Саалтыр 62 - Сибэтиэй Биибилийэ кинигэлэрэ

¹ Давид псалома. Иудея кураайы дуолугар сылдьан.

² Айыы Таҥара, Эн буолаҕын мин Таҥарам; Эйигин мин көрдүүбүн сарсыарда эрдэттэн, Эйиэхэ дууһам утаппыттыы дьулуһар; бу иччитэх, куура хаппыт, уута суох сиргэ сылдьан, сүрэҕим-быарым Эйиэхэ курдаттыы тардыһар;

³ Эн сүдү күүскүн, кэрэмэн килбиэҥҥин көрөөрү, мин тиийэн кэлиэм этэ Эн сибэтиэй Дьиэҕэр!

⁴ Бүтүн олохтооҕор күндү Эн бигэ тапталыҥ, Эйиэхэ мин этиэм уруй-айхал тылларын.

⁵ Олоҕум устатын тухары Эйигин мин алгыам; Эн ааккын ааттаан, икки илиибин өрө көтөҕүөм.

^6-7 Утуйаары сытан Эйигин өйдөөн кэллэхпинэ, уһун түүнү быһа Эйигин санаатахпына, дууһам, сыаттан, елей арыыттан топпуттуу, дуоһуйар, оччоҕо дьол-үөрүү тылынан мин Эйиэхэ айхал этэбин.

⁸ Эн миэхэ көмөлөһөргүттэн үөрэммин, мин Эн кынатыҥ хаххатыгар ырыа ыллыыбын.

⁹ Дууһам Эйиэхэ ыга сыһынна, Эн күүстээх илииҥ миигин өйөөтө.

¹⁰ Оттон мин тыыммар туруммуттар сир түгэҕэр түһүөхтэрэ,

¹¹ сытыы кылыһынан кыдыллан, саһыл аһылыга буолуохтара.

¹² Ыраахтааҕы Таҥараттан үөрүөҕэ-көтүөҕэ; албын тыллаахтар хам бараннар, Таҥаранан андаҕайааччы барыта өрөгөйдүөҕэ.