Kawkanta 129 - Hay halitá nin Diyos hay kawkanta boy kawkahalita-an (The New Testament Psalms and Proverbs)

Panalangin emen matalo ya kawka-away nin aw-inalalak ni Israyil

(Kanta ya angkantawen mintras ampako ha bali nin Diyos)

^1-2 Dayi, hay halita-en nin aw-inalalak ni Israyil ay ombayri: “Pa-ibat hin malagò ako ay masyado kon pinadya-dya-an nin kawka-away ko, piro agla ko napatalo.

³ Hay bokot ko ay kowinta naboyot lan hinogatan nin bilang nangararon paliyan.

⁴ Piro hay Pangino-on ay mahampat, ta inlibri na ko ha kowinta pangihe-el kongko nin mangala-et.”

⁵ Dayi, kaganawan ampag-inakit ha dogal ya an-ingaten Siyon ay mipagbiran ampikareng-ey.

⁶ Dayi, hila ay matowad nin bilang ha dikot ya tinomobò ha bobongan; habayti ay angkayangoh maski ayin et ha pana-on.

⁷ Kayà ayin ampameteh nin mandipen nin habayti.

⁸ Ni miha ha ampikahagoy ya ampakakit nin habayti ay ayin ampaghalità nin ombayri: “Dayi, hay kahampatan nin Pangino-on ay mipalako komoyo; ha ngalan nin Pangino-on, hay kahampatan na ay mipalako komoyo.”