Саалтыр 106 - Сибэтиэй Биибилийэ кинигэлэрэ

V КИНИГЭТЭ 106–150 псаломнар

¹ Айхаллааҥ Айыы Тойону үтүө санаалааҕын иһин; Кини бигэ таптала – үйэлэр тухары.

² Эттиннэр бу тыллары Айыы Тойон толуйан ылан, эрэйтэн-буруйтан өрүһүйэн,

³ араас дойдуттан, илинтэн-арҕааттан, хотуттан-соҕурууттан муспут дьоно!

⁴ Кинилэр иччитэх кураайы дуол устун, дьонноох куораты булбакка, муна-тэнэ сылдьаллара;

⁵ ааһан-туоран, тамахтара куура хатан, дууһа моруута буолаллара.

⁶ Онтон, сору көрөн, Айыы Тойону ыҥырдахтарына, Кини эрэйтэн-муҥтан быыһаан ылара,

⁷ дьонноох куоракка тиэрдээри, көнө суолунан сирдиирэ.

⁸ Айхаллаатыннар кинилэр Айыы Тойону бигэ тапталын иһин, киһи аймахха оҥорор сөҕүмэр дьайыыларын иһин.

⁹ Кини утаппыттар дууһаларын дуоһутар, аччыктар дууһаларын араас үтүөнэн толорор.

^10-11 Сорохторо, Таҥара тылыгар бас бэриммэккэ, Үрдүктэн Үрдүк сүбэтин ылыммакка, ыас хараҥаҕа, өлүү күлүгэр олороллоро, хандалыга бохсуллан, сору-муҥу көрөллөрө.

¹² Олор сүрэхтэрин Кини ыарахан үлэнэн сыһытара; охтон түстэхтэринэ, ким да кинилэргэ көмөлөспөт этэ.

¹³ Онтон, сору көрөн, Айыы Тойону ыҥырдахтарына, Кини эрэйтэн-муҥтан кинилэри быыһаан ылара,

¹⁴ халыҥ хараҥаттан, өлүү күлүгүттэн таһаарара, хандалыларын хайыта сынньара.

¹⁵ Айхаллаатыннар кинилэр Айыы Тойону бигэ тапталын иһин, киһи аймахха оҥорор сөҕүмэр дьайыыларын иһин.

¹⁶ Кини алтан ааннары алдьатар, тимир олуурдары булгурутар.

¹⁷ Сорохторо, аньыылаах суолунан барбыт өйө суохтара, буруйу-сэмэни оҥорон муҥу-таҥы булуналлара,

¹⁸ онон аһы да сүрэхтэрэ ылбат буолара, өлүү айаҕар түһэллэрэ тирээн кэлэрэ.

¹⁹ Онтон, сору көрөн, Айыы Тойону ыҥырдахтарына, Кини эрэйтэн-муҥтан кинилэри быыһаан ылара,

²⁰ этэр тылынан үтүөрдэрэ, өлөртөн-сүтэртэн өрүһүйэрэ.

²¹ Айхаллаатыннар кинилэр Айыы Тойону бигэ тапталын иһин, киһи аймахха оҥорор сөҕүмэр дьайыыларын иһин.

²² Уруй-айхал сиэртибэтин Киниэхэ биэрдиннэр, үөрүүлээх ырыанан Кини дьайыытын иһитиннэрдиннэр.

²³ Сорохторо, хараабылга олорон, муоранан усталлара, күөх далай иэнигэр эргинэллэрэ.

²⁴ Кинилэр эмиэ Айыы Тойон дьайыыларын анаараллара, муора түгэҕэр кытта Кини оҥорор дьиктилэрин араараллара.

²⁵ Кини эттэҕинэ, сата-буурҕа ытыллара, муора долгуна өрүтэ ыһыллара.

²⁶ Оччоҕо халлааҥҥа тиийэ сыһаллара, аллара, муора түгэҕэр, түһүөхчэ буолаллара; алдьархайга ылларан, эр санааларын ыһыкталлара,

²⁷ итирик дьоннуу, эргичийэ, тэмтээкэйдии сылдьаллара; муоранан устар муударастара аны туһалаабат буолара.

²⁸ Онтон, сору көрөн, Айыы Тойону ыҥырдахтарына, Кини эрэйтэн-муҥтан быыһаан ылара;

²⁹ буурҕаны тохтотон, чуумпуну сатыылатара, муора дохсун долгунун намыратара;

³⁰ байҕал чуумпуран, үөрүү бөҕө буолаллара – баҕалаах тиксиилэрин Кини булларара.

³¹ Айхаллаатыннар кинилэр Айыы Тойону бигэ тапталын иһин, киһи аймахха оҥорор сөҕүмэр дьайыыларын иһин.

³² Уруйдуур буоллуннар Кинини норуот мунньаҕар, айхаллыыр буоллуннар аҕа баһылыктар сүбэлэригэр.

³³ Кини өрүстэри кураайы дуолга кубулутар, үрэхтэри хара буорунан көрдөрөр,

³⁴ олохтоохтор нэгэй быһыыларын иһин, өҥ сири тураҥ буор оҥорор.

³⁵ Кини тукулааны күөлгэ кубулутар, хайа хаппыт сирдэринэн үрүйэлэри сүүрдэр;

³⁶ онно ааспыты-туорбуту олохсутар, оччоҕо кинилэр олорор куораттарын тутталлар;

³⁷ сыһыыга бурдук ыһаллар, виноград олордон, өлгөм үүнүүнү ылаллар.

³⁸ Кини алгыһынан сүүнэ омук буола үүнэллэр; иитэр сүөһүлэрин Кини аймарыппат.

³⁹ Онтон, ахсааннара аҕыйаан, баттанан-үктэнэн, сору-муҥу көрөн кутурҕаҥҥа ыллардахтарына,

⁴⁰ Кини кинээстэрин ааттарын-суолларын алдьатар, суола суох кураайы дуолга хаалларан, кинилэри муннарар;

⁴¹ оттон дьадаҥыны кыһалҕаттан таһаарар, кини дьиэ кэргэнин бараан үөрүнүү үксэтэр.

⁴² Көнө-көрсүө дьон ону көрөн үөрэллэр, оттон хара санаалаахтар саҥата суох бараллар.

⁴³ Ким муударай өйдөөх, ол маны араҥалаан көрдүн, Айыы Тойон бигэ тапталын анаардын.