Danayeli sɛ́wɔ 6 - LAWA A BOO SONBORE 2011

¹ Dariyusu mɛn bɛ́ Mɛdi gána min lɛa, bɛ́ tɔ́n giã a bǎã-n kii lɛa, bɛ̀ a lɛ̀ pɔsɔrɔwenpaa nɛ.

Maǹ giɛ Danayeli kũ ǹ gɔn li

² Dariyusu ga a ganaa, mà á siĩni asɛ gánadɛnaa dadara paabiɛ ka fuə koa gána lɛ mìi la, màn mɛn bɛ́ toɛ, minin nə yɛ asɛ a pàã lɛ la, gána lɛ paǹ tumaa nɛ.

³ Á goledɛnaa dadara sɔɔ koa ǹ mìi la, màn mɛn bɛ́ toɛ, gánadɛnaa dadaran lɛn nə ǹ dí yɔrɔ pɛ bɛn manɛ, sii kɔn dɔ baran n zɛnaa kii laadoo ziziɛ̃ ǹ sii lɛa wa. Bɛa min sɔɔ kɛ lɛ a goon nə ka Danayeli ni.

⁴ Sɛnɛ, Danayeli sɛ la min paa kɛ lɛ laanka gánadɛnaa dadaran lɛn manɛ. A giala, yiri goã a lon á la yii ni. Bɛ lɛ nɛ, a n kii lɛ din gɔ́ɔ̃ nɛ, mà asɛ koa gána lɛ tumaa mìi la.

⁵ Goledɛnaa dadaran lɛn laanka gánadɛnaa dadaran lɛn nə́ ga Danayeli zɛ̀rɛ baa ǹ gɔn li gána lɛ a sii yɔrɔ bɔ gɔ́ɔ̃ nɛ. Sɛnɛ, ǹ boo la ǹ nə́ sii kɔn yɛ ǹ ná a zɛ̀rɛ baa-n wa, ǹ sã kɔn yɛ wa, a giala, Danayeli na á goã bɔlɔgoondɛnaa lɛa. Min goã wɔ̀lɔ̀ yii a sii kɔn ganaa, a na a zɛ̀rɛ baa-n wa.

⁶ Bɛa minin lɛn nə́ tɔ́n pɛ kɛnɛn: «Wɔ ba re sii kɔn yii, wɔ Danayeli kɛ lɛ zɛ̀rɛ baa-n wa. Yǎa tá bɛ̀ wɔ sii kɔn yɛ a Lawa a landa kɛ wɔ paǹ li.»

⁷ Bɛa goledɛnaa dadaran laanka gánadɛnaa dadaran lɛn nə́ woo dɔ kii li ka baa nɛ, ǹ nə́ pɛ nɛ kɛnɛn: – Kii Dariyusu, Lawa die a n nyin toa yǎa duduu!

⁸ Gána lɛ a goledɛnaa dadaran nɛ, a wɔrɔ sii-yɔrɔ bɔle ne, a gánadɛnaa dadaran nɛ, yiri kɔmala wolen laanka gánadɛnaa bisinin ni, ǹ tumaa kɔn yɛ, ǹ nə́ landa goon koa ka kii tɔ nɛ, ǹ nə́ kɛ pɛ ǹ nə́ laa: «A saa pelo ganaa a wo dɔ lɛawaa pɔsɔɔ, bɛ̀ min mɛn kii din toa walan, á lawa kɔsɔ hinlaa minbuiin nɛ nyankɔ, ǹ die ǹ bɛa dɛnaa kũ ǹ zũ yàran yala kɛ nɛ.»

⁹ Sisia kəni kii, n din doamaa nɛ n bɛa landa kɛ lɛ koa n nə n gɔn bǎã da a nɛ, min ná a bɔyɛɛ wa, a ná a saa dɔ biɛ wa, a kɔnpɛ ka Mɛdi minin laanka Pɛrsi minin landa nɛ.

¹⁰ A bɛ́ á n pɛ miɛ̃, kii Dariyusu nə́ n gɔn bǎã da bɛa landa sɛ́wɔ lɛ nɛ.

