Boo-laakalaali 11 - LAWA A BOO SONBORE 2011

Yiri bɔ á la yii ni tá sii ziziɛ̃

¹ Bɛ̀ n tá re sii mɛn zɛnɛɛ, n yii tã n zɛnaa, n wɔ á re yii a-n biɛ̃.

² Ka bɛ dɔ nɛ, n gɔn màn gii kɔn ka min gigiã nɛ, a giala, koe sii mɛn bɛ́ boe la, a n zɛnaa kanaa kɛ nɛ, n ba bɛ doɛ̃ wa.

³ Bɛ̀ ń la yɛ ti boe, a n die kiɛ. Bɛ̀ da dɔ bɔ á mɛnaa, a na á mɛnaa á woo gusin a lɛ̀gɔn la hinlaa gɔsɛ a lɛ̀gɔn la, a bɛ́ á mɛnaa tán bǎã mɛn lɛ nɛ, a n goɛ̃ tán walan.

⁴ Tán dí-nyali mɛn bɛ́ giɛ piɛ̃ gɔn li, bɛ na a die màn diɛ wa. Tán dí-nyali mɛn bɛ́ giɛ la gɔn li, bɛ na a die màn kuri wa.

⁵ N bɛ́ n ba piɛ̃ a kiɛ̃ ǹ zii doɛ̃ lɔn wa, ń nə́ n ba wen zɛnaa ǹ gɔn doɛ̃ lɔ nɔnɔ-a gɔ́ɔ̃-n lɔn wa, bɛa yɔrɔ kɛ lɛ dɔ la, n ba Lawa a nya ǹ dí giala miɛ wa, asɛ mɛn bɛ́ sii tumaa zɛnɛɛ.

⁶ Baayɛlɛ, n màn tɔrɔ da, n baran n gɔn basã wa, yǎa wasamiɛ̃nɛ. A giala, màn mɛn bɛ́ re bǐɛ̃ koe, n ba bɛ doɛ̃ wa, kɛ-n hinlaa kɛ nɛ, hinlaa ǹ dinin tumaa n die siĩn koe kun?

Lawa guguru-kɔ laanka Lawa bɔlɔ-si boo

⁷ Bɛ̀ n yii á koo bɛ á kɔɔ̃nɛ. Bɛ̀ n yii á koo, bɛ n nyɛnyɛɛ lɛa.

⁸ Bɛ lɛ n ke, bɛ̀ min yii á koo lɛ̀ didi gɔ́ɔ̃ nɛ, a doamaa nɛ, a n nyɛnyɛɛ bɛa lɛ̀n kɛn lɛn tumaa gɔ́ɔ̃ nɛ, a n yiri dɔ kɔ, mà lɛawaa kakan tá mɔnaa nɛ, mà sii mɛn yii bɛ́ die, mà yii ba doe a-n wa.

⁹ Tɔntɔraagiĩ, n nyɛnyɛɛ n tɔntɔraabaa gɔ́ɔ̃ nɛ. Toa n foo kɔɔ̃n kɔ n tenmaa waáraa. Bɛ̀ màn mɛn nə́ n foo kũ, n bɛ zɛnaa, bɛ̀ sii mɛn dɔ n yii li, n bɛ zɛnaa. Sɛnɛ, n dɔ̃ mà Lawa tá re kiri kuri n la, bɛa siin kɛn lɛn tumaa taman yii.

¹⁰ Taásiɛ bɔ n bɔ n foo ne, baraa wɔlɔ lui n gɔ̀nɔn ganaa. A giala, tɔntɔraabaa lɛ n kiɛ̃ fufuu, ka wɔlɔ fulii biikoo bɛ́ lɔn.