Саалтыр 57 - Сибэтиэй Биибилийэ кинигэлэрэ

¹ Хуор салайааччытыгар. «Өлөрүмэ» матыыбынан. Давид ырыата.

² Дьиҥ чахчы кырдьыгы этэҕит дуо эһиги, судьуйалар, көнөтүк дьүүллүүгүт дуо бар дьону?

³ Сокуона суоҕу сүрэххитигэр аттараҕыт, сир устун күүскүтүнэн өттөйөҕүт.

⁴ Хара саҥнаахтар ийэттэн түһэ суолтан туораабыттар, албыны-көлдьүнү саҥаран, төрүөхтэриттэн муммуттар.

^5-6 Кинилэр дьааттара – эриэн үөн сүлүһүнэ, кулгааҕын бүөлэнэн, абылааччы саҥатын, хайа да сатабыллаах абылааччы саҥатын, истибэт дьүлэй кобра дьаата.

⁷ Айыы Таҥара, тиистэрин айахтарын иһигэр турута оҕус, Айыы Тойон, эдэр хахайдар аһыыларын тосту тут!

⁸ Уу устан ааһарыныы ааһа турдуннар; ох сааларын кирсин тартахтарына, оноҕосторо тосту бардыннар.

⁹ Хаатыттан тахсан барбыт үөннүү, суола суох сүттүннэр, төрүөн иннинэ түспүт төрүөхтүү, үрүҥ күнү көрбөтүннэр.

¹⁰ Хочуолларгытын амынньыар уота хаарыйа да илигинэ, хоруорбут да, өлүөр да аскытын холорук ытыйан илтин.

¹¹ Иэстэбил туолбутун көрөн, кырдьыксыт үөрүөҕэ; кини хара дьайдаахтар хааннарын кэһиэҕэ.

¹² Оччоҕо дьон-сэргэ этиэҕэ: «Дьиҥ чахчы баар эбит кырдьыксыт киһи манньата! Дьиҥ чахчы баар эбит сиргэ көнөтүк дьүүллүүр Таҥара!»