Саалтыр 23 - Сибэтиэй Биибилийэ кинигэлэрэ

1 Давид псалома.

¹ Давид псалома. Сир уонна сиргэ баар барыта – Айыы Тойон киэнэ, аан дойду уонна онно олорор барыта – Киниэнэ.

² Кини сири муоралар үрдүлэригэр олохтообута, өрүстэр үрдүлэригэр туруорбута.

³ Ким Айыы Тойон хайатыгар тахсыаҕай? Ким Кини сибэтиэй сиригэр туруоҕай?

⁴ Кир-дьай киртиппэтэх илиилээх, ыраас сүрэхтээх, дууһатын сымыйаҕа кытыарбатах, албыннаан андаҕайбатах киһи.

⁵ Кини Айыы Тойон алгыһын ылыаҕа, Быыһааччы Таҥаратын амарах сыһыанын билиэҕэ.

⁶ Итинниктэр эбээт Киниэхэ дьулуһааччылар, Иаков Таҥаратын көрүөхтэрин баҕарааччылар. Села

⁷ Тэлэччи аһыллыҥ, олбуор ааннара, мэҥэ ааннар, өрө көтөҕүллүҥ – киириэхтин килбиэннээх Ыраахтааҕы!

⁸ Кимий килбиэннээх Ыраахтааҕы? Күүстээх Айыы Тойон, бараммат кыахтаах, кыргыһыыга кыайыылаах Айыы Тойон.

⁹ Тэлэччи аһыллыҥ, олбуор ааннара, мэҥэ ааннар, өрө көтөҕүллүҥ – киириэхтин килбиэннээх Ыраахтааҕы!

¹⁰ Кимий килбиэннээх Ыраахтааҕы? Аанньал сэриитин Ыраахтааҕыта, Кини килбиэннээх Ыраахтааҕы. Села