Abakuku 3 - LAWA A BOO SONBORE 2011

Lawa a sii dadaran

¹ Lawa a boo gii-dali Abakuku a Lawa nyankɔ goon nə́ ke. A na á lɔ ka bɛ̀ dɛ ǹ màn nɛ.

² Dɛnaa Lawa, má n boo ma. Ma gɔ̀nɔn nə bìn diɛ ǹ nyɛɛnɛ, n sii dadaran zɛnaa a lɛa, Dɛnaa Lawa. Wɔa yiikoonaabaa gɔ́ɔ̃ nɛ, bɛa siin kɛn kɔnboe nyaa wɔ nɛ! Wɔa yiikoonaabaa gɔ́ɔ̃ nɛ, toa ǹ nə n dɔ̃! Ta n foo na á yoo, n yiri kɔ n din a makara doɛ̃ kɛ nɛ.

³ Lawa n boe Temaa, Lawa sonbore lɛ n boe Paran a kelen la. *Doa A golebaa lon pã, a tɔ laakalaa tán pã.

⁴ A n tɛ pii ka wɔlɔ fúlu bɛ́ lɔn. Tɛ fúlu n boe a gɔn nɛ, a Pàã lɛ a duru ǹ bǎã n ka bɛ nɛ.

⁵ Piɛ̃ busu n tɔ we a nyɛɛnɛ, gɔ̀nɔn woɛ̃ n tɔ we a kio.

⁶ Bɛ̀ á gole, tán nə bìn diɛ. Bɛ̀ á ga tɔrɔn ganaa, bɛn man nyɛ́ɛ biɛ nɛ. Kelen mɛnɛn bɛ́ ǹ tan duduu, bɛn man wɔsɛ kɔn. Tentenən mɛnɛn bɛ́ ǹ tan lɛlɛ, bɛn man kiɛ, ǹsɛn mɛnɛn nə goã a kiɛ̃ ǹ zii lɛa lɛlɛ.

⁷ Ma yii n Kuusan gána a zìãn ganaa tɔtoɛ̃ nɛ, Madiã gána a giã ǹ bǎã ziziɛ̃ nɛ.

⁸ Dɛnaa Lawa, n foo n yoo-n tàn li? N foo n yoo-n tàn li sonbore? Bɛ̀ n tá kiɛ̃ n gɔ̀lɔ̀baa ǹ wotoro kɛ nɛ ka n sùin ni, n foo n busi yìsi mu gole kɛ li?

⁹ N nə́ n sa dii, n lɛ gɔ́ɔ̃ ǹ boon kɛn, bɛn manə n kiɛn lɛa. Doa Man tán wɔsɛ, ka mu ziin ni.

¹⁰ Kelen yii tá n ganaa. Maǹ bìn diɛ nyɛ́ɛ gɔn. Mu n kiɛ tán ka we ne, Yìsi mu gole n gini a ná a mu zuĩ lon.

¹¹ Wasa laanka mui n golee-n bǎã goon ne n kiɛn kɛn zuĩ a tɛ fúlu nyɛɛnɛ ka n sɛmiɛ̃ kɛa tɛ fúlu ni.

¹² Man tɔ we tán la ka foo-yoo ne. Man tɔrɔn yɔyɔrɛ ka foo-yoo baraa nɛ.

¹³ N soo n tá n zaman kirisibiɛ, ka min mɛn bɛ́ n bɔ n koa n wɔ lɛa. Man min baraan kiã yɔyɔrɛ, n na a kion ziziɛ̃ lenlen. Doa

¹⁴ Ma nə n zɔ́ɔn kiãn mìi foɛ̃ ka ǹ dinin gɔn kiɛ nɛ: Maǹ die ka baa nɛ ka piɛ̃ gole bɛ́ lɔn, ǹ nə́ wɔ lui paǹ yii li. Maǹ nə n lɛ dii ka foo kɔɔ̃nbaa nɛ, ǹ yɔrɔ n boe ne durii a minin dɛ taman yii.

¹⁵ Man woe nyɛɛnɛ yìsi mu li ka n sùin ni, mu ginii wole pàãdɛnaa kɛ bii.

¹⁶ Má bɛa bìn diɛ kɛ tumaa ma, ma foo ziziɛ̃. Ma lɛ n bìn diɛ nyɛ́ɛ gɔn, ma pàã nya. Ma a boe la ma á gole ma goãn la wa. Tɔrɔ mɛn yoo wɔ ganaa, ma nə n yii diɛ koe lɛawaa kɛ la kiĩn ni, Dɛnaa Lawa bɛ́ re die yui ǹ gialaa ǹ mɛn pinaa.

¹⁷ Á ke, gɔ́rɔ dan ba buũ koe doo wa. *Rezɛ̃ da ba nɛ koe doo wa. Nɛ ba *olivie da la doo wa. Màn-bii kɔn ba boe wurun ni wa. Sère goon din ba sèren kion wa. Dii ba zìã-n wa.

¹⁸ Sɛnɛ, masɛ n maa foo kɔɔ̃nbaa yii Dɛnaa Lawa li. Lawa mɛn bɛ́ ma kirisibiɛ, ma nə n nyɛnyɛɛ a din taman yii.

¹⁹ Dɛnaa Lawa n ma pàã lɛa. Á ma gù kaa ka yuùn bɛ́ lɔn. A n toɛ ma á tɔ woe kelen mìi ni. Ǹ loe mɛn lɔ Loe-saalin goledɛnaa wɔ lɛa, ǹ nə́ da zii ka loe lɔ ǹ mànan nɛ, biɛn nə́ ǹ ganaa.