Danayeli sɛ́wɔ 8 - LAWA A BOO SONBORE 2011

Sii-yɛ paabaa ǹ wɔ: sère gɔ̀lɔ̀ laanka butumu

¹ Bɛltazaara a kiibaa lɛ̀ sɔɔbaa ǹ wɔ, masɛ Danayeli sii kɔsɔ yɛ doo, bibinaa wɔ kɛ lɛ a yɛ kio.

² Narɛɛ lɛ gɔ́ɔ̃ nɛ, ma bɛ́ giɛ, bɛ̀ ma dinmaa á ke Suuzu kiwi gole kɛ nɛ, Elamu gána nɛ. Ma yii na á goã ma din ganaa Ulayi tà kɛ lɛ-a.

³ Má n yii saa má ga, bɛ̀ sère gɔ̀lɔ̀ goon nə́ ke golee-n tà lɛ lɛ-a. A bɛnɛn man nə́ goã sɔsɔrɔ màn paa, goon nə́ sasa á la ǹ miã nɛ. Sɛnɛ ǹ mɛn lɛ bɛ́ sasa, bɛ lɛ din na á bɔ nyɔɔbaa.

⁴ Má sère gɔ̀lɔ̀ lɛ yɛ zia biɛ lɛ̀nyɛɛn ganaa, gɔsɛ a lɛ̀gɔn la nɛ ka gusin a lɛ̀gɔn la nɛ. Tɔɔ kɔn goã boe la á n golee a nyɛɛn wa, la n bǎã ba min kɔn lon wa. A na á goã sii zɛnɛɛ a din dùũ li miɛ̃, màn nə́ miɛ̃ a pàã li woe.

⁵ Ma bɛ́ a gialaa n taasɛ bɛa sii lɛ ganaa, bɛ̀ butumu goon nə́ ke á n toa lɛ̀nyɛɛn li á die. A na á goã n bibiĩ kanaa paǹ tumaa nɛ, sɛnɛ, a gòã dɔ din goã miɛ tán la wa. Bɛn sasa gegere goon na á goã bɛa butumu lɛ baãbii.

⁶ Butumu lɛ daa miɛ̃ yǎa sère gɔ̀lɔ̀ bɛn paa dɛnaa lɛ li, ma goã má ǹ mɛn yɛ golee-n lon tà lɛ lɛ-a. A na á baa si á daa a ganaa ka a pàã tumaa nɛ.

⁷ Má yɛ á woo á dɔ sère gɔ̀lɔ̀ lɛ li, á n tele li ka a foo ne. Á sère gɔ̀lɔ̀ lɛ dɛ á ná a bɛn màn paa lɛ yiɛ, sère gɔ̀lɔ̀ lɛ boo la á golee a nyɛɛn wa. Á dɛ á da tán, á tuturu tán, min kɔn yɛ á sère gɔ̀lɔ̀ lɛ kũ á si la wa.

⁸ Butuu lɛ pàã daa á gole kɔ taãn-taãnɛ. Sɛnɛ, pàã bɛ́ a lon ǹ mɛn waáraa taãn-taãnɛ, bɛn gole lɛ yiɛ. Bɛn sɔsɔrɔ gegere màn sii bɔ a bǎã nɛ, ǹ gogoonmaa yɔrɔ n dia-n kanaa a lɛ̀ gùrù sii kɛ gogoon la.

⁹ Bɛn kɔsɔ bɔ bɛn boɛɛn lɛ ganaa, á daa á gole kɔ taãn-taãnɛ. Á ná a pàã yɔrɔ dia gusin a lɛ̀gɔn la, lɛ̀giala laanka gána siĩn-siĩn kɛ la.

¹⁰ Á yoo lon mànan dɔn dinin gialaa. Á ǹ gigiã nyanaa á ǹ kaa tán, ka leeren dɔn nɛ, á tɔtɔrɔ ǹ la.

¹¹ Á n yɔrɔ da lon mànan lɛn goledɛnaa dɔ din la. Ǹ bɛ́ wúlu mànan mɛnɛn koe bɛ la babaraa, á minin kurəə bɛa kɔ ganaa. Á ná a kion sonbore kɛ ziziɛ̃ ka lenlen.

¹² A baraabaa taman yii, ǹ nə́ lon mànan lɛn wɔ a gɔn, ka babaraa a wúlu mànan kɛn dɔn nɛ. Tɔɔ bɛn lɛ sonbore lɛ zũ tán. A dí mɛn lɛ bɔ, bɛ́ giala yɛ a gɔn.

¹³ Má lon a dia dí-a wole goon lɛ ma boo diɛ. Lon a dia dí-a wole kɔsɔ tɔ́n nɔ̀n da bɛ la á pɛ: «Màn mɛn bɛ́ sii-yɛn kɛn lɛn gɔ́ɔ̃ nɛ, bɛ n die n zɛnɛɛ yǎa biĩ? Babaraa a wúlu ke ǹ nə́ minin kurəə a bɔ ganaa, bɔlɔ-tii sii ke basaã koe, Lawa a bǎã sonbore ke, ka lon mànan kɛn nɛ á tɔtɔrɛ ǹ la, bɛa siin kɛn lɛn man nə ǹ gòã la yǎa biĩ?»

