Danayeli sɛ́wɔ 3 - LAWA A BOO SONBORE 2011

Sana màn nyín guguru kɔ

¹ Kii Nebukadenezɔɔrɔ màn nyín zɛnaa ka sana nɛ. A sasabaa n mɛtərə pɔsɔɔ, a pəməbaa n mɛtərə sɔɔ. Á bɛa màn nyín lɛ doa tán Duraa a diə fúlu kɛ nɛ, *Baabilonii gána nɛ.

^2-3 Bɛ kio, Nebukadenezɔɔrɔ minin dia, mà ǹ wo lɛ dia gánadɛnaa dadaran la, wɔrɔ sii yɔrɔ bɔlen ne, gánadɛnaa bisinin ni, yiri kɔ minin la wolen ne, wɔrɔ-tamaalin ni, landa a sii yɔrɔ bɔlen ne, kiri-kurulin ni ka pàã dí-nyalin tumaa nɛ, màn mɛn bɛ́ toɛ, a din nə màn nyín mɛn lɛ doa, ǹ da bɛa zɔ́n ganaa. Ǹ tumaa daa n sɔkɔn bɛa zɔ́n lɛ taman yii, ǹ nə́ golee màn nyín lɛ yɔrɔ-a.

⁴ Bɛa biikoo li, lɛ-diali tɔ́n nə n lɛ dɛ kɔsɛkɔsɛ á pɛ kɛnɛn: – Hee, tɔrɔ woo tɔrɔ, gána woo gána, bɔlɔ woo bɔlɔ a pɛlen, kii mà ma kɛ pɛ ka nɛ:

⁵ «Bɛ̀ ká bɛn wuu ma ǹ mɛn waáraa, pìi ni, tùtun ni, kɔnkoɛ̃ɛn nɛ, ka bɛ̀ dɛ ǹ mànan tɔrɔ tumaa nɛ, kii Nebukadenezɔɔrɔ sana màn nyín mɛn doa tán, ka kaa tán ka bɛ lɛ guguru kɔ.

⁶ Bɛ̀ min woo min nə́ n piã mà a ba kiɛ tán a na a guguru kɔ wa, ǹ die ǹ bɛa dɛnaa kũ a din bǎã nɛ, ǹ zũ nyankɔrɔ tɛ girigiri kɛ bii.»

⁷ Bɛ nə n da lɔn, tɔrɔ tumaa a minin ni, gána tumaa wɔn nɛ, bɔlɔ woo bɔlɔ a pɛlen ne, min mɛn tumaa bɛn lɛ wuu ma, pìi lɛ nɛ, tùtun lɛn nɛ, kɔnkoɛ̃ɛn lɛ nɛ, ka bɛ̀ dɛ ǹ mànan tɔrɔ tumaa nɛ, ǹ tumaa kaa tán ǹ nə́ sana màn nyín lɛ guguru kɔ, kii Nebukadenezɔɔrɔ nə ǹ mɛn lɛ doa tán.

Piã ka màn nyín guguru kɔ nɛ

⁸ Bɛ gɔ́ɔ̃ nɛ, Baabilonii minin kɔnɔn nə́ kiɛ̃ a din bǎã-n gɔrɔ, ǹ nə́ daa Zuifun lɛn biɛ kɔ kii ni.

⁹ Ǹ nə́ boo da ka kii Nebukadenezɔɔrɔ nɛ, ǹ nə́ pɛ nɛ: «Kii, Lawa nə n nyin toa yǎa duduu!

¹⁰ N dinmaa kii nə n pɛ kɛnɛn: Min woo min bɛ́ re bɛn wuú miɛ, pìi ni, tùtun ni, ka bɛ̀ dɛ ǹ mànan tɔrɔ tumaa wuu ni, ǹ dɛnaa kaa tán a sana màn nyín kɛ guguru kɔ.

¹¹ Bɛ̀ min woo min nə́ n piã mà a ba kiɛ tán a na a guguru kɔ wa, wɔ bɛa dɛnaa kũ wɔ zũ nyankɔrɔ tɛ girigiri kɛ bii.

¹² Zuifun kɔnɔn tan, n goa ń nə ǹ kaa Baabilonii gána a dí lɛn la: Sadraki ni, Mesaki ni, ka Abɛdi-Negoo ni. Kii, bɛa minin kɛn lɛn nə nyɛ́ɛ baa n nɛ wa. Ǹ ba dí nyɛɛ n dìn man wa, n sana màn nyín mɛn doa tán, ǹ ba bɛ dɔ guguru koe wa.»

