Kawkanta 63 - Hay halitá nin Diyos hay kawkanta boy kawkahalita-an (The New Testament Psalms and Proverbs)

Mahabek ha Diyos

(Kanta ni Dabid hin anti ya ha powiray dogal ha Hoda)

¹ Pangino-on Diyos, hika ya Diyos ko ya an-onawen ko ha biyay ko. Talagan angkahabekan kata boy hay pagkahabek ko komo ay emen akon angka-angan nin bilang ha naklang ya lotà ya ampanga-ilangan nin lanom.

² Nakit katayna ha tabirnakolo mo boy bayro ko nakit ya kapangyariyan mo kateng kagandawan mo.

³ Hay ingangalo mo ya ma-in panlalabi ay igit et ha biyay; kayà poriyen kata.

⁴ Leleg kon angkabiyay, hiko ay mamori komo, boy itag-ay koy gamet ko ha panalangin ko komo.

⁵ Hiko ay mag-in kontinto nin bilang ha tawoy napdà nangan nin makatang ya pamamangan, boy magkanta kon maligay kanta ya pamomori komo.

⁶ Ha pamimirà ko ay angkapanemteman kata, boy no ma-in akon ampagpoyatan nin bantayan ay hika ya angkahole-lè ko.

⁷ Banà ta hika ya ampanambay kongko ay magtowà ako ha pangongopkop mo kongko.

⁸ Hiko ay lalò anhomeneh komo, boy agko mapangno ta hika ya ampangalalay kongko.

⁹ Hay ampipagsikap nin mamati kongko ay mipalako ha dogal nin nikati.

¹⁰ Hila ay mikati ha pamakilaban boy hay bawbangkay la ay kona-en nin mangabangis ya aw-ayop.

¹¹ Piro hiko ya arì ay matowà ha Diyos; kaganawan ampagpangakò kongko ya arì ay lomiga, balè hay bawbebey nin mangabongkok ay pepe-en.