Саалтыр 144 - Сибэтиэй Биибилийэ кинигэлэрэ

1 Давид айхал ырыата.

¹ Давид айхал ырыата. Уруйдуом Эйигин, Айыы Таҥарам, Ыраахтааҕым, Эн ааккын алгыам үйэттэн үйэлэр тухары.

² Күнтэн күн Эйигин мин алгыам, үйэттэн үйэҕэ Эн ааккын айхаллыам.

³ Айыы Тойон улуу, онон улуу уруй Киниэхэ тосхоллоох. Кини сүдү Бэйэтэ муҥурун булларбат.

⁴ Көлүөнэттэн көлүөнэҕэ Эн дьайыыларгын айхаллыахтара, Эн модун кыаххын иһитиннэрэр буолуохтара.

⁵ Эн сүдү Бэйэлээх үрдүк килбиэҥҥин, сөҕүмэр дьайыыларгын мин анаарыам.

⁶ Эн дьулаан дьайыыларыҥ күүһүн кэпсиэхтэрэ, мин эмиэ Эн сүдүгүн иһитиннэриэм.

⁷ Эн улуу үтүө санаалааххын ахтыһар буолуохтара, Эн кырдьыктааххын туойуохтара.

⁸ Айыы Тойон аһыныгас сүрэхтээх, амарах санаалаах, Кини улуу тулуурдаах, муҥура биллибэт бигэ тапталлаах.

⁹ Айыы Тойон кимиэхэ баҕарар үтүө сыһыаннаах, Кини амарах санаата айбытыгар барытыгар туһааннаах.

¹⁰ Айбытыҥ барыта, Айыы Тойон, Эйигин айхаллыаҕа, сибэтиэй дьонуҥ барыта Эйигин алгыаҕа.

¹¹ Эн Саарыстыбаҥ килбиэнин кинилэр иһитиннэриэхтэрэ, Эн модун кыаххын кэпсиэхтэрэ,

¹² оччоҕо ким барыта билиэҕэ Эн күүстээх дьайыыгын, Эн Саарыстыбаҥ килбиэннээх сырдыгын.

¹³ Үйэттэн үйэҕэ туругурар Эн Саарыстыбаҥ, көлүөнэттэн көлүөнэҕэ барар Эн баһылааһыныҥ.

¹⁴ Айыы Тойон охтон эрэри барытын өйүүр, бүк түспүтү барытын өрө тардар.

¹⁵ Харахтаах эрэ барыта Эйигин эрэнэ кэтиир, Эн кинилэр аһылыктарын кэмигэр биэрэҕин.

¹⁶ Дэлгэм ытыскын аһаҥҥын, хас биирдии харамай баҕатын ханнараҕын.

¹⁷ Айыы Тойон бары суолугар кырдьыктаах, бары дьайыытыгар үтүө санаалаах.

¹⁸ Айыы Тойон Кинини ыҥырааччыга барытыгар чугас – дьиҥ кырдьыгынан ыҥырааччыга бука барытыгар.

¹⁹ Киниттэн куттанааччылар баҕаларын Кини толорор, көмө көрдүүр саҥаларын истэн, кинилэри өрүһүйэр.

²⁰ Айыы Тойон Кинини таптыыр дьону араҥаччылыыр, оттон нэгэйдэри барыларын имири эһиэҕэ.

²¹ Айыы Тойону мин айхаллыаҕым; тыынар тыыннаах барыта үйэттэн үйэҕэ Кини сибэтиэй аатыгар алгыс этиэҕэ.