Саалтыр 58 - Сибэтиэй Биибилийэ кинигэлэрэ

¹ Хуор салайааччытыгар. «Өлөрүмэ» матыыбынан. Давид ырыата. Саул, кинини дьиэтин таһыгар өлөртөрөөрү, бэйэтин дьонун чуҥната ыыппытыгар.

² Өстөөхтөрбүттэн миигин өрүһүй, Айыы Таҥарам, өрө турааччылартан көмүскээ.

³ Хара дьайдаахтартан өрүһүйэн ыл, хаанымсахтартан быыһаа.

⁴ Көр, ол мин кылыыбын кэтэһэн, кирийэн сыталлар; буруйум да, аньыым да иһин буолбатах, Айыы Тойон, күүстээхтэр үрдүбэр түһэргэ бэлэмнэр.

⁵ Буруйу оҥорбутум суоҕа да, үрдүбэр түһээри үөмэхтэһэллэр. Оо, туран, миэхэ көмөҕө кэл уонна көр!

⁶ Айыы Тойон, Аанньал сэриитин Таҥарата, Израиль Таҥарата, уһуктан, бары норуоттары уодьуганнаа, уодаһыннаах хара дьайдаахтартан кими да ордорума. Села

⁷ Хас киэһэ аайы төннөн кэлэннэр, ыт курдук улуйа-улуйалар, куораты тула хаамаллар.

⁸ Ыыс-бурут тыллары кулгуйаннар, айахтарын кылыһынан сулуйаллар, «Ким биһигини истиэҕэй?» – дии саныыллар.

⁹ Ол эрэн, Айыы Тойон, Эн кинилэри күлүү гыныаҕыҥ, Эн омуктары саакка-суукка ыытыаҕыҥ.

¹⁰ Оо, мин күүһүм-тирэҕим! Эйигин мин кэтэһэбин, Эн буолаҕын, Айыы Таҥара, мин кириэппэһим.

¹¹ Үтүө санаалаах Таҥарам миигин утары көрсүөҕэ, өстөөхтөрүм өһөллөрүн Кини миэхэ көрдөрүөҕэ.

¹² Норуотум умнубатын туһугар, Эн кинилэри өлөртөөмө: күдэн күүскүнэн үрэйтээн, кинилэри самнартаа, Айыы Тойон Көмүскээччибит.

¹³ Айахтарын аньыытын, уостарын буруйун иһин, улахамсык санааларын угаайытыгар киирдиннэр; кырыыһы таптыылларын, сымыйаны саҥаралларын иһин,

¹⁴ уордайан, кинилэри сууһартаа, суола суох сүтүөхтэригэр диэри, сууһартаа; оччоҕо Иаковы Таҥара салайарын сир уһугар тиийэ билиэхтэрэ. Села

¹⁵ Хас киэһэ аайы төннөн кэлэннэр, ыт курдук улуйа-улуйалар, куораты тула хаамаллар.

¹⁶ Ас көрдөөн салбыҥныыллар, аччык хаалан ырдьыгыныыллар.

¹⁷ Оттон мин Эн күүскүн-уоххун хоһуйуом, сарсыарда эрдэттэн Эн бигэ тапталгын уруйдуом. Күчүмэҕэй күммэр Эн миигин кириэппэс буолан көмүскүүрүҥ, кыһалҕалаах күммэр миигин хахха буолан харыстыырыҥ.

¹⁸ Оо, мин күүһүм-тирэҕим, айхал ыллыам Эйиэхэ. Айыы Таҥара – мин кириэппэһим, миигин бигэтик таптыыр Таҥарам.