Саалтыр 103 - Сибэтиэй Биибилийэ кинигэлэрэ

¹ Алҕаа, дууһам миэнэ, Айыы Тойону. Айыы Тойон Таҥарам, Эн сөҕүмэр сүҥкэҥҥин,

² Эн албан ааты, кэрэмэн килбиэни кэппиккин, туналҕан сырдыгы таҥныбыккын; Эн халлааны сарыы суртуу тэниччи тарпыккын,

³ үөһэ баар уораҕайгын уу үрдүнэн туруорбуккун; Эн, былыттары колесница оҥостоҥҥун, тыал кынаттарыгар уйдаран айанныыгын,

⁴ Тыалы-кууһу Эн илдьит гынаҕын, уоту-төлөнү дьөһүөлдьүт оҥостоҕун.

⁵ Эн сири бигэтик туруорбуккун, онон сир үйэлэр тухары тулхадыйыа суоҕа.

⁶ Кинини дириҥ уунан, таҥаһынан курдук, бүрүйбүккүн; бэл хайалар үрдүлэригэр уу турар.

⁷ Сүүр диэҥ эрэ кэрэх, уу сүүрбүтүнэн барар, Эн сүллэр этиҥиҥ этэриттэн киэр куотар.

⁸ Хайаҕа өрө сүүрэн тахсар, хочоҕо холдьугураан түһэр, Эн анаабыт сиргэр тиийэр.

⁹ Киниэхэ туораабат чэрчитин быһаҥҥын, хат төннөн кэлэн сири саба халыйар кыаҕа суох.

¹⁰ Эн үрүйэлэри хочолорго сүүрдэҥҥин, томтордор быыстарынан кылыгырыы усталлар,

¹¹ хонуу кыылын-сүөлүн барытын уулаталлар; дьиикэй оселлар эмиэ онтон утахтарын ханнараллар;

¹² үрүйэлэр аттыларыгар көтөрдөр уйаланаллар, сэбирдэх быыһа барыта – чыычаах күйгүөрэ.

¹³ Эн үөһээҥҥи уораҕайгыттан хайаларга ардаҕы кутаҕын; сир Эн үлэҥ түмүгүнэн дуоһуйар.

¹⁴ Сүөһү сииригэр Эн оту үүннэрэҕин, оттон киһи туһаланарыгар – үүнээйини, онон аһылыгы сир таһаарар:

¹⁵ киһи сүрэҕин үөрдэр арыгыны, кини сирэйин сырдатар арыыны, киниэхэ күүс-сэниэ киллэрэр килиэби.

¹⁶ Айыы Тойон мастара, Ливаҥҥа олордубут сыалаах мастара, ардах уутун дуоһуйа иһэллэр.

¹⁷ Кинилэргэ чыычаахтар уйаланаллар; харыйаларга эһирдэр дьиэлэнэллэр.

¹⁸ Үрдүк хайаларга дьиикэй козеллар олороллор; таас очуостарга дамааннар хорҕойоллор.

¹⁹ Эн, дьыл кэмин араарарга анаан, ыйы айбытыҥ; күн хаһан арҕаалыырын билэр.

²⁰ Эн хараҥаны тэнитэ тартаххына, түүн буолар, ойуур харамайа барыта дьаарбайа тахсар.

²¹ Эдэр хахайдар булду сонордоон ырдьыгынаһаллар, аһыыр астарын Таҥараттан көрдөһөллөр.

²² Күн күөрэйиитэ кинилэр эргийэн кэлэллэр, ордууларыгар киирэн сыталлар.

²³ Киһи үлэтигэр-хамнаһыгар тахсар, киэһэриэр диэри кини үлэтигэр сылдьар.

²⁴ Элбэҕи да Эн оҥорбуккун, Айыы Тойон! Барытын муударайдык айбыккын; сир үрдэ барыта – Эн айымньыҥ.

²⁵ Ол уҥуора-маҥаара биллибэт улуу муора алаарыйар, онно аата-ахса биллибэт харамай, улахан да, кыра да, кыынньа оргуйар.

²⁶ Онно хараабыллар усталлар, онно, муораҕа оонньоотун диэн, Эн айбыт левиафаныҥ көччүйэр.

²⁷ Аһыыр аспытын кэмигэр биэриэ диэн, кинилэр бука бары Эйигин кэтэһэллэр.

²⁸ Биэрдэххинэ – ылаллар, ытыскын астаххына – үтүө бэлэххинэн дуоһуйаллар;

²⁹ киэр хайыстаххына – айманаллар, тыыннарын ыллаххына – өлөллөр, буордарыгар төннөллөр.

³⁰ Оттон Тыыҥҥын ыыттаххына – айыллаллар; ол курдук Эн сир ньуурун саҥардан биэрэҕин.

³¹ Албан аат буоллун Айыы Тойоҥҥо үйэттэн үйэлэр тухары! Үөрүөхтүн Айыы Тойон Бэйэтин дьайыыларыттан!

³² Кини сири көрдөҕүнэ, сир титирэстиир, Кини хайаны таарыйдаҕына, хайа буруолуур.

³³ Айыы Тойоҥҥо мин ыллыам тыыннааҕым тухары, Таҥарабар айхал ыллыам баарым тухары.

³⁴ Мин ырыам Киниэхэ сүрэҕин ортотунан киириэхтин; Айыы Тойонтон мин үөрүөҕүм-көтүөҕүм.

³⁵ Сир үрдүттэн сүттүннэр тосту-туора быһыылаахтар, суох буоллуннар аны хара дьайдаахтар. Алҕаа, дууһам миэнэ, Айыы Тойону. Аллилуия.