Danayeli sɛ́wɔ 9 - LAWA A BOO SONBORE 2011

Danayeli a Lawa nyankɔ

¹ Zɛrzɛsi mɛn bɛ́ Mɛdi tɔrɔ lɛa, ǹ nə́ bɛa nɛgiĩ Dariyusu koa kii lɛa, *Baabilonii gána mìi la.

² A kiibaa lɛ̀ bibinaa li, a kɔnpɛ ka Dɛnaa Lawa a boo kɛ nɛ, á goã á pɛ a boo gii-dali Zeremii ni, masɛ Danayeli ná a giala ma Lawa a Boo Sɛ́wɔ nɛ, mà Zeruzalɛmu kiwi lɛ bɛ́ á yu, mà a gɔ́ɔ̃ kooro n die goɛ̃ tán yǎa lɛ̀ pɔsɔbaa.

³ Ma bɛ yɛ lɔn, má n lɛ sɔɔ, ma boroo wɔ ma ganaa, ma ton kaa ma ganaa ka gɛ̀ na á gã ma la. Má n yɔrɔ dia Dɛnaa Lawa la, má a nyankɔ, má gòã-kũ da a ganaa.

⁴ Má tɔ́n maa Lawa, Dɛnaa Lawa nyankɔ, má n mɛ bɔ maa zaman a sii baraan lɛa má pɛ kɛnɛn: «E, Dɛnaa Lawa, man gòã-kũ diɛ n ganaa! N din nə Lawa gole lɛa, n sii n nyɛ́ɛ diɛ. Min mɛnɛn bɛ́ n narɛ, ǹ nə́ n gɔn waa ǹ boon kɛn sii, n lɛ kɔ mɛn wɔ ka bɛn nɛ, n nə n bɔlɔgoondɛnaa lɛa bɛ gɔ́ɔ̃ nɛ, n tá bǐɛ̃ zɛnɛɛ ǹ nɛ.

⁵ Wɔ́ sii baraa zɛnaa, wɔ́ kɔkɔrɔbaa ǹ sii zɛnaa. Wɔ́ baraabaa zɛnaa, wɔ́ n gòãn dii Lawa ganaa, wɔ́ kanaa wɔ́ n bɔ n dí pɛ ǹ boon laanka n sii yɔrɔ bɔ ǹ boon kɛn kio.

⁶ N dí-nyalin mɛnɛn nə goã n boo gii diɛ, wɔ n too kɔ bɛn lon wa. Ǹ dinin lɛn man nə́ boo da wɔa kiin manɛ, wɔa goledɛnan nɛ, wɔ digolon laanka gána lɛ a zaman tumaa nɛ, ka n din tɔ nɛ.

⁷ Dɛnaa, zɛ̀rɛ ba nsɛ-a wa. Wɔ dinin wɔ n ka sìi ni pelo: Zudaa minin wɔ n ka sìi ni, Zeruzalɛmu minin ni, Izirayeli minin tumaa, ǹ mɛnɛn wɔlɔ bɛ́ kunun, ka ǹ mɛnɛn wɔlɔ bɛ́ sɔsɔɔ. A giala, ǹ goã bɔlɔ tii siin mɛnɛn zɛnɛɛ n nɛ, bɛn lɛn man nə́ toa, ń nə́ ǹ loo, ń nə́ ǹ kaa gána kɔsɔn nɛ.

⁸ Dɛnaa Lawa, wɔ dinin ni, wɔa kiin ni, wɔa goledɛnan laanka wɔ digolon ne, wɔ dinin wɔ n ka sìi ni. A giala, wɔ́ sii baraa zɛnaa n nɛ.

⁹ Sɛnɛ Dɛnaa Lawa, wɔa Lawa, a laanɛ wɔ́ n bɔlɔ tii, n din nə makara boe wɔ ganaa, n tá wɔa sii baraan toɛ wɔ nɛ.

¹⁰ Ka bɛ dɔ nɛ, n boo gii-dalin mɛnɛn bɛ́ n dí nyɛɛ, n nə n dí-pɛn boon mɛnɛn kɔ bɛn la mà ǹ nə ǹ kɔ wɔ la, wɔ n too kɔ n din Lawa, Dɛnaa Lawa lɛ lon, wɔ́ kɔ bɛn lɛ wa.

