Саалтыр 2 - Сибэтиэй Биибилийэ кинигэлэрэ

1 Давид псалома.

¹ Давид псалома. Тоҕо норуоттар айманаллар, омуктар кураанахха куомуннаһаллар?

² Сир ыраахтааҕылара сэриилэһээри тэринэллэр, кинээстэр бииргэ түмсэн киксэллэр, Айыы Тойону уонна Кини Ыраахтааҕытын утараннар:

³ «Сыаптаабыттарын быһа тардыахха, бохсубуттарын булгу охсуохха!» – дэһэллэр.

⁴ Халлааннарга Олорооччу күлэр, Айыы Тойон кинилэри элэк оҥостор.

⁵ Онтон Кини абаран-сатаран этиэҕэ, уордайан, кинилэри уолутуоҕа:

⁶ «Мин Бэйэм талбыт Ыраахтааҕыбын сибэтиэй хайам Сион үрдүнэн туруорбутум».

⁷ Айыы Тойон ыйааҕын Мин иһитиннэриэм: Кини эттэ: «Эн Миэхэ Уолум буолаҕын, Мин бүгүн Эйигин төрөттүм;

⁸ Миигиттэн көрдөс – Мин Эйиэхэ бары норуоттары биэриэм, сири, сиксигиттэн саҕалаан, Эйиэхэ бас биллэриэм.

⁹ Эн кинилэри тимир торуосканан сууһартыаҥ, күөс охсооччу иһитинии үлтүрүтэлиэҥ».

¹⁰ Онон билигин, ыраахтааҕылар, өйдөнүҥ; сир судьуйалара, эһиги үөрэниҥ.

¹¹ Айыы Тойоҥҥо куттанан туран үлэлээҥ, Кини иннигэр долгуйан туран үөрүҥ-көтүҥ;

¹² Уолугар эһиги сүгүрүйүҥ – Кинини кыыһырдан суолга быстарбат туһугар, бэрт сотору Кини уора-кылына уоттуу оргуйуоҕа. Киниэхэ эрэнээччилэр бука бары дьоллоохтор.