Саалтыр 136 - Сибэтиэй Биибилийэ кинигэлэрэ

¹ Вавилон өрүстэрин үрдүлэригэр олороммут, биһиги, Сиону санааммыт, ытаһарбыт.

² Ол онно иирэ талахтар быыстарыгар арфаларбытын кистии ыйаабыппыт.

³ Онно биһигини билиэн ылбыттар, ыллааҥ дии-дии, ыххайаллара, биһигини күөмчүлээччилэр көрү-нары ирдииллэрэ, «Сион ырыаларыттан иһитиннэриҥ!» – дииллэрэ.

⁴ Хайдах биһиги, туора дойдуга сылдьаммыт, Айыы Тойон ырыатын ыллыахпытый?

⁵ Эйигин умнар күннээх буоллахпына, Иерусалим, уҥа илиим такыччы хатыахтын.

⁶ Эйигин өрүү өйдүү-саныы сылдьыбатахпына, Иерусалим миэхэ үөрүүм өрөгөйө буолбатаҕына, тылым таҥалайбар хам сыстыахтын.

⁷ Санат, Айыы Тойон, Едом уолаттарыгар Иерусалим сууллубут күнүн, хайдах кинилэр ол күн: «Үрэйиҥ! Үрэйиҥ! Төрдүттэн эһиҥ!» – дэспиттэрин.

⁸ Вавилон кыыһа үрэйиэхсит! Дьоллоох да буолуоҕа – эн биһиэхэ оҥорбуккун бэйэҕэр толору төлүүр киһи!

⁹ Дьоллоох да буолуоҕа – эн кыра оҕолоргун тааска үлтү сабыыр киһи!