Саалтыр 28 - Сибэтиэй Биибилийэ кинигэлэрэ

1 Давид псалома.

¹ Давид псалома. Айхаллааҥ Айыы Тойону, Таҥара уолаттара, айхаллааҥ Айыы Тойон кэрэмэн килбиэнин, улуу кыаҕын.

² Айхаллааҥ Айыы Тойон албаннаах аатын, сүгүрүйүҥ Айыы Тойоҥҥо Кини сибэтиэй сыдьаайыгар.

³ Айыы Тойон саҥата уу үрдүнэн иһиллэр; албан ааттаах Таҥара этиҥнии ньириһийэр, Айыы Тойон саҥата улуу байҕал үрдүнэн эҥсиллэр.

⁴ Айыы Тойон саҥата модун күүстээх, Айыы Тойон саҥата сүдү бэйэлээх.

⁵ Айыы Тойон саҥата сыалаах мастары тоһуталыыр; Айыы Тойон Ливан сыалаах мастарын тоһуталыыр.

⁶ Кини Ливаны тыһаҕастыы ыстаҥалатар, Сириону эдэр оҕустуу ойуоккалатар.

⁷ Айыы Тойон саҥата уот төлөнүн саҕар,

⁸ Айыы Тойон саҥата кураайы дуолу дьигиһитэр, Айыы Тойон Кадес кураайы дуолун дьигиһитэр.

⁹ Айыы Тойон саҥата уулаах табалары төрөтөр, ойуурдары-тыалары сыгынньах хаалларар; «Албан аат!» – ким барыта Кини Храмыгар саҥа аллайар.

¹⁰ Айыы Тойон уу мотуогун үрдүнэн бүрүстүөлгэ олорор, Айыы Тойон ыраахтааҕылыыр бүрүстүөлүгэр үйэттэн үйэлэр тухары олорор.

¹¹ Айыы Тойон норуотугар күүстэ-сэниэтэ салгыахтын, Айыы Тойон, эйэни бэлэхтээн, норуотун алгыахтын.