Саалтыр 139 - Сибэтиэй Биибилийэ кинигэлэрэ

¹ Хуор салайааччытыгар. Давид псалома.

² Өрүһүй миигин, Айыы Тойон, өһөгөйдөөх киһиттэн, көмүскээ күүһүнэн өттөйөөччүттэн;

³ кинилэр хара санааны сүрэхтэригэр биһиктииллэр, күн аайы иирээни иилииллэр.

⁴ Тыллара-өстөрө – эриэн үөн сүлүһүннээх иннэтэ, уостара бүтүннүү – моҕой дьаата. Села

⁵ Харыстаа миигин, Айыы Тойон, хара дьайдаах илиититтэн, көмүскээ күүстэринэн өттөйөөччүлэртэн, охторо сатыыр оҕуруктаах өйдөөхтөртөн.

⁶ Улуутумсуктар миэхэ угаайы оҥорбуттар, туһах, доҕуур ииппиттэр, суол ортотугар сохсо туруорбуттар. Села

⁷ Мин Айыы Тойоҥҥо эттим: «Эн буолаҕын мин Таҥарам; Айыы Тойон, иһит ааттаһар саҥабын».

⁸ Оо, Айыы Тойон, Айыы Тойон, күүстээх Өрүһүйээччим, кыргыһыы күнүгэр Эн харыстаатыҥ мин төбөбүн.

⁹ Айыы Тойон, хара дьайдаахтар баҕаларын толорума; куһаҕан соруктарын ситиһиннэримэ, кинилэр өҥ антах түһүөхтэрэ. Села

¹⁰ Миигин тулалааччылар төбөлөрүн өндөтөн эрэллэр; кырыктаахтык тылласпыттара бэйэлэригэр кэлиэхтин.

¹¹ Умайа сылдьар чох кинилэргэ тоҕуннун, уокка быраҕыллан, аны турбаттыы, ииҥҥэ түстүннэр.

¹² Куһаҕан тыллаах киһи бу сир үрдүгэр тирэҕириэ суоҕа; күүһүнэн өттөйөөччүнү өһөгөйө бэйэтин өлөрүөҕэ.

¹³ Мин билэбин Айыы Тойон күөмчүлэммити көмүскүүрүн, Кини суох-дьадаҥы кырдьыгын өйүүрүн.

¹⁴ Дьиҥ чахчы, кырдьыксыттар Эн ааккын айхаллыахтара, кырдьыктаах дьон Эн аттыгар олоруохтара.