Kawkanta 136 - Hay halitá nin Diyos hay kawkanta boy kawkahalita-an (The New Testament Psalms and Proverbs)

Kantan pasasalamat

¹ Pasalamatan moyoy Pangino-on ta hiya ay mahampat; hay panlalabi na ay ayin angga.

² Pasalamatan moyoy Diyos ya Pinakamakapangyariyan ha kaganawan andiyosen, ta hay panlalabi na ay ayin angga.

³ Pasalamatan moyoy Pangino-on ya Pinakamakapangyariyan ha kaganawan ampangino-onen, ta hay panlalabi na ay ayin angga.

⁴ Hiyan bongat ya ampanggawà nin masyadoy pawpapag-ispantawan; hay panlalabi na ay ayin angga.

⁵ Ha karonongan na ay napalsa nay langit; hay panlalabi na ay ayin angga.

⁶ Pinalwah nay lotà ha babo nin lanom; hay panlalabi na ay ayin angga.

⁷ Hiya ya nanggawà nin allo boy bowan; hay panlalabi na ay ayin angga.

⁸ Ginawà nay allo ya mambin hawang no allo; hay panlalabi na ay ayin angga.

⁹ Hay bowan boy bawbito-en ay ginawà nan mambin hawang no yabi; hay panlalabi na ay ayin angga.

¹⁰ Hay pawponganay nin tawtaga Ihipto ay pinatipati na; hay panlalabi na ay ayin angga.

¹¹ Hay Aw-israylita ay inalih na ha nasyon Ihipto; hay panlalabi na ay ayin angga.

¹² Ha pangi-alih na konla ay ginamit nay kakhawan nin kapangyariyan na; hay panlalabi na ay ayin angga.

¹³ Hay lanom nin dagat ya an-ingaten Ma-orit ay pinihiyay na; hay panlalabi na ay ayin angga.

¹⁴ Hay Aw-israylita ay bayro na pinaraan ha pinihiyay nay lanom nin dagat; hay panlalabi na ay ayin angga.

¹⁵ Piro hi Arì Para-on kateng hawhondalò na ay nilemeh na bayro ha dagat ya an-ingaten Ma-orit; hay panlalabi na ay ayin angga.

¹⁶ Pasalamatan ya Pangino-on ta hiya ay nangona ha tawtawo na ha powiray dogal anggan nog-alih hila bayro; hay panlalabi na ay ayin angga.

¹⁷ Hay aw-arì ya makapangyariyan ay pinatipati na; hay panlalabi na ay ayin angga.

¹⁸ Hiya simpri ya namatipati nin bawbantog ya aw-arì; hay panlalabi na ay ayin angga.

¹⁹ Hi Sihon ya arì nin Aw-amoriyo ay pinati na; hay panlalabi na ay ayin angga.

²⁰ Pinati na simpri hi Og ya arì nin Basan; hay panlalabi na ay ayin angga.

²¹ Hay dawdogal nin hatoy pinatipati na ay inggawà na ha tawtawo na; hay panlalabi na ay ayin angga.

²² Talagan habaytoy dawdogal ay inggawà na ha tawtawo na ya aw-inalalak ni Israyil ya magsisirbi na; hay panlalabi na ay ayin angga.

²³ Hin ayin kayin magawà banà ha kakapeyan nawen ay agna kayi pina-olayan; hay panlalabi na ay ayin angga.

²⁴ Hitamo ay inlibri na ha kawka-away tamo; hay panlalabi na ay ayin angga.

²⁵ Hiya ay ampambin pamamangan ha kaganawan pinalsa na; hay panlalabi na ay ayin angga.

²⁶ Pasalamatan ya Diyos ya anti ha katatag-ayan ha kama-inan na, ta hay panlalabi na ay ayin angga.