Саалтыр 146 - Сибэтиэй Биибилийэ кинигэлэрэ

¹ Аллилуия. Үчүгэй даҕаны Таҥарабытыгар айхал ыллыырбыт! Үөрүүлээх даҕаны Кинини сиэрдээхтик айхаллыырбыт!

² Айыы Тойон Иерусалимы чөлүгэр түһэрэр; Израильтан үүрүллэн барбыты төнүннэрэр.

³ Кини самныбыт санаалаахтары үтүөрдэр, кинилэр баастарын эмтиир-оһордор.

⁴ Кини сулустар ахсааннарын быһаарар, кинилэргэ барыларыгар аат быһар.

⁵ Биһиги Айыы Тойоммут улуу, Кини сүдү күүстээх, муҥурун булларбат муударай өйдөөх.

⁶ Айыы Тойон баттаммыты өрө таһаарар, оттон хара дьайдааҕы сиргэ-буорга быраҕар.

⁷ Ыллааҥ, Айыы Тойону айхаллааҥ, арфаҕа оонньооҥ Таҥарабытыгар.

⁸ Кини халлааны былытынан бүрүйэр, сиргэ-дойдуга ардаҕы бэлэмниир, томтор сирдэри торҕо күөҕүнэн симиир.

⁹ Кыылы-сүөлү аһылыгынан хааччыйар, аччыктаан хаһыытаһар суор оҕолорун кытта аһатар.

¹⁰ Кини ат күүһүттэн-уоҕуттан, киһи атаҕа быһыйыттан үөрэр буолбатах –

¹¹ Айыы Тойон үөрэр Киниттэн куттанааччыттан, Кини бигэ тапталыгар эрэнээччиттэн.