Саалтыр 17 - Сибэтиэй Биибилийэ кинигэлэрэ

1 Хуор салайааччытыгар. Айыы Тойон Давиды өстөөхтөрүттэн уонна Саултан быыһаабытыгар,

¹ Хуор салайааччытыгар. Айыы Тойон Давиды өстөөхтөрүттэн уонна Саултан быыһаабытыгар, Айыы Тойон кулута Давид бу ырыаны Айыы Тойоҥҥо ыллаабыта. Кини эппитэ:

Айыы Тойон кулута Давид бу ырыаны Айыы Тойоҥҥо ыллаабыта. Кини эппитэ:

² Таптыыбын Эйигин, Айыы Тойон, мин күүһүм-тирэҕим!

³ Айыы Тойон – мин туруук таас хайам, мин кириэппэһим, Өрүһүйээччим. Айыы Таҥарам – хорҕойор очуоһум, мин куйаҕым, Быыһааччым, суон дурдам.

⁴ Уруйданар тосхоллоох Айыы Тойону ыҥырыам, өстөөхтөрбүттэн мин быыһаныам.

⁵ Өлөр өлүү муҥа миигин буулаабыта, хара дьай халаана уолуһуппута.

⁶ Үтүгэн түгэҕин быата-туһаҕа иилээбитэ, иин илимэ миигин эрийбитэ.

⁷ Кыһарҕаҥҥа түбэһэн, мин Айыы Тойону ыҥырбытым, Таҥарабыттан көмө көрдөһөн үөгүлээбитим. Кини Бэйэтин Дьиэтиттэн мин саҥабын истибитэ, мин үөгүлүүрүм Кини кулгааҕар тиийбитэ.

⁸ Дьэ онно сир, дьигиһийэн, түөрэҥнэс буолбута, хайалар, олохторо хамнаан, халбаҥнаан ылбыттара, ол курдук Таҥара уора-кылына оргуйан турбута.

⁹ Кини уоруттан буруо будулуйан тахсыбыта, уоһуттан суостаах уот уһуурбута; Киниттэн кыһыл чох кытыаста ыһыллыбыта.

¹⁰ Халлааннары иҥнэри баттаан, Кини түһэн кэлбитэ, халыҥ хараҥаҕа үктэммитэ.

¹¹ Херувимнарга олорон көппүтэ, тыал кынаттарыгар уйдарбыта.

¹² Хараҥаны таҥастыы бүрүммүтэ, хара былыты тулатыгар сабыы быыстыы түһэриммитэ.

¹³ Иннигэр иһэр туналхай сырдыктан, Кини былыттарын курдаттаан, тобурах тохтубута, кыһыл чох сардырҕас буолбута.

¹⁴ Халлааннарга Айыы Тойон этиҥнии ньиргийбитэ, Үрдүктэн Үрдүк Таҥара куолаһа иһиллибитэ, Кини толону кытта уоттаах чоҕу куппута.

¹⁵ Онтон оҕунан ытыалаан, кинилэри ыспыта, чаҕылҕан бөҕөнөн дапсыырдаан, үрүө-тараа ыыппыта.

¹⁶ Айыы Тойон, Эн суостаах саҥаҥ сатарыйбытыгар, Эн уоруҥ буркун буолан бураллыбытыгар, уу төрдө үрүлүйэн көстүбүтэ, аан дойду акылаата аҥайа арыллыбыта.

¹⁷ Кини, үөһэттэн илиитин уунан, миигин тардан ылбыта, дириҥ ууттан ороон таһаарбыта.

¹⁸ Кини миигин суостаах өстөөхпүттэн, күүстэринэн сабырыйар абааһы көрөөччүлэртэн өрүһүйбүтэ;

¹⁹ Күчүмэҕэй күммэр күөнтээбиттэрэ эрээри, Айыы Тойон миигин өйөөбүтэ.

²⁰ Киэҥ дуолга Кини миигин таһаарбыта, үтүө сыһыаннаах буолан быыһаабыта.

²¹ Айыы Тойон кырдьыкпынан көрөн төлөөбүтэ, илиим ырааһынан көрөн биэрбитэ.

²² Мин куруутун Айыы Тойон суолун тутуһарым, Таҥарабыттан нэгэйдик тэйэ хаампатаҕым;

²³ Кини биир да кэриэһин умнубатаҕым, уураахтарын туора уурбатаҕым.

