Саалтыр 45 - Сибэтиэй Биибилийэ кинигэлэрэ

¹ Хуор салайааччытыгар. Корей уолаттарын псалома. «Кыргыттар» матыыптарынан. Ырыа.

² Айыы Таҥара – биһиги халыҥ хаххабыт, күдэн күүспүт, хайа да алдьархайга түргэн көмөлөһөөччүбүт.

³ Онон, баҕар, сир да дьигиһийэ хамсаатын, хайалар да байҕал түгэҕэр сиҥнэн түстүннэр, биһиги онтон куттаныахпыт суоҕа.

⁴ Баҕар, күүгэн алла, байҕал барылыы бааллырдын, долгун суостаах уоруттан хайа халбаҥнаан бардын. Села

⁵ Өрүс сүүрүгэ үөрүүнү аҕалар Айыы Таҥара куоратыгар, Үрдүктэн Үрдүк олорор сибэтиэй Дьиэтигэр.

⁶ Таҥара бу куоракка баар, онон куорат тулхадыйыа суоҕа, сарсыарда эрдэттэн Таҥара киниэхэ көмөлөһүөҕэ.

⁷ Норуоттар айманаллар, саарыстыбалар самналлар, Таҥара саталаах саҥатыттан сир ууллар.

⁸ Аанньал сэриитин Айыы Тойоно биһигини кытта, биһиги халыҥ хаххабыт, суон дурдабыт – Иаков Таҥарата. Села

⁹ Кэлиҥ, көрүҥ Айыы Тойон дьайыыларын, Кини сир үрдүгэр оҥорор сөҕүмэр дьиктилэрин:

¹⁰ сир уһугар тиийэ сэриини тохтотон, Кини ох саалары тоһутар, үҥүүлэри булгурутар, куйахтары уокка уматар.

¹¹ «Чуумпуруҥ! Билиҥ: Мин Таҥарабын! Мин уруйданыам норуоттар ортолоругар, уруйданыам бүтүн сир үрдүнэн».

¹² Аанньал сэриитин Айыы Тойоно биһигини кытта, биһиги халыҥ хаххабыт – Иаков Таҥарата. Села