Danayeli sɛ́wɔ 5 - LAWA A BOO SONBORE 2011

Kii a màn-bii gole zɛnaa

¹ Ǹ kɔn pinaa, kii Bɛltazaara màn-bii gole zɛnaa, á kɔ a kiodɛnaa dadaran la. Maǹ min duu goon. Á bɔ á mɛ duvɛ̃ la, á mi bɛa min duu goon lɛ yɔrɔ-a.

² Ǹ di Nebukadenezɔɔrɔ goã á sana laanka wɔrɔ mànan goa Lawa kion Zeruzalɛmu á daa ǹ nɛ. A bɛ́ duvɛ̃ lɛ mii, á minin dia, mà ǹ wo bɛa mànan lɛn goa, ǹ da ǹ nɛ. A na á goã giɛ li a duvɛ̃ kaa bɛn lɛn nɛ, a mi kun ka a kiodɛnaa dadaran lɛn nɛ, a gòã li ǹ lɔn nɛ, ka a lɔ kɔsɔn dɔn nɛ.

³ Ǹ nə́ daa ka sana mànan lɛn nɛ, ǹ nə ǹ mɛnɛn lɛn goa Lawa kion Zeruzalɛmu. Kii laanka a kiodɛnaa dadaran nə́ duvɛ̃ kaa bɛa mànan lɛn nɛ ǹ nə́ mi, kun ka a gòã li ǹ lɔn laanka a lɔ kɔsɔn dɔn nɛ.

⁴ Ǹ bɛ́ ǹ nə́ duvɛ̃ mi ǹ nə́ kã, ǹ dìn mɛnɛn zɛnaa ka sana nɛ, ka wɔrɔ nɛ, ka zan nɛ, ka fɔlɔ nɛ, ka gɔn nɛ, ka kɔlɔ nɛ, ǹ nə́ loe lɔ, ǹ nə́ bɛn tɔ bɔ nɛ.

⁵ A din biikoo lɛ li ka te, minbuiin nɛ gɔn nə́ soo bii-a. A na á goã sɛ́wɔ kiɛ̃ bolon da ǹ bǎã kɛ nyɛɛnɛ, kii a kɛ gɔ̀nɔn fu kɛ ganaa. Kii bɛa gɔn lɛ yɛ sɛ́wɔ kiɛ̃.

⁶ A din bǎã-n gɔrɔ, kii yɔrɔ ziziɛ̃, a yiri nə́ n lɔlɔkɔn. A gù yii gã a din-a, a gɔ̀nɔn nə́ bìn diɛ.

⁷ Á tɔ́n nə n lɛ dɛ kɔsɛkɔsɛ, mà ǹ lɛ dia sii-dɔ̃lin la ǹ daa, ka kɔ́lɔnbaalin ni, doɛ̃-wɔlen laanka wɔ-kũlin ni. *Baabilonii gána a sii-dɔ̃lin lɛn bɛ́ ǹ nə́ daa, kii lɛ pɛ ǹ nɛ kɛnɛn: «Bɛ̀ min mɛn boo la á sɛ́wɔ-kiɛ̃ kɛ lɛ pɛ, a ná a giala dɔ pɛ masɛ nɛ, masɛ á re kii dɔnkɛ we a ganaa, ma sana gii da a bɔlɔ-a nyaǹ lɛa. Goledɛnaa paa mɛn bɛ́ gána lɛ a sii mìi la, bɛa dɛnaa n die goɛ̃ a sɔɔbaa ǹ wɔ lɛa.»

⁸ Kii a sii-dɔ̃lin lɛn tumaa daa ǹ nə́ kaa kion. Sɛnɛ, ǹ kɔn boo la á sɛ́wɔ-kiɛ̃ lɛ pɛ doɛ̃ wa, ǹ kɔn na a giala yɛ á pɛ kii-n wa.

⁹ Bɛ gɔ́ɔ̃ nɛ, kii Bɛltazaara foo biɛ na, á kiɛ̃ a bǎã la, a yɔrɔ yii ziziɛ̃. Sii lɛ ná a kiodɛnaa dadaran lɛn dɔn yiri lɔlɔkɔn.

