Kawkanta 121 - Hay halitá nin Diyos hay kawkanta boy kawkahalita-an (The New Testament Psalms and Proverbs)

An-asiwa-en nin Pangino-on ya ampipampahimalà kona

(Kanta ya angkantawen mintras ampako ha bali nin Diyos)

¹ Nanegteg ako ha bawbakil biha ko pinastang ya sarili ko nin ombayri: Ayri mangibat ya tambay kongko?

² Hay tambay kongko ay mangibat ha Pangino-on ya namalsa nin langit boy lotà.

³ Agna payagan nin hika ay mapangno; hiya ya ampangasiwà komo boy hiya ay ahè ampamitiglep.

⁴ Talagan hay ampangasiwà nin aw-inalalak ni Israyil ay ahè ampamitiglep o angkatoloy.

⁵ Pangino-on ya ampangasiwà komo; hiya ay anti ha dani mo para mangi-atap komo.

⁶ Hay amot nin hilà allo ay ahè makapangno komo; ombayro simpri ha hawang nin bowan no yabi.

⁷ Ha kaganawan kapiligrowan ay Pangino-on ya mangasiwà komo; hiya ya mangasiwà nin biyay mo.

⁸ Pa-ibat hapa-eg boy anggan makakanoman, Pangino-on ya mangasiwà komo maski ayri ka mako.