Danayeli kũ a zũ yàran li

¹¹ Danayeli bɛ́ á dɔ̃ mà gɔn bǎã nə́ n da bɛa landa sɛ́wɔ lɛ nɛ, á woo n dɔ a kion, sanabolo ni a fenɛtərən nə́ buĩ ni, dia-n woe Zeruzalɛmu la. A na á goã n musin doɛ tán, bɛ̀ a Lawa nyankɔ, a n loeloe gunyin sɔɔ pinin goon, ka a bɛ́ goɛ̃ bɛ̀ a zɛnaa lɔn babaraa.

¹² Min mɛnɛn lɛn bɛ́ kɔn ka Danayeli ni, bɛn nə́ yiɛ ǹ nə́ daa a piɛ, ǹ nə́ daa yaa Lawa nyankoe, a n gòã-kũ diɛ a ganaa.

¹³ Ǹ nə́ wusoo ǹ nə́ woo dɔ kii li, ǹ nə́ pɛ nɛ landa lɛ wɔ paǹ li: «Kii, táa n din ni nə gɔn bǎã da landa sɛ́wɔ lɛ nɛ, ǹ mɛn lɛ á ke pii kɛnɛn: A saa pelo ganaa, a wo dɔ lɛawaa pɔsɔɔ, bɛ̀ min mɛn kii din toa walan á lawa kɔsɔ hinlaa minbuiin nɛ nyankɔ, ǹ die ǹ bɛa dɛnaa kũ ǹ zũ yàran yala kɛ nɛ. N din bie ń pɛ miɛ̃ wa?» Kii tɔ́n nə ǹ lɛ si á pɛ: «Sii lɛ n miɛ̃, a kɔnpɛ ka Mɛdi minin laanka Pɛrsi minin landa nɛ, sàabaa ná a ba la wa.»

¹⁴ Bɛa minin lɛn nə́ tɔ́n pɛ kii ni kɛnɛn: «Danayeli ke ń bɔ nɛ Zudaa gána nɛ kun ka wo bɛ̀rɛbaa ǹ bǎã n wolen ne, n dinmaa lɛ a màn kɔn lɛa a yii li wa. N goã ń nə́ n gɔn bǎã da landa sɛ́wɔ mɛn dɔ nɛ, bɛ dɔ a sii lɛa a yii li wa. Á ke, a na a Lawa nyankoe gunyin sɔɔ pinin goon.»

¹⁵ Kii din bɛa boon lɛn ma lɔn, a foo ziziɛ̃ parsiini. A na á goã giɛ Danayeli walan, màn mɛn bɛ́ toɛ asɛ si a da. Wasa na á woo mɛ, bɛ̀ á n tɔn nə n doɛ, mà asɛ si a da.

¹⁶ Sɛnɛ, minin lɛn nə́ wusoo ǹ nə́ yiɛ ǹ nə́ woo kii li, ǹ nə́ pɛ nɛ: «Kii, táa n din tá doɛ̃ mà a kɔnpɛ ka Mɛdi minin laanka Pɛrɛsi minin landa nɛ, bɛ̀ kii din pɛ mà sii mɛn ba n zɛnɛɛ wa, bɛ̀ á landa mɛn koa, bɛ ba n bɔyɛɛ wa.»

¹⁷ Kii lɛ tɔ́n zii kɔ mà ǹ Danayeli kũ, ǹ wo zũ yàran yala lɛ nɛ. Sɛnɛ, kii lɛ nə́ n lɛ bũ á pɛ Danayeli ni kɛnɛn: «N bɛ́ dí nyɛɛ n Lawa mɛn lɛ nɛ baraabaraa, bɛ lɛ á re boe a nɛ.»

