Саалтыр 50 - Сибэтиэй Биибилийэ кинигэлэрэ

¹ Хуор салайааччытыгар. Давид псалома,

² Вирсавиялыын көссүүлэспитин кэннэ, Давидка Нафан пророк кэлэ сылдьыбытыгар.

³ Абыраа миигин, Айыы Таҥара, улуу амарах санааҕыттан, үтүмэн үтүөҕүнэн суох оҥор мин буруйбун-сэмэбин.

⁴ Элбэх төгүл сууйан, хара дьайыыбын ыыт, аньыыбыттан миигин ырааһырт.

⁵ Буруйу-сэмэни оҥорбуппун мин билэбин, аньыыбын-харабын өрүү өйдүү сылдьабын.

⁶ Эйигин, соҕотох Эйигин утары мин аньыыны оҥордум, Эн иннигэр уодаһыннаахтык быһыыланным, онон Эн уурааҕыҥ сөптөөх, Эн дьүүлүҥ ыраас.

⁷ Мин үөскүөхпүттэн мөкү быһыылаахпын, ийэттэн төрүү аньыылаахпын.

⁸ Эн киһи ис сүрэҕиттэн кырдьыктаах буоларыгар баҕараҕын, ол иһин мин дууһабын Бэйэҥ муудараскынан сырдатаҕын.

⁹ Иссоп угунан миигин ыһыахтаа, оччоҕо мин ырааһырыам; миигин сууй, оччоҕо хаардааҕар маҥхайыам.

¹⁰ Миэхэ үөрүүнү, көрү-нары иһитиннэр, оччоҕо, төһө да Эн миигин самнарбытыҥ иһин, мин үөрүөм-көтүөм этэ.

¹¹ Мин аньыыбын-харабын көрүмэ, буруйбун-сэмэбин барытын суох оҥор.

¹² Ыраас сүрэхтэ миэхэ ай, Айыы Таҥара, ис тыыммын саҥардан, кырдьыктаах оҥор.

¹³ Миигин Бэйэҕиттэн киэр анньыма, Сибэтиэй Тыыҥҥын миигиттэн былдьаама.

¹⁴ Быыһабылыҥ үөрүүтүн миэхэ төнүннэр, Баһылыыр Тыыҥҥынан миигин бөҕөргөт.

¹⁵ Сокуона суохтары Эн суолгар мин үөрэтиэм, оччоҕо аньыылаахтар Эйиэхэ эргиллиэхтэрэ.

¹⁶ Быыһаа хааны тохпут аньыыбыттан, Айыы Таҥара, миигин быыһыыр Таҥарам, оччоҕо Эн кырдьыккын мин айхаллыам.

¹⁷ Айыы Тойон, уоспун өһүл, мин Эйиэхэ уруй-айхал тылын этиэм;

¹⁸ Эйиэхэ сиэртибэ биэриэм этэ да, ону Эн баҕарбаккын, бүтүннүү уматыллар бэримньини ахсарбаккын.

¹⁹ Таҥара ылынар сиэртибэтэ – аньыытын кэлэнэр сүрэх; аньыытын кэлэнэр сымнаҕас сүрэҕи Эн киэр анньыаҥ суоҕа, Айыы Таҥара.

²⁰ Үтүө санааҕыттан Сиоҥҥа амарахтык сыһыаннас, Иерусалим эркинин чөлүгэр түһэр.

²¹ Оччоҕо үөрүөҕүҥ Эн сиэрдээх сиэртибэттэн, уматан бэриллэр бэлэхтэн-туһахтан, бүтүннүү уматыллар бэримньиттэн; оччоҕо Эн сиэртибэнньиккэр кунаннары ууруохтара.