Kawkanta 12 - Hay halitá nin Diyos hay kawkanta boy kawkahalita-an (The New Testament Psalms and Proverbs)

Pamakirawat simpri nin tambay

(Kanta ni Dabid)

¹ Manambay ka, Pangino-on, ta ayin anan natilà ya mahampat ya tawo; ayin ana simprin tawoy tapat.

² Kaganawan tawo ay ampibobongkokan ana boy hay anhalita-en la ha miha ta miha ay pawpangoto-otò.

³ Pategenen mo dayi, Pangino-on, ba-in ya tawtawoy ampaghalità nin pawpangoto-otò boy kawkabongkokan.

⁴ Hay anhalita-en la ay ombayri: “Maghalità kayi anggan labay nawen, boy ayin nin makapategen konnawen. Ma-in warì makadikta konnawen nin halita-en nawen?”

⁵ Hapa-eg, hinalità nin Pangino-on, ya wana, “Banà ha pagka-apih boy pandodoma-ing nin ampipanga-ilangan ay pakarani ko konla, ta hay naboyot laynan anhangaren ya protiksyon ay igwà ko konla.”

⁶ Hay pawpangakò nin Pangino-on ay mapahimala-an, ta habayti ay bilang ha talagan pilak ya kapitoy bisis nin hinobok nin imparaan ha apoy emen mag-in poro.

⁷ Pangino-on, pirmi mo kayin ilibri boy i-atap ha tawtawoy mangala-et.

⁸ Hay tawtawoy mangala-et ay anti ha maski ayrin dogal bayri ha babon lotà, boy balang miha ay an-ipagmapori ya kala-etan.