¹⁴ Lon a dia dí-a wole bibinaa lɛ tɔ́n na a lɛ si á pɛ nɛ: «Yǎa wasamiɛ̃n laanka baayɛlɛ duu paa biɛsɔɔ (2 300). Bɛ kio, Lawa a kion lɛ a sii tɔn nə n tele.»

Sii-yɛ paabaa ǹ wɔ lɛ giala bɛ́ ka màn mɛn nɛ

¹⁵ Masɛ Danayeli bɛ́ má bɛa sii kɛ lɛ ma, man má goã n taasɛ nɛ, máa ma a giala ma. Bɛa biikoo li, màn kɔn daa golee ma yɔrɔ-a ka minbuiin nɛ bɛ́ lɔn.

¹⁶ Má tɔ́n min lɛ ma boe Ulayi tà kɛ bii, n lɛ dii pii kɛnɛn: «Gabarayeli, sii-nyaa lɛ giala pɛ kɛ a dɛnaa kɛ nɛ!»

¹⁷ Ma din goã golee-n bǎã mɛn nɛ, Gabarayeli nə́ n zɔ̃ á dɔ walan. A bɛ́ á dɔ ma li, nyɛ́ɛ ma kũ, má bɔ má mɛnaa tán ma lɛ la. Á tɔ́n pɛ ma nɛ: «Minbuiin a nɛ, toa n narɛɛ kɛ lɛ giala ma koe! N sii mɛn lɛ yɛ, a n boo diɛ biikoo giala nyɔmiɛ̃ wɔ paǹ li.»

¹⁸ A bɛ́ boo diɛ ma nɛ, ma yiri nə n si ma la, má bɔ má mɛnaa ma lɛ la tán. Ma goã golee-n bǎã mɛn nɛ, á wusoo á ma kũ á ma da lon walan.

¹⁹ Bɛ kio, á tɔ́n pɛ ma nɛ: «Sii mɛn bɛ́ re n zɛnɛɛ Lawa a foo-yoo kɛ taman yii, masɛ n die bɛ pii n ni. A giala, biikoo nə́ n koa giala-nyɔmiɛ̃ biikoo lɛa.

²⁰ N sère gɔ̀lɔ̀ mɛn yɛ a bɛn nə́ paa, Mɛdin kii laanka Pɛrsin kii kɛ n ka bɛ nɛ.

²¹ Butumu ke Grɛkin kii kɛ n ka bɛ nɛ. Bɛn gole mɛn goã a baãbii, kii lɛ a bibinaa kɛ n ka bɛ nɛ.

²² A bɛn lɛ bɛ́ á yiɛ, màn sii kɔsɔ na á bɔ a bǎã nɛ. Bɛn man kii màn sii lɛa, die yui ǹ kii baa bibinaa kɛ lɛ bǎã nɛ, sɛnɛ, ǹ pàã na a re doe a wɔ li wa.

²³ Ǹ kiibaa lɛ a nya biikoo li, min baraan baraabaa lɛ bɛ́ re piɛ̃ ǹ mɛn waáraa, kii din-koali goon tá re yui, minin bebelee ná a dí lɛa.

²⁴ Màn tá re miɛ̃ a pàã li miɛ a woo, sɛnɛ, bɛ bie re boe a din a boo sii la li wa. Á re basaã dadaran koe. A nya ǹ dí tumaa á re bǐɛ̃ koe a gɔn. Á re pàãdɛnan dii, haalɛ Lawa a minin lɛn dɔn dinin.

²⁵ A yiri lɛ bɛ́ wooro, á re boe la a min gigiã bebele. Bɛa biikoo li, á re n din gole koe. Min mɛnɛn bɛ́ taasɛ mà ǹsɛn man là nyantoro la, á re bɛn gigiã dii. Á re yui kiin Kii kɛ dɔ din gialaa. Sɛnɛ, a pàã lɛ á re ziziɛ̃, bɛ̀ min dɔ din ná a n gɔn da a ganaa wa.

²⁶ N sii mɛn yɛ wasamiɛ̃n laanka baayɛlɛ wɔ paǹ li, ka a bɛ́ á n pɛ lɔn, taãn nɛ. Sɛnɛ, bɛa sii-yɛ kɛ lɛ a boo toa n gɔ́ɔ̃ nɛ, a giala, sii lɛ a zɛnaa wɔlɔ á tɔn sɔsɔɔ bɔrɔ.»

²⁷ Bɛa biikoo li, masɛ Danayeli gù gã ma din-a, má busu kɔ lɛawaa paa. Ma bɛ́ má yoo, má wusoo má woo kii a dí nya. Bɛa sii-yɛ kɛ lɛ masɛ yiri lɔlɔkɔn parsiini. Sɛnɛ, min kɔ́n goã maa yiri lɔlɔkɔn lɛ mìi doɛ̃ wa.