Саалтыр 16 - Сибэтиэй Биибилийэ кинигэлэрэ

1 Давид үҥүүтэ.

¹ Давид үҥүүтэ. Айыы Тойон, иһит мин кырдьыктаах дьыалабын, болҕой үөгүлүүр саҥабын; иһит Эйиэхэ үҥэрбин – мин сымыйаны эппэппин.

² Эйигиттэн көнө дьүүл миэхэ тосхойдун; Эн хараҕыҥ кырдьыгы көрүөхтүн.

³ Сүрэхпин тургутан көрөөрү, Эн миэхэ түүн кэлэн барбытыҥ, миигин холоон көрөҥҥүн, тугу да булан ылбатаҕыҥ: тылым-өһүм миэнэ санаабыттан атына суох.

⁴ Күннээҕи дьыалабар-куолубар, Эн тылгын тутуһаммын, күөмчүһүттэр суолларыттан мин дьалты туттарым.

⁵ Мин өрүү Эн суолгунан сылдьарым, биирдэ да бүдүрүйбэтэҕим.

⁶ Эйигин ыҥырабын, Эн миэхэ хардарыаҕыҥ, Айыы Таҥара; кулгааххын миэхэ чугаһатан, мин этэрбин иһит.

⁷ Сөҕүмэр бигэ тапталгын миэхэ көрдөр, Эйигин дурда-хахха туттааччылары Эн уҥа илиигэр утарсааччылартан Быыһааччы!

⁸ Хараҕыҥ харатыныы, миигин харыстаа, кынатыҥ хаххатыгар саһыар

⁹ миигин үрэйэр өһөгөйдөөхтөртөн, төгүрүйэн турар дууһам өстөөхтөрүттэн.

¹⁰ Сүрэхтэрэ сыа буолан, аһынары умналлар, бэрдимсийэн-үтүөмсүйэн саҥараллар.

¹¹ Ханна да барыыбыт, тулабытыгар сылдьаллар, хара буорга тэпсээри, хас хардыыбытын манаһаллар.

¹² Хайа тардарга бэлэм хахай кыыллар курдуктар, хахха сиргэ манаһар эдэр хахайдар курдуктар.

¹³ Оо, тур, Айыы Тойон; утары туран, кинилэри самнартаа. Кылыскынан быыһаа олохпун хара дьайдаахтартан,

¹⁴ Бэйэҥ илиигинэн өрүһүй, Айыы Тойон, муҥур үйэлээхтэртэн, ирээттэрин олохтон ылбахтаан хаалар бу дойду дьонноруттан. Эн кинилэргэ хаһааммыккын истэрэ уйарынан сиэтиннэр, уолаттарыгар эмиэ дэлэйдик бэристиннэр, оҕолоругар эмиэ төһө эмэ ордоруохтуннар.

¹⁵ Оттон мин, кырдьыгынан сылдьаммын, Эн сирэйгин көрүөҕүм; уһуктан бараммын, Эн мөссүөҥҥүнэн дуоһуйуоҕум.