Sɛ́wɔ-kiɛ̃ lɛ bɛ́ màn mɛn giala pii

¹⁰ Kii lɛ a yɛ ǹ dan bɛ́ kii laanka a kiodɛnaa dadaran da ǹ boon lɛn miɛ, á kiɛ̃ á dɔ ǹ li màn bii ǹ bǎã lɛ nɛ, á n lɛ da ǹ boo lɛ nɛ á pɛ kɛnɛn: «Lawa kii nyin toa yǎa duduu! N nyan toa n nə yiri lɔlɔkɔn, n yɔrɔ ziziɛ̃ kɛnɛn wa.

¹¹ Giĩ goon tá n gána lɛ nɛ, lawa sonboren kɛn yiri tá a lon. N di a kiibaa biikoo li, ǹ nə́ dɔ̃ mà bɛa giĩ lɛ yii á buĩ ni, á sii giala miɛ, sii-doɛ̃ tá a lon ka lawan kɛn wɔ bɛ́ lɔn. Bɛ lɛ na á toa ǹ di Nebukadenezɔɔrɔ koa nyɛɛnaandɛnaa lɛa kɔ́lɔnbaali ni, wɔ-kũlin ni, doɛ̃-wɔlen mii la ka bòon ne.

¹² A giala, ǹ nə́ yɛ mà yiri tá bɛa Danayeli lɛ lon á la yii ni. Màn-doɛ̃ laanka sii giala ma tá a lon, á boe la a narɛɛn giala pɛ, a sii-duriin nyaa, a sii kakan yɔrɔ bɔ. Bɛa Danayeli kɛ lɛ, kii Bɛlsazaarabaa wɔ a ganaa, ka bɛ lɛ bíi a da sisia. Sɛ́wɔ-kiɛ̃ lɛ bɛ́ sii mɛn giala pii, á re bɛ nyɛɛ ka nɛ.»

¹³ A din bǎã-n gɔrɔ, ǹ nə́ Danayeli kũ, ǹ nə́ woo ne kii li. Kii lɛ tɔ́n nɔ̀n da la: «N din lɛ tɔ n Danayeli, kun ka Zudaa gána minin kɛn nɛn nə́ ǹ goa, maa díi kii lɛ bɔ ǹ nɛ Zudaa gána nɛ?

¹⁴ Má ma n wɔ paǹ li, máa lawan kɛn yiri tá n lon, n yii á bui ni, n ta sii giala miɛ, sii-doɛ̃ nə n lon taãn-taãnɛ.

¹⁵ Á ke, ǹ nə́ ke ǹ nə́ daa ka sii-dɔ̃lin laanka wɔ-kũlin ni masɛ li sisia, màn mɛn bɛ́ toɛ, ǹ sɛ́wɔ-kiɛ̃ kɛ pɛ, ǹ na a giala dɔ pɛ ma nɛ. Sɛnɛ, á ke, ǹ boo la wa.

¹⁶ Má ma, mà n tá boe la n sii-duriin giala pɛ, n sii kakan yɔrɔ bɔ. Bɛ lɛ nɛ, bɛ̀ ń boo la ń sɛ́wɔ-kiɛ̃ kɛ pɛ, ń ná a giala dɔ pɛ masɛ nɛ, kii dɔnkɛ á re n we n ganaa, sana nə n da n bɔlɔ-a nyaǹ lɛa. Goledɛnaa paa mɛn bɛ́ gána lɛ a sii mìi la, n tá re bɛn sɔɔbaa ǹ wɔ biɛ.»

¹⁷ Danayeli tɔ́n pɛ kii ni kɛnɛn: «N bɛ́ li n masɛ gɔ ka mànan mɛnɛn nɛ, n din nɔmɔ ǹ ganaa. N bɛ́ li n ma guguru kɔ ka mànan mɛnɛn nɛ, ǹ kɔ min kɔsɔn la. Sɛnɛ, masɛ á re sɛ́wɔ-kiɛ̃ lɛ pii, ma a giala dɔ pɛ n nɛ.

¹⁸ Kii, Lawa mɛn bɛ́ lon sɔsɔɔ, á goã á kiibaa kɔ ǹ di Nebukadenezɔɔrɔ la, golebaa nɛ, ka gugurubaa laanka zín ni.

¹⁹ A golebaa mɛn lɛ kɔ la, bɛ lɛ na á toa, tɔrɔn tumaa laanka gánan tumaa a minin gɔ̀nɔn nə́ goã bìn diɛ a nyɛɛnɛ, ka bɔlɔ tumaa a pɛlen ne. Bɛ̀ a tá li a min mɛn dɛ, a n bɛ dii, bɛ̀ a tá li a min mɛn yii toa koo, a n bɛ yii toɛ koo. Bɛ̀ a tá li a min mɛn saa lon, a n bɛ siɛ lon, bɛ̀ a tá li a min mɛn gisĩ, a n bɛ gisĩ.