¹³ Bɛ lɛ taman yii, Nebukadenezɔɔrɔ foo yoo, a yɔrɔ yii n tɛmaa boe. Á tɔ́n pɛ mà ǹ Sadraki kũ ǹ da nɛ, ka Mesaki laanka Abɛdi-Negoo ne. Ǹ nə́ bɛa minin lɛn kũ, ǹ nə́ daa ǹ nɛ kii li.

¹⁴ Kii Nebukadenezɔɔrɔ tɔ́n nɔ̀n da ǹ la kɛnɛn: «Sadraki, Mesaki ka Abɛdi-Negoo, ka n ka n piã, mà ka a dí nyɛɛ masɛ a lawan man wa, ma sana màn nyin mɛn doa tán, mà ka a bɛ dɔ guguru koe wa, taãn nɛ sonbore?

¹⁵ Haya! Ka tá re bɛn wuu lɛ miɛ doo, pìi ni, tùtun ni, kɔnkoɛ̃ɛn nɛ, ka bɛ̀ dɛ ǹ mànan tɔrɔ tumaa wuu ni. Bɛ̀ ka bɛa mànan kɛn lɛn wuu ma, ma màn nyín mɛn lɛ zɛnaa, ka á re lɛ koe ka kaa tán ka na a guguru kɔ? Bɛ̀ ka n piã mà ka ba a guguru koe wa-ǹ tá re ka kuĩ a din bǎã-n gɔrɔ, ǹ ka zũ nyankɔrɔ tɛ girigiri kɛ bii. Lawa mɛn nə die boe la a ka si masɛ gɔn?»

¹⁶ Sadraki ni, Mesaki ni, Abɛdi-Negoo ne, ǹ nə́ kii lɛ si ǹ nə́ pɛ nɛ: «Kii Nebukadenezɔɔrɔ, là ba a ganaa, wɔsɛn nə boo kɔn da n nɛ sii kɛ lɛ gɔ́ɔ̃-n wa.

¹⁷ Ta a na á ǹ mɛn baa, wɔsɛn Lawa kɛ lɛ wɔ á dí nyɛɛ nɛ, bɛ lɛ á re wɔsɛn boe nyankɔrɔ tɛ girigiri kɛ lɛ nɛ, a wɔ si n din kii kɛ lɛ la.

¹⁸ Kii, haalɛ ta wɔsɛn Lawa lɛ din nə bɛ zɛnaa wa, wɔsɛn ba re dí nyɛɛ n dìn kɛn man wa, n sana màn nyín mɛn doa tán, wɔsɛn ba re bɛ dɔ guguru koe wa. Toa n bɛ dɔ̃ taãn-taãnɛ.»

¹⁹ Nebukadenezɔɔrɔ bɛ ma lɔn, a foo yoo á la yii ni, a yɔrɔ ziziɛ̃ Sadraki laanka Mesaki li, ka Abɛdi-Negoo ne. Á tɔ́n pɛ ǹ nɛ, mà ǹ màn kaa tɛ lɛ nɛ, a kũ a la babaraa wɔ kɛ nɛ gunyin sɔbaa.

²⁰ Bɛ kio, á pɛ a sɔraasi gegeren kɔnɔn manɛ, mà ǹ Sadraki yii, Mesaki laanka Abɛdi-Negoo ne, ǹ nə ǹ zũ nyankɔrɔ tɛ girigiri lɛ nɛ.

²¹ A din bǎã-n gɔrɔ, ǹ nə́ bɛa minin lɛn yii ka ǹ wɔ ǹ mɔnaan laanka ǹ bafolon ne ǹ ganaa, ǹ nə́ ǹ zũ nyankɔrɔ tɛ girigiri lɛ nɛ.

²² Kii bɛ́ á goã á boo lɛ da á laa, maǹ nə́ goã ǹ nə́ màn kaa tɛ lɛ nɛ, á kũ á la yii ni. Bɛ lɛ nɛ, sɔraasin mɛnɛn nə Sadraki zũ tɛ lɛ nɛ, ka Mesaki laanka Abɛdi-Negoo ne, tɛ lɛ a gusuũ nə́ ǹ dininmaan dɛ.

²³ Min sɔɔ kɛ lɛ sɛ, Sadraki ni, Mesaki ni ka Abɛdi-Negoo ne, bɛn nə́ woo mɛnaa nyankɔrɔ tɛ girigiri lɛ bii, ǹ nə́ yii ni.