¹¹ Izirayeli minin tumaa nə́ n dí-pɛ lɛ da ǹ kio. Ǹ nə́ kanaa, ǹ nə n too kɔ n lon wa. Bɛ lɛ nɛ, bɔ̀n da ǹ siin laanka lɛn baraa bíi mɛn boo bɛ́ kiɛ̃-n Lawa a dí-nyali Muizu a dí-pɛn sɛ́wɔ kɛ nɛ, bɛn nə́ daa kaa wɔ la, a giala, wɔ n wɔ́ sii baraa zɛnaa n nɛ Lawa.

¹² N boon mɛnɛn da wɔ dininmaan wɔ paǹ li ka goledɛnan mɛnɛn dɔn bɛ́ ǹ nə́ goã wɔ mìi la, ń bɛn sii zɛnaa ń ná a lɛ pã: n nə́ ń bɔ̀n gole da wɔ ganaa Zeruzalɛmu kiwi, ǹ miã kɔsɔ tɔn nə n zɛnaa bǎã kɔn nɛ kanaa kɛ-n wa.

¹³ Bɛa sii babaraa kɛ lɛ tumaa na á wɔ yɛ ka a bɛ́ kiɛ̃-n Muizu a landa sɛ́wɔ-n lɔn. A giala Dɛnaa Lawa, wɔa Lawa, wɔ gòã-kũ da n ganaa wa. Wɔ wusoo wɔ́ n bɔ wɔa sii baraan kio wa, n sonbore mɛn pɛ, wɔ tɔ wɔ á kɔnpɛ ka bɛ-n wa.

¹⁴ Bɛ lɛ nɛ, Dɛnaa Lawa, ń koa li miɛ̃, ń bɛa sii baraa kɛ lɛ da wɔ mìi ni. A giala, Dɛnaa Lawa, wɔa Lawa, n zɛnaa ǹ sii tumaa n pepere. Wɔ dinin man wɔ n too kɔ n lon wa.

¹⁵ Dɛnaa Lawa wɔa Lawa, n bɛ́ ń nə́ n zaman kɛ waa ka pàã nɛ n nə́ ǹ bɔ Ezipti gána nɛ, n tɔ mɛn yɛ bɛ gɔ́ɔ̃ nɛ, bɛa tɔ lɛ á tɔn nə n ganaa haalɛ pelo. Sɛnɛ, wɔsɛn man wɔ́ sii baraa zɛnaa, wɔ zɛ̀rɛ nɛ.

¹⁶ Dɛnaa, n zɛnaa ǹ sii sonboren lɛn tumaa taman yii, bǐɛ̃ kɔ, n nə n foo-yoo kɛ laanka n foo-busii kɛ yɔrɔ saa n bɔ Zeruzalɛmu la, n din a kiwi ke, n kele sonbore ke! A giala, wɔa sii baraan kɛn taman yii, ka wɔ digolon kɛn sãn nɛ, min mɛnɛn bɛ́ wɔ lɛnpɛnɛ, bɛn man sɔ kiɛ Zeruzalɛmu laanka n zaman kɛ la.

¹⁷ Sisia kəni, wɔa Lawa, bǐɛ̃ kɔ n nə too kɔ maa nyankɔ li, n maa gòã-kũ si. N kion sonbore ke ǹ nə́ yu, wusoo n nə n yɔrɔ bǐɛ̃ da la, n din a lɛa!

¹⁸ E, maa Lawa, n too kɔ doɛ̃! Basaã mɛn wɔ yɛ, wɔ laanka n kiwi kɛ nɛ n din tɔ n la, n yii bũ n ga bɛa basaã lɛ-a. A giala, wɔa zɛnaa ǹ sii pepere a lɛa bie toɛ wɔ ń gòã-kũ kɛ diɛ n ganaa wa. Sɛnɛ, n din a makara-doɛ̃ gole kɛ a lɛa nɛ.

¹⁹ Dɛnaa, n too kɔ! Dɛnaa wɔa sii baraa lɛ toa wɔ nɛ. Dɛnaa, n too kɔ doɛ̃! N din a lɛa maa Lawa, sii zɛnaa, n baran n lɔlɔɔ wa! A giala, n din a kiwi ni, n din a zaman nɛ.»

