Kawkanta 8 - Hay halitá nin Diyos hay kawkanta boy kawkahalita-an (The New Testament Psalms and Proverbs)

Hay kapangyariyan nin Pangino-on ay ampipatnag ha kaganawan dogal

(Kanta ni Dabid)

¹ Pangino-on ya Pangino-on nawen, hay kapangyariyan mo ay ampipatnag ha kaganawan dogal ha babon lotà. Hay kagandawan mo ya ahè mapantayan ay nipatnag angga ha katatag-ayan.

² Hay mangayamò ya aw-anak boy kawkolaw ay ampipagkantan pamomori komo. Banà bayri, hika ay emen ha matibay ya dipinsa ya makapategen nin kawka-away mo.

³ No ampaninglà ako ha langit ya ginawà mo ta angkakit koy bowan boy bawbito-en ya ingkolokar mo

⁴ ay an-ihipen ko no anya ya tawo ta ampanemtemen mo boy ampa-alaga-an mo.

⁵ Balè ginawà mo ya nin ma-aypà ha aw-anghil boy intag-ay mo ya nin pinarangalan nin emen ha arì.

⁶ Kaganawan bagay ya ginawà mo ay inggawà mo ha hilong kapangyariyan na,

⁷ bilang ha tawtopa, bawbakà, aw-ayop ya mangahilib,

⁸ mawmanokmanok, kawkonà, boy kaganawan ma-in biyay ya anti ha dagat.

⁹ Pangino-on ya Pangino-on nawen, hay kapangyariyan mo ay ampipatnag ha kaganawan dogal ha babon lotà.