Danayeli sɛ́wɔ 10 - LAWA A BOO SONBORE 2011

Sii-nyaa gole giala-nyɔmiɛ̃

¹ Pɛrɛsin kii Siirusu a kiibaa lɛ̀ sɔɔbaa ǹ wɔ li, Danayeli mɛn bɛ́ ǹ tá bíi Bɛlsazaara, sii kɔn nə́ n nyaa bɛ nɛ. Bɛa sii lɛ n taãn lɛa a n boo diɛ nɔmaa dadaran wɔ paǹ li. Danayeli nə́ n taasɛ bɛa sii lɛ ganaa, a ná a giala ma sii-nya barka nɛ.

² Bɛa waáraa kɛ lɛ nɛ, masɛ Danayeli yɔrɔ-kɔsiɛ wɔ pii zii sɔɔ lɛpiɛ̃, ka gɛ̀ na á gã ma la.

³ Ma màn kɔɔ̃n kɔn bii wa, siĩ ni ka duvɛ̃ nɛ, bɛ kɔn wɔ ma lɛ-n wa, ma nyɔɔ gìĩ kɔɔ̃n dɔ lɔ ma ganaa wa, yǎa pii zii sɔɔ lɛ lɛ pã ka buri.

⁴ Mui bibinaa a lɛawaa fuəwensiibaa ǹ wɔ pinaa, man má goã golee-n tà gole kɛ lɛ-a, ǹ nə́ bíi mà Tiigrə.

⁵ Má n yii saa má ga, bɛ̀ giĩ goon nə́ ke ka mɔnaa gole ná a ganaa. Maabɛlɛ na á goã a bɔ̃sɔ, sana yoreen yoreen lɛa.

⁶ A gɔ̀nɔn na á goã ka kɔlɔ giɔ̀mɔ kaka-a bɛ́ lɔn, a yɔrɔ n tɛ pii ka la a tɛ-pɛ bɛ́ lɔn, a yii nànan nə́ ka tɛ buə̃ bɛ́ lɔn, a gɔnɔn laanka a gòãn nə́ tɛ pii ka zan zɔnɛɛ bɛ́ lɔn. Bɛ̀ á boo diɛ, n nə n pii mà zaman lɛ n boe.

⁷ Masɛ Danayeli dinsɔɔ̃-n má bɛa sii kɛ lɛ yɛ. Min mɛnɛn nə goã kun ma nɛ, bɛn nə yɛ wa. Sɛnɛ, ǹ gɔ̀nɔn na á bìn da, ǹ nə́ baa si ǹ nə́ n duru.

⁸ Ǹ nə́ ma dinsɔɔ̃ toa walan kəni, má goã giɛ bɛa sii-nyaa gole lɛ ganaa. Pàã goon din goã ma lon doo wa, ma yɔrɔ dɔ nə́ n bɔyaa á ziziɛ̃. Pàã goon din goã ma lon wa.

⁹ Bɛa biikoo li, má giĩ lɛ a boo-diɛ lɛ ma. Ma bɛ́ má a boo-diɛ lɛ ma, má kere, má bɔ má mɛnaa tán ma lɛ la.

¹⁰ Ma laan bɛ̀ man doɛ̃, bɛ̀ min goon nə́ ke, á n gɔn da ma ganaa, á ma kũ á ma da ma musin laanka ma gɔnɔn la, ma gɔ̀nɔn yii n bìn diɛ.

¹¹ Giĩ lɛ tɔ́n pɛ ma nɛ: «Danayeli, n sii á kɔɔ̃n Lawa nɛ. Ma bɛ́ boon mɛnɛn pii n ni, n doa n bɛn giala ma. Yoo n golee lon n bǎã nɛ, a giala, Lawa na á ma dia n din li biikoo kɛ gɔ́ɔ̃ nɛ.» A bɛ́ a gialaa bɛa boo lɛ pii ma nɛ, má yoo má golee lon, ma gɔ̀nɔn yii n bìn diɛ.

¹² Á wusoo á pɛ ma-n doo: «Danayeli, n baran nyɛ́ɛ baa wa. A giala, a saa a lɛawaa bibinaa pinaa ganaa, n nə́ n din gisĩ Lawa giulun, n giɛ li mà n boon kɛn lɛn giala ma, ǹ giala nə́ n ma. N boon kɛn lɛn man nə́ daa ka masɛ nɛ.

¹³ Pɛrsin kii mɛn bɛ́ Pɛrsi gána kɛ tamaɛ, bɛ́ yɔ bɔ ma ganaa yǎa lɛawaa fuəwengoon. Sɛnɛ, lon a dia dí-a wolen goledɛnaa Mikayeli daa n dɔ ma lɛ. Má nɔmaa má goã Pɛrsin kiin li.

¹⁴ Sii mɛn bɛ́ re n tɔrɔn lɛn yii nyɛɛnɛ, masɛ n má daa bɛ pɛ n nɛ. A giala sii-yɛ kɔsɔ á re yii bɛa biikoo lɛ wɔ lɛa.»

¹⁵ A bɛ́ a gialaa bɛa boon lɛn diɛ ma nɛ, má n mìi zuməə tán, ma boo kɔn da wa.

¹⁶ Bɛ kio, bɛ̀ minbuiin nɛ a kɔnboe á ke, bɛ nə́ n gɔn da ma lɛ ganaa. Má tɔ́n nə n lɛ bũ má boo da. Min mɛn lɛ bɛ́ golee-n ma nyɛɛnɛ, má pɛ bɛ nɛ: «Maa dɛnaagiĩ, ma sii mɛn yɛ, bɛ lɛ na á nyɛ́ɛ da ma ganaa, pàã din ba ma lon doo wa.

¹⁷ Maa dɛnaagiĩ, masɛ miã kooro kɛ n siɛ lɔn, ma tɔn golee n yɔrɔ-a, ma boo da? A giala, pàã ba ma lon doo wa, fɔfoã dɔ din ba ma-n wa.»

¹⁸ A din bǎã-n gɔrɔ, min mɛn lɛ á ke ka minbuiin nɛ bɛ́ lɔn, bɛ́ wusoo á n gɔn da ma ganaa, á ma gù kaa.

¹⁹ Á tɔ́n pɛ ma nɛ: «N baran nyɛ́ɛ baa wa, n sii á kɔɔ̃n Lawa ganaa. Là nyantoro die a giã n li! N gù we yii, n nə n foo taã! A bɛ́ a gialaa boo diɛ ma nɛ, ma gù wusoo á kaa.» Má tɔ́n pɛ: «Maa dɛnaagiĩ, boo da, a giala, n ma gù kaa.»

^20-21 Giĩ lɛ wusoo á pɛ ma nɛ: – Sii mɛn da ka ma nɛ n li, n tá bɛ doɛ̃ ke? Màn mɛn bɛ́ kiɛ̃-n sonbore sɛ́wɔ kɛ nɛ, man má daa bɛ pɛ n nɛ. Sɛnɛ, kii mɛn nə́ ke Pɛrsi gána kɛ tamaɛ, masɛ a zia á tɔn kɔn ka bɛ nɛ. Bɛ̀ ma soo má n woe, Grɛkin kii dɔ á re die. Min kɔn dɔ banban a tá n doe ma lɛ, á n zia biɛ bɛa zɔ́ɔn lɛn ganaa wa, yǎa lon a dia dí-a wole Mikayeli ke Izirayeli minin tamaɛ.