Danayeli sɛ́wɔ 1 - LAWA A BOO SONBORE 2011

Danayeli laanka a ti-kun wolen

¹ Zudaa tɔrɔn kii Zozakimu a kiibaa lɛ̀ sɔɔbaa ǹ wɔ, *Baabilonii gána a kii Nebukadenezɔɔrɔ daa kɔ Zeruzalɛmu lɛ.

² Dɛnaa Zudaa tɔrɔn kii Zozakimu wɔ a gɔn kɔnlɛ ka Lawa a kion kɛ a dí nya ǹ mànan tɛnɛn nɛ. Nebukadenezɔɔrɔ daa ǹ nɛ Baabilonii gána nɛ, á mànan lɛn kaa a dì kion, a dì lɛ gɔn mànan tamaa ǹ bǎã nɛ.

³ Ǹ kɔn pinaa, Nebukadenezɔɔrɔ pɛ a dí-nyalin goledɛnaa Asipenaazi-n kɛnɛn: «Nɛgininin kɔnɔn bɔ Izirayeli minin lɛn bii n da ǹ nɛ, ǹ mɛnɛn bɛ́ kii tɔrɔn lɛa, sumu yii guguru-a minin lɛa.

⁴ Wɔ̀lɔ̀ kɔn doamaa bie a goã bɛa nɛgininin lɛn ganaa wa. Ǹ yɔrɔ doamaa nɛ a goã siĩni. Sii-doɛ̃ doamaa nɛ a goã ǹ lon sii tumaa wɔ paǹ li, yiri nə́ ǹ lon, ǹ nə́ sii a woo ǹ bǎã doɛ̃, ǹ nə́ die boe la ǹ kii a kion dí nya. Ka tá re bɛa nɛgininin lɛn darɛɛ Baabiloniin bɔlɔ laanka ǹ sɛ́wɔ kiɛ̃ ǹ gɔn ganaa.

⁵ Ma din bɛ́ màn mɛn bii, ma din bɛ́ duvɛ̃ mɛn mii, ka bɛ kɔn kɔ ǹ la baraabaraa. Ka ǹ too yǎa lɛ̀ sɔɔ, bɛ kio, ka tɔn nə ǹ kaa maa dí ni.»

⁶ Ǹ min mɛnɛn bɔ, Zudaa minin kɔnɔn nə́ goã ǹ bii: Danayeli ni, Anania nɛ, Mikayeli ni ka Azaria nɛ.

⁷ Dí-nyalin goledɛnaa lɛ tɔ kɔsɔn wɔ ǹ ganaa: á Danayeli bíi Bɛlsazaara, á Anania bíi Sadraki, á Mikayeli bíi Mesaki, á Azaria bíi Abɛdi-Negoo.

⁸ Sɛnɛ, Danayeli a taasiɛ màn mɛn kũ, bɛ n ka kɛ nɛ, mà asɛ a die kii a màn bii, a na a duvɛ̃ mi, a *gɔ̀ da a din ganaa wa. Á dí-nyalin goledɛnaa lɛ nyankɔ, mà a baran asɛ da bɛa màn kɛ tɔrɔ bii ganaa ka pàã nɛ, asɛ gɔ̀ da a din ganaa wa.

⁹ Lawa tɔn bǐɛ̃ kɔ Danayeli ganaa, a ná a sii kɔɔ̃n kɔ dí-nyalin goledɛnaa lɛ ganaa.

¹⁰ Sɛnɛ, dí-nyalin goledɛnaa lɛ pɛ Danayeli ni kɛnɛn: «Man nyɛ́ɛ biɛ maa dɛnaagiĩ kii lɛ nɛ, a giala, ka doamaa bɛ́ nɛ ka màn mɛn bii, ka màn mɛn mi, a din na á bɛ pɛ á koa tán. Bɛ̀ maa dɛnaagiĩ lɛ ka yɛ ka n pɛrɛ ka n liɛ ka miã lɛn manɛ, ka n die sii siɛ ka da masɛ mìi ni, ma nyin nɔmaa a goã a nɛ kii gɔn.»

¹¹ Danayeli ni, Anania nɛ, Mikayeli laanka Azaria nɛ, dí-nyalin goledɛnaa lɛ nə́ ǹ sii wɔ min goon gɔn. Danayeli na á pɛ bɛa dɛnaa lɛ nɛ:

¹² «Bǐɛ̃ kɔ n dù luun dininsɔɔ̃nɔn kɔ wɔ la wɔ sɔ̃, n mu kooro kɔ wɔ la wɔ mi lɛawaa fù gɔ́ɔ̃ nɛ n ga a ganaa.

¹³ Bɛ kio, n ga wɔ yɔrɔ-a, ka wɔ miãlɛn kɛn lɛn wɔ nɛ, kii a màn kɔɔ̃n kɛ bii. Bɛ́ n màn mɛn yɛ, n die n sii zɛnaa wɔsɛn manɛ, a kɔnpɛ ka bɛ nɛ.»

¹⁴ Giĩ lɛ lɛ kɔ bɛa boo lɛ ganaa, á ga ǹ ganaa lɛawaa fù gɔ́ɔ̃ nɛ.

¹⁵ Á pii mà a n woe doe lɛawaa fù, ǹ nə́ kasã ǹ yɔrɔ ń tɛ pii á la ǹ miã nɛgininin lɛn tumaa wɔ nɛ, ǹ mɛnɛn nə goã kii a màn-bii kɔɔ̃n lɛ bii.

¹⁶ A saa bɛ lɛ ganaa, ǹ sii nə n wɔ min mɛn lɛ gɔn, màn-bii kɔɔ̃n laanka duvɛ̃ mɛn doamaa bɛ́ nɛ a n kɔ ǹ la, asɛ n bɛn goɛ, bɛ̀ a dù luu lɛ kɔ Danayeli laanka ǹ miãn lɛn la.

¹⁷ Bɛa nɛgininin kɛn lɛn, Lawa doɛ̃ kɔ ǹ dinin min sii la, á sɛ́wɔ dɔ̃ ǹ yiri kɔ ǹ la, ka sii-doɛ̃ nɛ. Danayeli lɛ sɛ na á goã sii-nyaan tumaa laanka narɛɛn dɔn giala doɛ̃ a tá ǹ pii.

¹⁸ Kii Nebukadenezɔɔrɔ biikoo mɛn pɛ, bɛ bɛ́ á dɔ, dí-nyalin goledɛnaa lɛ nɛgininin lɛn kũ á woo ǹ ne kii lɛ li.

¹⁹ Kii lɛ sùn baa kunun ǹ ni. Sɛnɛ, ǹ dinin tumaa bii, Danayeli ni, Anania nɛ, Mikayeli laanka Azaria nɛ, a min kɔn yɛ ka bɛn bɛ́ lɔn wa. Bɛ lɛ nɛ, ǹsɛn lɛn nə́ tɔ́n kii a dí-nyalin baa.

²⁰ Sii mɛn tumaa bɛ́ sii-doɛ̃ laanka yiri ná a yɔrɔ boe, kii lɛ nɔ̀n da ǹ la ka ǹ mɛnɛn nɛ, á woo yǎa bɛ̀ ǹ nə́ la a gána lɛ a wɔ-kũlin laanka bòon kɛn tumaa nɛ gunyin fù.

²¹ Bɛ lɛ nɛ Danayeli goã walan, yǎa kii Siirusu a pàã saa lɛ̀ bibinaa li.