Саалтыр 85 - Сибэтиэй Биибилийэ кинигэлэрэ

1 Давид үҥүүтэ.

¹ Давид үҥүүтэ. Болҕойон иһит мин этэрбин, Айыы Тойон, уонна миэхэ хардар; мин дьадаҥыбын, кыһалҕалаах киһибин.

² Араҥаччылаа олохпун, мин Эйиэхэ бэриниилээхпин; быыһаан ыл, Айыы Таҥара, Эйиэхэ эрэмньилээх кулуккун.

³ Абыраа миигин, Айыы Тойон, Эйигин мин уһун күнү быһа ыҥырабын.

⁴ Үөрт кулутуҥ дууһатын, мин дууһам Эйиэхэ үөһэ дьулуһар.

⁵ Үтүө санаалааххын Эн, Айыы Тойон, бырастыы гынаҕын, Эйигин ыҥырар дьону барытын муҥура суох таптыыгын.

⁶ Иһит, Айыы Тойон, мин үҥэрбин, болҕой ааттаһар саҥабын.

⁷ Эриирдээх күммэр Эйигин ыҥыран эрэбин, Эн миигин истиэҕиҥ.

⁸ Ким да суох Эн курдук, Айыы Тойон, таҥаралар ортолоругар, ким да оҥорор кыаҕа суох Эн оҥороргун.

⁹ Айбыт норуоттарыҥ, бука бары кэлэннэр, Эн иннигэр нөрүөн нөргүйүөхтэрэ, Айыы Тойон, Эн ааккын кинилэр айхаллыахтара.

¹⁰ Эн улуугун, сөҕүмэр дьайыылары оҥороҕун, Эйигиттэн атын Таҥара суох.

¹¹ Үөрэт миигин, Айыы Тойон, Бэйэҥ суолгар, оччоҕо мин Эн кырдьыккынан сылдьыаҕым; Эн ааккыттан толлорум курдук, мин сүрэхпин бигэ оҥор.

¹² Бүтүн сүрэхпинэн Эйигин айхаллыам, Айыы Тойон Таҥарам, үйэм тухары Эн ааккын уруйдуом.

¹³ Эн миэхэ бигэ тапталыҥ муҥура биллибэт сүдү; мин дууһабын Эн үтүгэн түгэҕиттэн өрүһүйдүҥ.

¹⁴ Айыы Таҥара, улуутумсуктар миигин утары өрө турдулар; баламат дьон, түмсэннэр, олохпор суудайдылар, кинилэр иннилэригэр Эйигин көрбөттөр.

¹⁵ Оттон Эн, Айыы Тойон, аһыныгас сүрэхтээх, үтүө санаалаах, улуу тулуурдаах, муҥурун булларбат бигэ тапталлаах, эрэбиллээх Таҥараҕын.

¹⁶ Оо, хайыс миэхэ, миигин абыраа, кулуккар күүстэ-сэниэтэ салҕаа; кулут кыыһыҥ уолун быыһаан ыл.

¹⁷ Айыы Тойон, үтүө сыһыаныҥ бэлиэтин миэхэ көрдөр; Эн миэхэ көмөлөспүккүн, уоскулаҥы биэрбиккин көрөннөр, миигин абааһы көрөөччүлэр сааттыннар.