²⁰ Sɛnɛ, n di lɛ bɛ́ á piɛ̃ dɔ a din ni, á n too kaka kɔ yǎa á woo kaa din-koa lɛ, ǹ nə́ bɔ ǹ nə́ bɔ a kiibaa la, ǹ ná a gugurubaa kɛ si la.

²¹ Ǹ nə́ loo ǹ nə́ bɔ minbuiinin bii. A taasiɛ nə́ n bɔyaa á n baa ka tɔɔn wɔ bɛ́ lɔn. A na á goã kun ka don dundunun ni, buu soɛ̃ ka dii wɔ bɛ́ lɔn, pele goã piɛ̃ a ganaa. A na á goã bɛ lɛ gɔ́ɔ̃-n miɛ̃, yǎa a bɛ́ á dɔ̃ ǹ mɛn pinaa, mà lon a Lawa n minbuiinin kiibaa mìi la, mà a bɛ́ li a kɔ min mɛn la, mà a n koe bɛa dɛnaa la.

²² Nsɛ Bɛltazaara mɛn dɔ bɛ́ a nɛgiĩ lɛa, a laanɛ n tá bɛa siin kɛn lɛn tumaa doɛ̃, n dɔ din gisĩ ǹ sii zɛnaa wa.

²³ N nə́ n gòãn dii lon a Lawa ganaa: A giala, ń minin dia ǹ nə́ woo Lawa a kion mànan goa ǹ nə́ daa ǹ kɔ n la, n din laanka n kiodɛnaa dadaran nə́ duvɛ̃ kaa ǹ nɛ ka mi, kun ka ka gòã li ǹ lɔn laanka kaa lɔ kɔsɔn nɛ. Ka bɛ dɔ nɛ, dìn mɛnɛn nə́ ke ǹ nə́ ǹ zɛnaa ka wɔrɔ nɛ, ka sana nɛ, ka zan nɛ, ka fɔlɔ nɛ, ka gɔn nɛ, ka kɔlɔ nɛ, ǹ yii ná a wɔlɔ yii wa, ǹ too ná a boo miɛ wa, ǹ nə ǹ ba màn kɔn doɛ̃ wa, ń loe lɔ, ń bɛn tɔ bɔ nɛ. Sɛnɛ, Lawa mɛn lɛ á ke n fɔfoã ná a gɔn, n sii tumaa ná a gɔn, n nə́ n piã n bɛ guguru kɔ wa.

²⁴ Bɛ lɛ na á toa, Lawa gɔn kɛ lɛ dia, á daa sɛ́wɔ kɛ lɛ kiɛ̃.

²⁵ Sɛ́wɔ mɛn nə n kiɛ̃, bɛ n ka kɛ nɛ: "Məne, Məne, Tekɛli, Uparsini".

²⁶ A bɛ́ màn mɛn giala pii, bɛ á ke: Məne, bɛ giala mà "Nimii": Bɛ n nyɛɛ mà Lawa nə́ n kiibaa lɛ a lɛawaan nimi, á dan koa la.

²⁷ Tekɛli, bɛ giala mà "Zɔɔ̃": Bɛ n nyɛɛ mà Lawa nə́ n zɔɔ̃, á woo yaa gugurubaa ba n nɛ doo wa.

²⁸ Uparsini, bɛ giala mà "Gii": Bɛ n nyɛɛ mà Lawa nə́ n kiibaa lɛ gii Mɛdi minin laanka Pɛrsi minin bii.»

²⁹ A din bǎã-n gɔrɔ, Bɛltazaara pɛ mà ǹ kii dɔnkɛ wɔ Danayeli ganaa, ǹ sana da a bɔlɔ-a nyaǹ lɛa. Á pɛ mà ǹ lɛ dia ǹ pɛ minin manɛ, mà goledɛnaa paa mɛn bɛ́ gána lɛ a sii mìi la, mà Danayeli nə ǹ sɔɔbaa ǹ wɔ lɛa.

³⁰ Sɛnɛ, a din tèlò lɛ nɛ, ǹ nə́ Baabilonii gána a kii Bɛltazaara dɛ.