Саалтыр 84 - Сибэтиэй Биибилийэ кинигэлэрэ

¹ Хуор салайааччытыгар. Корей уолаттарын псалома.

² Айыы Тойон, Эн сиргэр амарахтык сыһыаннаспытыҥ, Иаков уолаттарын билиэнтэн төнүннэрбитиҥ;

³ норуотуҥ буруйун бырастыы гыммытыҥ, бары аньыытын-харатын соппутуҥ, Села

⁴ онтон ыла биһиэхэ абарбат-сатарбат буолбутуҥ, уоттаах уоргун уҕарыппытыҥ.

⁵ Быыһабыллаах Таҥарабыт, биһигини чөлбүтүгэр түһэр, биһиэхэ абарбыккын намырат.

⁶ Ама үйэлэр тухары Эн биһиэхэ кыыһыра сылдьыаҥ дуо, көлүөнэттэн көлүөнэҕэ уордайа туруоҥ дуо?

⁷ Ама, норуотуҥ Эйигиттэн үөрэрин туһугар, Эн биһигини хат тилиннэриэҥ суоҕа дуо?

⁸ Бигэ тапталгын биһиэхэ көрдөр, Айыы Тойон, быыһабылгын бэлэхтээ.

⁹ Айыы Тойон Таҥара тугу этэрин мин истиэм. Кини норуотугар, талан ылбыт дьонугар, эйэни биллэриэҕэ. Оо, хат толкуйа суох быһыыламматаллар эрэ!

¹⁰ Кэрэмэн килбиэн биһиги сирбитигэр сатыылыырын туһугар, Киниттэн куттанар дьону быыһыырга Кини бэлэм.

¹¹ Бигэ таптал уонна бэриниилээх буолуу көрсүһүөхтэрэ, кырдьык уонна эйэ уураһыахтара.

¹² Бэриниилээх буолуу сиртэн үүнэн тахсыаҕа, кырдьык ону халлаантан көрүөҕэ.

¹³ Айыы Тойон үтүөнү бэлэхтиэҕэ, биһиги сирбит эмиэ быйаҥын биэриэҕэ.

¹⁴ Кырдьык Кини иннигэр түһэн барыаҕа, Кини барар суолун солуоҕа.