¹⁸ Bɛ kio, ǹ nə́ daa ka kɔlɔ gangabiɛ nɛ, ǹ nə́ kɔ yala lɛ lɛ. Kii lɛ ná a gòon ganaa ǹ kaaran laanka a kiodɛnaa dadaran wɔ bǎã da kɔlɔ lɛ ganaa, màn mɛn bɛ́ toɛ, sii kɔn baran n bɔyaa Danayeli wɔ paǹ li wa.

¹⁹ Bɛ kio, kii kiɛ̃ á woo piɛ. A màn kɔ́n wɔ a lɛ-n tèlò-n wa, a nyuù naa a yii-a wa, a wo lɔ dɔ-a wa.

Danayeli a kirisibaa yàran-a

²⁰ Lɛ̀ din waa lɔn, kii yoo baayɛlɛ yiisoone, á woo yàran yala lɛ lɛ-a ka baa nɛ.

²¹ A bɛ́ re dirii yala lɛ la, á lɛ dia Danayeli la ka koee a lɛn nə́ kokoree ne á pɛ nɛ: «Danayeli, Lawa yiikoonaa a dí-nyali! N bɛ́ dí nyɛɛ Lawa mɛn lɛ-n baraabaraa, á boo la á n si yàran lɛn la?»

²² Danayeli tɔ́n pɛ kii ni: «Kii, Lawa die a n nyin toa yǎa duduu!

²³ Masɛ a Lawa ná a lon a dia dí-a wole dia, á daa yàran lɛn lɛ tã. Bɛ lɛ nɛ, ǹ boo la ǹ nə́ sii kɔn zɛnaa ma-n wa. A giala, Lawa lɛ zɛ̀rɛ yɛ ma ganaa wa, n din kii dɔ wɔ paǹ li, ma sii kɔn la wa.»

²⁴ Bɛa biikoo li, kii foo kɔɔ̃n kɔ parsiini, á tɔ́n pɛ mà ǹ Danayeli bɔ ǹ bɔ yala lɛ nɛ. Ǹ nə́ Danayeli bɔ ǹ nə́ bɔ yala lɛ nɛ. Ǹ màn lɛ pɔrɛɛ din yɛ a gɔ̀nɔn ganaa wa, a giala, a na á goã á n foo doa Lawa ganaa.

²⁵ Kii tɔ́n pɛ, mà min mɛnɛn lɛn nə goã ǹ nə́ Danayeli biɛ kɔ, mà ǹ bɛn kũ ǹ da ǹ nɛ. Ǹ nə́ ǹ kũ ǹ nə́ daa ǹ zũ yàran yala lɛ nɛ, ǹ lɔn laanka ǹ nɛnyaanan nɛ. Yàran lɛn nə́ ǹ kũ, ǹ nə́ ǹ pɔpɔsɛ kɔn, bɛ̀ ǹ tɔn dɔ tán yala lɛ din gɔ́ɔ̃-n wa.

²⁶ Bɛ kio kəni, kii tɔ́n sɛ́wɔ kiɛ̃ á dia kanaa paǹ tumaa nɛ, tɔrɔ tumaa a minin la, gána tumaa a minin ni, ka bɔlɔ woo bɔlɔ a pɛlen ne, á pɛ kɛnɛn: «Là nyantoro gole die a giã ka li!

²⁷ Man pii ka nɛ, máa maa gána lɛ a bǎã tumaa nɛ, min tumaa doamaa nɛ a nyɛ́ɛ baa Danayeli a Lawa kɛ-n taãn-taãnɛ. A giala, a din lɛ n Lawa yiikoonaa lɛa, a din lɛ na a tan yǎa duduu. A kiibaa kɛ a ziziɛ̃ wa, a goledɛnaabaa kɛ na a tan yǎa duduu.

²⁸ A din nə min boe sii ni, a din nə min kirisibiɛ. Sii nyaa ǹ siin laanka kaãbaa ǹ sii dadaran kɛn, a din nə bɛn zɛnɛɛ lon laanka tán nɛ. Sonbore, a din na á Danayeli si yàran la á da.»

²⁹ Dariyusu laanka Pɛrɛsin kii Siirusu a kiibaa biikoo li, Danayeli goã dí gole lɛ la.