Саалтыр 140 - Сибэтиэй Биибилийэ кинигэлэрэ

1 Давид псалома.

¹ Давид псалома. Айыы Тойон! Эйигин ыҥырабын; тиэтэй миэхэ кэлэргэ; Эйигин ыҥырдахпына, иһит мин ааттаһар саҥабын.

² Мин көрдөһөрүм Эйиэхэ фимиам буолан тиийиэхтин, икки илиибин өрө уунарым киэһээҥҥи сиэртибэм буолуохтун.

³ Айыы Тойон, манабылла туруор мин айахпар, уоһум аанын харабыллаа.

⁴ Куһаҕаны оҥорооччулардыын куодарыһан аньыылаах дьайыылары сөпсөөбөтүм туһугар, албын-түөкэй дьыалаҕа миигин чугаһатыма, малааһыннарын аһыттан миэхэ амсатыма.

⁵ Кырдьыксыт миигин төһө да дьарыйдын, үтүө санаатыттан төһө да көннөрдүн: ол мин төбөбөр бастыҥ елей арыыта буолуоҕа, онтон мин аккаастаныам суоҕа. Кинилэр хара дьайыылара эрэ тохтуохтун, ол туһугар мин үҥэбин куруутун.

⁶ Баһылыктара очуос-очуос аайы тарҕанан сыталлар, мин тылым-өһүм көнөтүн кинилэр истэллэр.

⁷ Суоруна тааһын сиргэ быраҕан бытарытардыы, биһиги уҥуохпут үтүгэн айаҕар ыһыллар.

⁸ Ол эрэн мин Эйигин көрөбүн, Таҥара, Айыы Тойонум, Эйиэхэ мин эрэнэбин, миигин көмүскэлэ суох хаалларыма.

⁹ Миэхэ оҥорбут угаайыларыттан миигин араҥаччылаа, хара дьайдаахтар туһахтарыттан быыһаа.

¹⁰ Нэгэйдэр бэйэлэрин илимнэригэр иҥниэхтэрэ, оттон мин этэҥҥэ ааһыам.