²⁰ Má goã Lawa nyankɔ la miɛ̃, má ń ma din a sii baraa laanka maa zaman, Izirayeli minin kɛn sii baraan pii n ni, má ń gòã-kũ diɛ maa Lawa, Dɛnaa Lawa ganaa, a din a kele sonbore kɛ a lɛa.

²¹ Ma bɛ́ tɔn na a gialaa Lawa nyankoe, ma goã má lon a dia dí-a wole Gabarayeli mɛn lɛ yɛ bibinaa nɛ, bɛ́ piɛ̃ á daa ma li ka baa nɛ, wasamiɛ̃n a wúlu-bɔ biikoo li.

²² Á tɔ́n sii lɛ yɔrɔ nyaa ma nɛ, á pɛ: «Nsɛ Danayeli, sisia kəni, man má daa n yiri fulu.

²³ Ń bɛ́ ń na a giala kɔ ń gòã-kũ diɛ Lawa ganaa ǹ mɛn waáraa, boo kɔn soo Lawa lɛ-n, man má daa bɛ lɛ pɛ n nɛ, a giala, n sii á kɔɔ̃n Lawa ganaa parsiini. Bɛ lɛ taman yii, n too kɔ bɛa boo lɛ li, n sii-yɛ kɛ lɛ giala ma.

²⁴ Lɛ̀ sɔbaa wɔlɔ pɔsɔbaa nə́ n koa, n zaman laanka n kiwi sonbore kɛ wɔ lɛa. Màn mɛn bɛ́ toɛ, Lawa bɔlɔ tii ǹ siin kɛn nə nya, sii baraa zɛnaa lɛ nə n da, Lawa minin sãn toa ǹ nɛ. Peperebaa mɛn bɛ́ a nyɛɛ wa, bɛ á re die, sii-yɛ laanka Lawa a boo gii mɛn nə n da, bɛn lɛ á re piɛ̃, Lawa a kion sonbore kɛ á re wusii a na a wɔ baa.

²⁵ Bɛ lɛ nɛ, toa n kɛ dɔ̃ n na a giala ma: boo mɛn nə n da, mà ǹ wusoo ǹ da Zeruzalɛmu kiwi lɛ dɔ, a saa bɛa boo lɛ a diɛ ganaa, a da kaa goledɛnaa kɛ a daa lɛ, Lawa pɛ mà asɛ á re diɛ, lɛ̀ sɔbaa wɔlɔ sɔbaa nɛ. Bɛ kio, lɛ̀ sɔbaa wɔlɔ pɔsɔrɔwenpaa, Zeruzalɛmu kiwi kɛ laanka a kungɔn tɔn nə n dɔ. Sɛnɛ, bɛa biikoo lɛ n die goɛ̃ kaka.

²⁶ Lɛ̀ sɔbaa wɔlɔ pɔsɔrɔwenpaa lɛ kio, Lawa min mɛn lɛ bɔ á koa, ǹ tá re bɛ dii, min kɔn ná a sii a da wa. Bɛ kio, goledɛnaa goon tá re die ka a zaman nɛ ǹ kiwi lɛ laanka Lawa a kion lɛ ziziɛ̃. Sɛnɛ, a giala-nyɔmiɛ̃ li, Lawa a foo-yoo á re bɛa goledɛnaa lɛ bii. A wo kaa zia lɛ a nya lɛ, basaã n die goɛ̃ a tan miɛ̃ ká a bɛ́ á n pɛ lɔn.

²⁷ Lɛ̀ sɔbaa giala-nyɔmiɛ̃ lɛ a biikoo li, goledɛnaa lɛ á re die lɛ kɔ kɔn la we min gigiã nɛ. Lɛ̀ sɔɔ ka talɛɛ gɔ́ɔ̃ nɛ, á re minin kurii wúlu-bɔ laanka Lawa gɔ màn nɛ ganaa. Bɛa basaã-kɔle lɛ á re a sii bɔbɔnɛɛn lɛn zɛnɛɛ ka baafuubaa nɛ yǎa basaã woe a din yii a giala-nyɔmiɛ̃ biikoo li, ka a bɛ́ á n pɛ lɔn.»