni a tɔ-a sonbore.

¹² Sɛnɛ, kii a kiodɛnan lɛn bɛ́ ǹ nə́ kii a boo lɛ pɛ a lɔ Vastii lɛ nɛ, á n piã mà asɛ a woe wa. Kii lɛ foo tɔ́n yoo taãn-taãnɛ.

¹³ Kii lɛ dia a wɔa sii yɔrɔ-bɔlen la, mɛnɛn lɛn dinin bɛ́ kii a sii yɔrɔ boe. A giala, sii tumaa doamaa nɛ a n yɔrɔ bɔ kii li, a din laanka landa sii yɔrɔ-bɔlen ne ka dí-pɛ boo-dɔ̃len ne.

¹⁴ Karsenaa nɛ, Setaara nɛ, Admaataa nɛ, Tarsiisi ni, Merɛzi ni, Marsenaa nɛ, ka Memukan nɛ, bɛn man Pɛrsi gána laanka Mɛdi gána a kii kiodɛnan min sɔbaa lɛa. Ǹsɛn lɛn man mɔrɛɛ-n kii lɛ ganaa, nyɛɛnaandɛnan lɛa.

¹⁵ Kii lɛ tɔ́n pɛ bɛn manɛ kɛnɛn: «Ma bɛ́ má maa sumu dí-nyalin dia woe lɛ diɛ maa lɔ Vastii la, á n piã a daa wa, a kɔnpɛ ka sii zɛnaa ǹ landan nɛ, a n kɔnboe wàa sii nə n da a mìi ni?»

¹⁶ Memukan tɔ́n boo saa kii lɛ laanka kii kiodɛnan lɛn yɔrɔ-a á pɛ: – Kii kɛ dinsɔɔ̃ bie kii a lɔ Vastii lɛ nə́ n foo nyɛɛ la wa. Sɛnɛ, a ná a nyɛɛ kii kiodɛnan tumaa la, ka zaman mɛn tumaa bɛ́ kii Zɛrzɛsi a gána bǎãn tumaa nɛ.

¹⁷ A giala, kii a lɔ lɛ sii mɛn zɛnaa, a boo tá re doe lɔn tumaa li, a ǹ nyɛnaa a ǹ kaa ǹ zuũn puusə kɔ ganaa. Maǹ die pii kɛnɛn: «Kii Zɛrzɛsi bɛ́ á goã mà ǹ da ka asɛ a lɔ Vastii ni a yɔrɔ-a, á woo?»

¹⁸ A kũ a din pelo kɛ lɛ ganaa, Pɛrsi gána laanka Mɛdi gána a kii kiodɛnan lɔn mɛnɛn nə kii a lɔ a zɛnaa ǹ sii lɛ boo ma, ǹ tá re yui ǹ kii a kiodɛnan lɛn tumaa lɛn bobo. Man die ǹ zuũn lɛn puusə koe a la yii ni, bɛ lɛ dɔ n die ǹ zuũn lɛn foo yui taãn-taãnɛ.

¹⁹ Bɛ̀ kii lɛ din dùũ ni, a boo da, kii a boo lɛa, bɛa boo lɛ nə n kiɛ̃ Pɛrsi gána laanka Mɛdi gána a sii zɛnaa ǹ landan sɛ́wɔ nɛ, bɔlɔ bɔyaa ná a ba a-n wa. A kɔnpɛ ka bɛa boo lɛ nɛ, Vastii ba die kii yɔrɔ-a doo wa, kii lɛ tá re Vastii a kii a lɔbaa lɛ sii a kɔ lɔ kɔsɔ la, ǹ mɛn nə́ ke soɛ nɛ.

²⁰ Kii lɛ bɛ́ re boo mɛn diɛ, á die doe gána lɛ paǹ tumaa nɛ, bɛa gána gole kɛ lɛ. Bɛa biikoo li, lɔn tumaa tɔn nə ǹ zuũn guguru kɔ, a saa pàãma gole ganaa a wo doobaa tiɛɛ̃n yaa.

²¹ Sii lɛ kɔɔ̃n kɔ kii laanka kii kiodɛnan lɛn ganaa. Kii lɛ dɔ tɔ́n sii lɛ zɛnaa á kɔnpɛ ka Memukan a da ǹ boo ne.

²² Gánadɛnaa bɛ́ bǎã mɛn yii ni, kii lɛ sɛ́wɔn dia walan, á kɔnpɛ ka bǎã gogoonmaa a sɛ́wɔ kiɛ̃ ǹ gɔn nɛ, ka tɔrɔ gogoonmaa a bɔlɔ nɛ, màn mɛn bɛ́ toɛ, giĩ gogoonmaa goã mìilandɛnaa lɛa a din a kion, ta a n bɔlɔ mɛn pii.