Giaára min sɔɔ a kirisibaa

²⁴ Boɛɛnɛ, kii Nebukadenezɔɔrɔ nə́ n doa á yoo tán ka son, a foo tumaa ń biɛ niɛ̃. Á nɔ̀n da a yiri kɔmala wolen la kɛnɛn: «Wɔ bie wɔ́ min sɔɔ zũ tɛ lɛ nɛ n nə́ yii-n wa ya?» Bɛn nə́ kii lɛ si ǹ nə́ pɛ nɛ mà a n miɛ̃!

²⁵ Kii lɛ tɔ́n pɛ kɛnɛn: «Á ke, masɛ yii n giĩ min sii ganaa ǹ nə́ ǹ ba yii-n wa, tɔ we tɛ lɛ bii, ǹ paǹ kɔn ná a busi wa. Ǹ siibaa ǹ wɔ kɛ din nə ka lɔn a dia diə wolen bɛ́ lɔn.»

²⁶ Yankɔrɔ lɛ, tɛ lɛ goã kuĩ a nɛ girigiri, Nebukadenezɔɔrɔ tɔ́n nə n zɔ̃ á dɔ bɛ lɛ-a, á lɛ dia ka koee á pɛ: «Sadraki, Mesaki, Abɛdi-Negoo, lon a Lawa a dí-nyalin, ka soo ka daa!» A din bǎã-n gɔrɔ, ǹ dinin min sɔɔ soo ǹ nə́ n bɔ tɛ lɛ bii.

²⁷ Bɛ kio, kii lɛ a gánadɛnaa dadaran nɛ, a wɔrɔ sii yɔrɔ-bɔlen ne, a gánadɛnaa bisinin laanka a yiri kɔmala wolen ne, bɛn nə́ paã ǹ nə́ ga minin lɛn ganaa. Ǹ nə́ yɛ mà tɛ lɛ màn kɔn zɛnaa ǹ gɔ̀nɔn nɛ wa, a ǹ mìi ka dodolo wa, ǹ mɔnaan manə ǹ dinin yii lɛa, tɛ gìĩ din ba ǹ ganaa wa.

²⁸ Nebukadenezɔɔrɔ tɔ́n pɛ: – Ma á barka diɛ Sadraki laanka Mesaki ka Abɛdi-Negoo a Lawa nɛ. A din na á ná a lon a dia dí-a wole dia, á daa a dí-nyalin kirisibaa. A giala, ǹ nə́ n foo doa n ganaa, ǹ nə́ n piã ka masɛ a boo ne, ǹ nə́ n dinin nyin kɔ, mà ǹsɛn ba re lawa kɔsɔ guguru koe wa, bɛ̀ á n bɔ ǹ dinin Lawa kɛ nɛ.

²⁹ Bɛ lɛ nɛ, masɛ á kɛ pii koɛ tán: «Tɔrɔn tumaa bii, gána woo gána nɛ, bɔlɔ woo bɔlɔ a pɛlen bii, bɛ̀ min mɛn boo baraa da Sadraki laanka Mesaki ka Abɛdi-Negoo a Lawa ganaa, ǹ die ǹ bɛa dɛnaa kakã, ǹ na a kion bɔyaa, ǹ baa kɛbɔlɔ lɛa. A giala, lawa kɔsɔ banban, a boo la a min bɔ sii-n kɛnɛn wa.»

³⁰ Bɛa sii lɛ kio, Sadraki lɛ nɛ, ka Mesaki laanka Abɛdi-Negoo ne kii lɛ nə́ ǹ kaa dí dadara lɛ la Baabilonii gána nɛ.

Nebukadenezɔɔrɔ a narɛɛ paabaa ǹ wɔ

³¹ Bɛ kio, kii Nebukadenezɔɔrɔ boo dia tɔrɔn tumaa a minin la, gánan tumaa nɛ, ta ǹ mɛn nə bɔlɔ woo bɔlɔ a pɛlen lɛa, á n giã-n bǎã mɛn nɛ kanaa kɛ nɛ: «Là nyantoro lɛpiɛ̃ die a yɛ ka lon!

³² Lawa mɛn bɛ lon sɔsɔɔ, a sii nyaa ǹ sii laanka kaãbaa ǹ siin mɛnɛn zɛnaa maa wɔ paǹ li, má ga a ganaa, máa á siĩni, ma a boo da:

³³ A sii nyaa ǹ siin lɛn nə́ dadara kɔ ǹ nə́ la yii ni, a kaãbaa ǹ siin lɛn pàã gole kɔ á la yii ni! Lawa din nə kii lɛa miɛ̃ duduu, a goledɛnaabaa kɛ a nyɛɛ wa.»