Саалтыр 52 - Сибэтиэй Биибилийэ кинигэлэрэ

¹ Хуор салайааччытыгар. Флейта доҕуһуолунан. Давид үөрэтиитэ.

² Өйө суохтар истэригэр «Таҥара суох» дии саныыллар. Бары сатарыйбыттар, сидьиҥник быһыыланаллар; үтүөнү оҥорор киһи ким да суох.

³ Биир эмэ өйдөөҕү-төйдөөҕү, Таҥараны көрдөөччүнү булан көрөөрү, Таҥара халлаантан киһи аймаҕы анаарар.

⁴ Бары уҥа-хаҥас туораабыттар, бары туһаларыттан тахсыбыттар; үтүөнү оҥорор киһи суох, биир да суох.

⁵ Ама өйдөнүөхтэрэ суоҕа дуо буруйу оҥорооччулар, мин норуоппун килиэптии мэҥиэстээччилэр, Таҥараны ыҥыран көрбөт дьон?

⁶ Кинилэр онно, улуу кутталга ылларан, хаһан да уолуйбатахтарын уолуйуохтара: эйигин утары турунааччылар уҥуохтарын Таҥара урусхал оҥортуоҕа. Кинилэртэн Таҥара аккаастанна, онон эн кинилэри саакка ыытыаҕыҥ.

⁷ Оо, Сионтан Израильга быыһабыл кэлэрэ буоллар! Таҥара норуотун билиэнтэн төнүннэрдэҕинэ, Иаков үөрүөҕэ-көтүөҕэ, Израиль өрөгөйө үрдүөҕэ.