Danayeli sɛ́wɔ 12 - LAWA A BOO SONBORE 2011

Biikoo giala-nyɔmiɛ̃

¹ Lon a dia dí-a wole lɛ wusoo á pɛ kɛnɛn: Bɛa biikoo li, Mikayeli á re yui, lon a dia dí-a wolen goledɛnaa lɛ á re yui, a din nə die n doe n tɔrɔn lɛn lɛ. Bɛa biikoo lɛ n die goɛ̃ nɔmaa gole biikoo lɛa, nɔmaa mɛn miã bɛ́ a tɔn yɛ wa, a saa tɔrɔn tá kanaa biikoo ganaa, a da dɔ bɛa biikoo lɛ ganaa. Bɛa biikoo li, n zaman lɛ á re kirisibiɛ, min mɛnɛn tumaa tɔ bɛ́ kiɛ̃-n sɛ́wɔ kɛ nɛ, bɛn tá re kirisibiɛ.

² Ǹ mɛnɛn bɛ́ nyuù we tán tii li, bɛn gigiã yii á re kiɛ. Ǹ tɛn yii á re kiɛ ǹ nyin nyabaã yɛ, ǹ tɛn dɔ yii á re kiɛ, ǹ sìi laanka nɔmaa duduu yɛ.

³ Min mɛnɛn bɛ́ sii doɛ̃, bɛn tá re tɛ pii ka lon gɔ̀nɔn kɛ bɛ́ lɔn. Min mɛnɛn nə zaman damata daraa peperebaa ganaa, bɛn tá re tɛ pii ka leeren bɛ́ lɔn yǎa duduu.

⁴ Nsɛ Danayeli, boon lɛn toa durii ni, sɛ́wɔ lɛ lɛ tã, yǎa biikoo giala-nyɔmiɛ̃ waáraa. Bɛa biikoo li, min gigiã á re n binbirin boe, màn tá re miɛ sii-doɛ̃ li.

⁵ Masɛ Danayeli bɛ́ tɔn golee-n giɛ, bɛ̀ min paa kɔsɔ á ke golee-n walan doo: goon nə tà lɛ a lɛkoro goon ganaa, goon kɛ na a lɛkoro kɔsɔ kɛ ganaa.

⁶ Ǹ goon tɔ́n nɔ̀n da giĩ kɛ la mɔnaa gole ná a ganaa, golee-n tà lɛ a mu lalan: «Bɛa kaãbaa ǹ sii kakan lɛn man die nyɛɛ biĩ?»

⁷ Bɛa biikoo li, giĩ mɛn lɛ goã golee-n tà mu lɛ lalan, ka mɔnaa gole ná a ganaa, bɛ nə́ n gusin a gɔn laanka a gɔsɛ a gɔn dia lon, Lawa mɛn bɛ́ a tan yǎa duduu, á n liɛ ka bɛ tɔ nɛ: Siin kɛn lɛn manə ǹ tan, yǎa lɛ̀ sɔɔ ka talɛɛ. Bɛ̀ Lawa a minin lɛn pàã nya lenlen ǹ mɛn waáraa, bɛa siin lɛn tumaa á re nyɛɛ.

⁸ Masɛ Danayeli bɛa boon lɛn ma kəni, sɛnɛ, man ma ǹ giala ma wa. Bɛ lɛ nɛ, má tɔ́n nɔ̀n da má pɛ: «Maa dɛnaagiĩ, bɛa siin lɛn man die n giala nyɔmiɛ̃ lɔn?»

⁹ Á tɔ́n pɛ ma nɛ: «Nsɛ Danayeli, wo kiĩni! A giala, boo kɛ lɛ doamaa nɛ a goã durii ni, a lɛ n tiɛ-n, yǎa biikoo giala-nyɔmiɛ̃ waáraa.

¹⁰ Min gigiã á re fuu yii. Bɛa fuu kɛ lɛ á re toɛ ǹ nə ǹ sii tele, *gɔ̀ ná a ba ǹ ganaa wa, ǹ nə́ yoreen ne. Min baraan man die ǹ sii zɛnɛɛ ka baraabaa nɛ, ǹ kɔn ba re a giala miɛ wa. Sɛnɛ, sii-dɔ̃lin tá re a giala miɛ.

¹¹ A saa baraabaraa a wúlu kɛ a boe lɛ-diɛ ganaa, a da kaa basaã kɔ ǹ sii bɔnɛɛ kɛ a zɛnaa lɛ, bɛ n die goɛ̃ lɛawaa duu goon ka biɛpaa ka pɔmanangɔrɔ (1 290).

¹² Min mɛn bɛ́ re sii sii a ganaa, yǎa a wo dɔ lɛawaa duu goon ka biɛsɔɔ ka pɔsɔɔwensooro (1 335), bɛa dɛnaa wɔ á re bǐɛ̃ koe!

¹³ Nsɛ Danayeli, goã la kɛnɛn, yǎa a woe kiɛ a giala-nyɔmiɛ̃ lɛ. N tá re n susui, n tɔn yoo n nə n saraa si biikoo giala-nyɔmiɛ̃ waáraa.»