²⁴ Кини иннигэр буруйа-сэмэтэ суох сылдьарым, аньыыны оҥорортон туттунарым.

²⁵ Ол иһин Айыы Тойон, кырдьыкпынан көрөн, илиим ырааһынан көрөн, миэхэ төлөөтө.

²⁶ Бэриниилээххэ Эн бэриниилээххин көрдөрөҕүн, эҥкилэ суохха – эҥкилэ суоххун;

²⁷ ырааска – ырааскын көрдөрөҕүн, уодаһыннаахха – албастааххын.

²⁸ Сэмэйдэри Эн быыһаан ылаҕын, оттон улахамсыктары намтатаҕын.

²⁹ Мин сибэтиинньикпин Эн уматаҕын; Айыы Тойон Таҥарам хараҥабын сырдатар.

³⁰ Эйигин кытта мин өстөөх сэриитин үлтүрүтэбин, Таҥарабын кытта куорат эркинин ылабын.

³¹ Таҥара! – Кини суола-ииһэ эҥкилэ суох, Айыы Тойон тыла эрэбил; Киниэхэ эрэнээччигэ барытыгар Кини куйах буолар.

³² Ким баарый Таҥара – Айыы Тойонтон ураты? Ким баарый биһигини көмүскүөх – Таҥарабытыттан ураты?

³³ Таҥара миигин, сылайбат сындааһыннаан, көнө суолунан сырытыннарар.

³⁴ Кини миигин, таба курдук быһый оҥорон, үрдүк очумаастары дабайтарар;

³⁵ Кини сэриилэһэргэ үөрэтэн, мин алтан ох саа кирсин тардабын.

³⁶ Эн миэхэ быыһабыллаах куйаххын туттардыҥ, уҥа илиигинэн миигин өйөөтүҥ, Эн көмөҥ миигин улуу оҥордо.

³⁷ Хардыылыырбар Эн миэхэ киэҥ сири биэрдиҥ, ол иһин мин халты тэбиммэтим.

³⁸ Өстөөхтөрбүн, эккирэтэн, ситэ баттаан ыллым, итиэннэ, имнэри эһиэхпэр диэри, төннүбэтим.

³⁹ Мин кинилэри турбаттыы сууһараммын, атаҕым анныгар сууллаллар,

⁴⁰ ол курдук Эн миэхэ сэриилэһэр күүс уктуҥ, утарсааччыларбын атаҕым анныгар охтордуҥ.

⁴¹ Өстөөхтөрүм тыылларын миэхэ аһан биэрдиҥ, онон миигин абааһы көрөөччүлэри мин суох оҥордум.

⁴² Көмө көрдөһөн үөгүлэспиттэрэ да, ким да быыһаабата, Айыы Тойону ыҥырбыттара да, Кини хардарбата.

⁴³ Кумаҕы тыалга ыһардыы, мин кинилэри күдэҥҥэ көтүттүм, уулусса бадарааныныы илдьи тэбистим.

⁴⁴ Эн миигин норуот өрө туруутуттан өрүһүйдүҥ, туора уустар тойоннорунан туруордуҥ; урут билбэтэх дьонум миэхэ үлэлииллэр;

⁴⁵ сурахпын истиэхтэрэ эрэ кэрэх, бас бэринэллэр, туора омуктар илин-кэлин түһэллэр;

⁴⁶ кинилэр, эр санааларын ыһыктаннар, кириэппэстэриттэн салыбырас буолан тахсаллар.

⁴⁷ Айыы Тойон тыыннаах, мин көмүскээччим алгыстаах! Айхаллана туруохтун быыһабыллаах Таҥарам,

⁴⁸ мин туспар иэстэһэр, миэхэ норуоттары бас бэриннэрэр Айыы Таҥара,

⁴⁹ өстөөхтөрбүттэн өрүһүйээччи. Эн миигин утарсааччыларбынааҕар үрдэттиҥ, суостаах киһиттэн өрүһүйдүҥ.

⁵⁰ Айыы Тойон, мин омуктар ортолоругар Эйигин уруйдуом, Эн ааккын айхаллаан ыллыам.

⁵¹ Улуу кыайыылары Эн ыраахтааҕыгар биэрэҕин, бүрүстүөлгэ олордубут Давидкар уонна кини удьуордарыгар үйэттэн үйэҕэ бигэ тапталгын көрдөрөҕүн.