Abdiasi 1 - LAWA A BOO SONBORE 2011

¹ Boon kɛn man Abdiasi a sii-yɛn lɛa Edɔmu minin wɔ paǹ li: Á min dɔ din dia woe pii gána kɔsɔ minin manɛ. Wɔ boo mɛn ma boe Dɛnaa Lawa li, bɛ n ka kɛ nɛ: «Ka yoo, wɔ n ta kiwi lɛ gialaa ka zia nɛ.»

Dɔlɔ mɛn bɛ́ re n boe Edɔmu ganaa

² Edɔmu, á ke man die n biɛ kiɛɛrɛ tɔrɔ kɔsɔn bii, n tìĩ á re boe ǹ ne taãn-taãnɛ.

³ Táa n din-koa baraa kɛ lɛ nə n yiri siɛ̃! Nsɛ bɛ́ giã-n kele kɔ́sɔ nɛ, n nə́ lon kelen lalan, ma n taasɛ kəni: «Die n boe la a masɛ da gisĩ tán ganaa?»

⁴ Haalɛ ta ma nə ń piɛ̃, ń woo lon ka giogialatã-a bɛ́ lɔn, á kɔɔ̃nɛ, n wo n kii dɔ lon a leeren bii, man die n boe walan, ma n da tán! Ma din Dɛnaa Lawa a da ǹ boo ne.

⁵ Wurumunun kɛn bɛ́ re die kiɛ n li tèlò-n, basaã-kɔlen kɛn bɛ́ re kiɛ n li tèlò-n, n tá re doɛ̃! Ǹ bɛ́ re boe màn mɛn tumaa la, maǹ die bɛ goɛ ǹ wo ne. Rezɛ̃-nalin kɛn ba re màn kɔn toɛ wa, yǎa a nɛ gogoon dinsɔɔ̃.

⁶ Sonbore, Ezawu tɔrɔ lɛn, ǹ bɛ́ re ka biɛ lɔn, á ke: Ka gɔn mànan mɛnɛn duru, ǹ nə́ ke bɛn wɛɛ ǹ kiɛ fúlu-a.

⁷ Ka bɛ dɔ nɛ, ka n doa kɔn ka min mɛnɛn lɛn nɛ, ǹ nə́ ke ǹ nə́ ka loo, ǹ nə́ ka bɔ kaa bǎã nɛ. Ka kɔn wɔ ma ka min mɛnɛn lɛn nɛ, ǹ nə́ ke ǹ nə́ ka bebele, ǹ gɔn dɔ ka-a. Ǹ nə́ goã kaa màn bii kun ka nɛ, bɛ̀ ǹ nə́ pii: «Yiri goon din ba Edɔmu minin kɛn lon wa.»

⁸ Taãn nɛ, a pinaa á die, Ezawu tɔrɔn sii-dɔ̃lin kɛn, ma á die ǹ dii. Yiridɛnaa kɔn ba re goɛ̃ Edɔmu gána-n wa. Ma din Dɛnaa Lawa a da ǹ boo ne.

⁹ E, Temaa minin, nyɛ́ɛ á die kaa zia-baalin kɛn kuĩ. Bɛ lɛ n ke, ǹ tá re Ezawu tɔrɔn kɛn giĩn tumaa dii zia la.

Edɔmu minin nə sii mɛn la

¹⁰ Ka kakaarɛbaa ǹ sii mɛnɛn zɛnaa, ka dɔɔ̃n Zakɔba tɔrɔn kɛn manɛ, bɛ lɛ n ke, sìi gole á die ka kuĩ. Ǹ tá re ka dii, ǹ ka nya lenlen.

¹¹ Tiin bɛ́ ǹ nə́ daa kɔ Zeruzalɛmu lɛ ǹ mɛn pinaa, a pinaa, táa ka n ká golee tìãlɛa. Tɔrɔ kɔsɔn bɛ́ ǹ mànan goɛ ǹ gii kɔn ǹ mɛn pinaa, a pinaa, táa ka dɔn man ká kaa kunun ǹ ni, ká zɛnaa miɛ̃.

¹² A da yaa, ka dɔɔ̃nɔn lɛn bɛ́ koe ne ǹ mɛn pinaa, bɛ̀ ka doamaa bie ka golee ka ga ǹ ganaa wa. Zudaa tɔrɔn kɛn bɛ́ bɔ̀n biɛ ǹ mɛn pinaa, bɛ̀ ka doamaa bie ka golee, ka yaa wɔ ǹ ganaa wa. Ǹ bɛ́ nɔmaa gɔ́ɔ̃ nɛ ǹ mɛn pinaa, bɛ̀ ka doamaa bie ka n lɛ wɔ ǹ ganaa wa.

