Boo-laakalaali 8 - LAWA A BOO SONBORE 2011

Sii-dɔ̃li laanka pàã boo

¹ Die n sii-dɔ̃li taãn lɛa? Die yii n doe sii gɔ́ɔ̃-n taãn-taãnɛ? Min a sii-doɛ̃ na a yɔrɔ diɛ tɛ pɛ-a. Ǹ dɛnaa yɔrɔ a babaraabaa dɔ nə n bɔyɛɛ.

² Masɛ máa bɛ̀ kii boo mɛn da, n bɛ si lɛ-kɔ kɛ taman yii, ń wɔ Lawa yɔrɔ-a.

³ N baran n nanaa n nə n wɔlɔ lui kii ganaa wa. Sii mɛn bɛ́ a ba kɔɔ̃n a wa, n baran n paraa bɛa zɛnaa-a wa. A giala, sii mɛn tumaa bɛ́ kɔɔ̃n kii ganaa, a n bɛ zɛnɛɛ.

⁴ Sonbore, boo ba kii a boo la kuri wa. Die yii ń we a pɛ nɛ, mà wàa sii n ke á tá zɛnɛɛ?

Min pepere ba kiri kurii biikoo doɛ̃ wa

⁵ Min mɛn bɛ́ gɔn-waa sii, sii a re bɛa dɛnaa yii wa. Sii-dɔ̃li á doɛ̃, mà ǹ kɔn pinaa, mà kiri tan.

⁶ A giala, sii tumaa laanka a biikoo ne, ka a kiri kurii dɔ nɛ. Sɛnɛ koe gole tan, minbuiin nɛ wɔ lɛa.

⁷ Sii mɛn bɛ́ re n zɛnɛɛ, a bɛ doɛ̃ wa. Bɛa sii lɛ bɛ́ re n zɛnɛɛ lɔn, die n die bɛ pii ni?

⁸ Min kɔn nyin biɛ ba a din gɔn, a tɔn boo la a tamaa wa. Min kɔn ba boe la, a na a gɛ̀ lɛawaa zɔ̃ a wo-n nyɛɛn wa. Bɛa zia kɛ lɛ miã, la ǹ gɔn banban wa. Min mɛnɛn bɛ́ baraabaa zɛnɛɛ, baraabaa lɛ ba re ǹ sii a ǹ kaa wa.

⁹ Má bɛ tumaa yɛ. Sii mɛn tumaa bɛ́ n zɛnɛɛ kanaa kɛ nɛ, má n yiri kɔ li doɛ̃. Biikoo na a tan, minbuiin nɛ n boe ǹ miã minbuiin nɛ yii ni, a baa koe-yele lɛa.

¹⁰ Bɛa yɔrɔ lɛ la, má yɛ ǹ nə́ min baraan bĩ. Minin man nə́ goã n toɛ Lawa a kion, bɛ̀ ǹ woo bɛ̀ ǹ daa, ǹ nə́ bɛa min baraan kɛn lɛn tɔ boe kiwi gɔ́ɔ̃ nɛ, ǹ nya ǹ dín taman yii. Bɛ dɔ giala banban.

¹¹ Nya ǹ dí baraan lɛn dɔlɔ bɛ́ a ba n boe a bǎã-n wa, bɛ lɛ n ke toɛ, sii baraa zɛnaa ǹ foo n minbuiin nɛ-n taãn-taãnɛ.

¹² Min baraa á boe la, a sii baraa zɛnaa gunyin damata, a yii dɔ n tɔn koo kiɛ̃. Sɛnɛ, ma á doɛ̃, máa nyɛ́ɛ baa Lawa yii-n wolen wɔ á die bǐɛ̃ koe. A giala mà ǹ tá nyɛ́ɛ biɛ Lawa yii ni.

¹³ Sɛnɛ, yii-nyɛɛ ba re yii, sii baraa zɛnaali lon wa. A n die kiɛ̃ ka wúlu bɛ́ lɔn, a nyin nya kunu, a giala, a ba nyɛ́ɛ biɛ Lawa yii-n wa.

¹⁴ Sii goon tá n zɛnɛɛ kanaa kɛ nɛ, a giala banban. Min peperen manə ǹ tan, min baraan nə kɔnbɔ ka sii mɛn nɛ, bɛ nə ǹ yii. Min baraan dɔn manə ǹ tan, min peperen nə kɔnbɔ ka sii mɛn nɛ, bɛ nə ǹ yii. Ka ma pɛ lɔn lɛn, bɛ ba a zii la wa! Kɛ yɛ masɛ nɛ.

¹⁵ Má tɔ́n pɛ máa nyɛnyɛɛ n sii sonbore lɛa a tɔ-a, a giala, màn kɔn din ba soɛ minbuiin nɛ ganaa, kanaa kɛ-n wa. Bɛ̀ á n bɔ, a màn bii, a màn mi, a n nyɛnyɛɛ. Bɛ lɛ na a dí lɛ a là lɛa, a tá kanaa lɛawaan kɛn gɔ́ɔ̃ nɛ, Lawa nə́ ǹ kɔ la.

Sii mɛn pàã la sii-doɛ̃ nɛ

^16-17 Min bɛ́ siɛ lɔn a tɔn sii-dɔ̃li baa, má da ma foo ne, máa ma bɛ giala ma. Minbuiin nɛ bɛ́ màn mɛn tumaa zɛnɛɛ kanaa kɛ nɛ, má n yii wɔ bɛ gɔ́ɔ̃-n sɔnbɔraanɛ. Má yɛ, máa ta wɔ n goɛ̃ wɔ yii ń koo, tèlò laanka penleen ne, wɔ ba boe la, wɔ Lawa a sii zɛnaa giala ma wa. Minbuiinin tá boe la, ǹ nə n gɔ̀nɔn da ǹ dinin-a, ǹ ga a giala li, sɛnɛ ǹ ba yii wa. Ta sii-dɔ̃li din pɛ mà asɛ á doɛ̃, a ba boe la, a na a giala ma wa.