Саалтыр 51 - Сибэтиэй Биибилийэ кинигэлэрэ

¹ Хуор салайааччытыгар. Давид үөрэтиитэ.

² Идумея киһитэ Доик Саулга тиийэн, «Давид Ахимелех дьиэтигэр кэллэ» диэн тыллаабытын истэн.

³ Тоҕо хара дьайыыгынан хайҕанаҕын, харса суох эр бэрдэ? Таҥара бигэ таптала миигинниин өрүү бииргэ.

⁴ Өлөрөр-өһөрөр суолу торумнуугун, кыырыктаах бии кэриэтэ эн тылыҥ, куодалаах дууһа!

⁵ Мөкүнү үтүөтээҕэр өрө тутаҕын, кырдьыгы этэрдээҕэр сымыйалыыргын ордороҕун. Села

⁶ Сүлүһүннээх тыллары эн сөбүлүүгүн, көлдьүн тыллаах.

⁷ Ол иһин Таҥара эйигин букатыннаахтык сууһарыаҕа, отуугуттан харбаан ылан, киэр быраҕыаҕа, тыыннаахтар дойдуларыттан түөрэн ылыаҕа. Села

⁸ Көнө дьон ону дьулайа көрүөхтэрэ, кинилэр хара дьайдааҕы күлүөхтэрэ:

⁹ «Таҥараҕа көмүскэтиэн баҕарбатах киһи ити баар. Барҕа баайыгар эрэнэрэ, хара дьайынан көмүскэнэрэ».

¹⁰ Оттон мин Таҥара Дьиэтигэр көҕөрө чэлгийэр маслина маһын кэриэтэбин; Таҥара бигэ тапталыгар мин эрэнэбин үйэттэн үйэлэр тухары.

¹¹ Бары дьайыыҥ иһин махтанан, үйэм тухары мин Эйигин айхаллыам; итиэннэ, Эн сибэтиэйдэргин кытта бииргэ сылдьан, Эн үтүөкэннээх ааккар эрэниэм.