¹³ Sii bɛ́ á maa minin lɛn yɛ ǹ mɛn pinaa, bɛ̀ ka doamaa bie ka wɔ ǹ kiwi lɛ-n wa. Sii lɛ bɛ́ á ǹ yɛ ǹ mɛn pinaa, bɛ̀ kasɛn kɛn dinin doamaa bie ka golee, ka ga ǹ nɔmaa ganaa wa. Sii bɛ́ á ǹ yɛ ǹ mɛn pinaa, bɛ̀ ka doamaa bie ka n gɔn da ǹ gɔn mànan ganaa wa.

¹⁴ Nɔmaa bɛ́ maa minin lɛn mìi ni ǹ mɛn pinaa, ǹ mɛnɛn nə baa si ǹ nə́ la, bɛ̀ kasɛn kɛn doamaa bie, ka n doa zii gialaa, ka bɛn dɛ doo wa. Ǹ mɛnɛn nə goã ǹ yii n koo, bɛ̀ kasɛn kɛn doamaa bie, ka bɛn kũ, ka ǹ kɔ ǹ zɔ́ɔn la doo wa.

¹⁵ Á re bǐɛ̃ koe! Dɛnaa Lawa a dɔlɔ bɔ ǹ lɛawaa diri. Tɔrɔn tumaa sii tá a nɛ. Ka dɔn nə zɛnaa lɔn, a n die n zɛnɛɛ ka dɔn man miɛ̃. Ka baraa mɛn zɛnaa, a sii n die kuĩ ka dinin mìi ni.

Izirayeli minin kirisibaa

¹⁶ Kasɛn Izirayeli minin kɛn, ká ma gɔn lɛ yɛ maa kele sonbore kɛ la. Man die boe tɔrɔ kɔsɔn lɛn dɔn yii-n miɛ̃ duduu. Ma gɔn tá re miɛ̃ ǹ ganaa, á re doe ǹ yii li. Min din ba re doɛ̃, mà ǹ nə́ goã ǹ tan wa.

¹⁷ Sɛnɛ, min mɛnɛn bɛ́ re baa sii ǹ la, bɛn tá re n duri *Siɔn kele kɛ la, á re wusii a kele sonbore baa. Zakɔba tɔrɔn tá re wusii, ǹ nə ǹ bǎã si ǹ zɔ́ɔn la.

¹⁸ Ezawu tɔrɔn kɛn ka buu bɛ́ lɔn, Zakɔba tɔrɔn kɛn tá re tɛ biɛ bɛn ganaa, Zozɛfu tɔrɔn kɛn tá re tɛbuə̃ biɛ ǹ ganaa, ǹ tá re ǹ kuĩ, ǹ nə ǹ nya lenlen. Ǹ min goon yii a die goɛ̃ koo wa. Ma din Dɛnaa Lawa n má pɛ.

Lawa a kiibaa

¹⁹ Ezawu tɔrɔn kele yii kɛ á re doe gusin a lɛ̀gɔn la dɛnan kɛn ganaa. Ǹ mɛnɛn bɛ́ diə bǎã kɛ nɛ, Filisiti minin bǎã kɛ á re doe bɛn ganaa. Efrayimu tɔrɔn laanka Samarii minin bǎã kɛ á re doe Izirayeli minin ganaa. Galaati gána kɛ á re doe Bɛnzamɛn tɔrɔn ganaa.

²⁰ Ǹ Izirayeli a zia nɛn mɛnɛn goa, ǹ nə́ woo ǹ ne bɛ̀rɛbaa ǹ bǎã nɛ, Kanaan gána ke, a wo Sarɛptaa kiwi yaa, bɛ á re doe bɛn ganaa. Ǹ Zeruzalɛmu minin mɛnɛn goa, ǹ nə́ woo ǹ ne bɛ̀rɛbaa ǹ bǎã nɛ Sefaradi, gusin a lɛ̀gɔn la kiwin kɛn tá re doe bɛn ganaa.

²¹ Min mɛnɛn nə kirisibaa bɛn tá re dii Siɔn kele kɛ la, ǹ giã Ezawu gána mìi la. Kiibaa á die goɛ̃ Dɛnaa Lawa nɛ!