Иона 4 - Сибэтиэй Биибилийэ кинигэлэрэ

Иона хомолтото уонна Таҥара амарах быһыыта

¹ Иона итинтэн улаханнык хомойон, абаран-сатаран,

² АЙЫЫ ТОЙОҤҤО маннык үҥпүтэ: «Оо, АЙЫЫ ТОЙОН, мин итини өссө дойдубар сылдьан этэн турабын эбээт! Ол иһин мин били эрдэ-сылла Тарсиска күрүүрдүү санаммытым. Эн алдьархайы үөрүүнэн тохтотор үтүө майгылаах, амарах санаалаах, улуу тулуурдаах, аһыныгас Таҥара буоларгын билэр этим.

³ Онон билигин, АЙЫЫ ТОЙОН, дууһабын ыл: бу кэриэтин мин өлбүтүм ордук».

⁴ Онуоха АЙЫЫ ТОЙОН киниттэн: «Хайа бу эн туох да олус абардыҥ дуу?» – диэн ыйыппыта.

⁵ Иона Ниневияттан тахсан барбыта уонна илин туһаайыынан отуу оҥостон баран, куоракка салгыы туох буоларын кэтэһэн, отуутун күлүгэр олорбута.

⁶ Оннук олордоҕуна, АЙЫЫ ТОЙОН Таҥара киниэхэ хойуу кэтит сэбирдэхтээх үүнээйини ыыппыта. Ол үүнээйи сиртэн дьылыгырыы үүнэн тахсан, Иона саппаҕырбыт санаатын сайҕыырдыы, кинини хаххалыы турбута. Иона үүнээйини көрөн бэркэ диэн үөрбүтэ.

⁷ Сарсыныгар күн тахсыыта Таҥара аны чиэрбэни ыыппыта: чиэрбэ быһа кэрбээн, били үүнээйи иинэн-хатан хаалбыта.

⁸ Онтон күн үөһэ ойуута Таҥара илинтэн күүстээх кураан тыалын түһэрбитэ. Күн уота Иона төбөтүн сырайбытынан барбыта. Иона бырда быстан, эрэйи көрөн: «Маннык олоруом кэриэтин өлбүтүм ордук!» – диэн өлүөн эрэ баҕарар буолбута.

⁹ Дьэ онно Таҥара киниттэн иккиһин: «Хайа бу эн үүнээйи туһуттан туох да олус абардыҥ дуу?» – диэн ыйыппыта. «Наһаа абардым! – диэбитэ Иона. – Хомойон өлө сыстым!»

¹⁰ Онуоха АЙЫЫ ТОЙОН киниэхэ эппитэ: «Эн бэл бэйэҥ көрөн-истэн, улаатыннаран эрэйдэммэтэх үүнээйигин, биир түүн иһигэр үүнэн баран хатан хаалбыт от сыыһын, аһыйаҕын.

¹¹ Оттон ити уҥа-хаҥас илиитин кыайан араарбат сүүс сүүрбэ тыһыынча киһилээх, баһаам сүөһүлээх-тойдоох Ниневия курдук улахан куораты Мин хайдах харыһыйыам суоҕай?»