Иона 2 - Сибэтиэй Биибилийэ кинигэлэрэ

Иона балык иһиттэн Таҥараҕа үҥэр

¹ Онтон АЙЫЫ ТОЙОН ыыппыт аарыма балыга тиийэн кэлэн, Ионаны ыйыстан кэбиспитэ. Иона ол иһигэр үс түүннээх күн буолан баран,

² балык иһиттэн АЙЫЫ ТОЙОН Таҥаратыгар үҥпүтэ:

³ «АЙЫЫ ТОЙОН! Алдьархайга ылларан Эйигин ыҥырбыппар Эн миэхэ хардардыҥ, Анараа дойду түгэҕиттэн үөгүлээбиппэр иһиттиҥ!

⁴ Эн миигин дириҥ далайга, байҕал түгэҕэр түһэрбитиҥ, онно миигин бурулҕан эрийэн ылбыта, Эн бары баалыҥ, модун долгунуҥ барыта мин үрдүбүнэн ытыллан ааспыта.

⁵ Онон миигин аны көрбөттүү киэр үүрдэ дии санаабытым. Суох! Мин өссө даҕаны Эн сибэтиэй Дьиэҕин көрүөҕүм!

⁶ Халыан уу тыыммын хаайбыта, түгэҕэ биллибэт чүөмпэ миигин мэҥиэстибитэ, төбөбөр муора салахайа иилистибитэ.

⁷ Мин хайалар төрдүлэригэр түспүтүм; сир халҕана мин үрдүбүнэн букатыннаахтык хам хатаммыта! Ол эрэн, АЙЫЫ ТОЙОН Таҥарам, Эн миигин үөдэн түгэҕиттэн таһаардыҥ!

⁸ Сырам-сылбам баранан, муҥур уһукка түһэн, мин Эйигин, АЙЫЫ ТОЙОНУ, өйдөөн кэлбитим, мин үҥэр үҥүүм Эйиэхэ, Эн сибэтиэй Дьиэҕэр, тиийбитэ.

⁹ Туох да туһата суох эмэгэттэргэ сүгүрүйээччилэр Эйигин таҥнараллар.

¹⁰ Оттон мин махтал тылларын этэммин Эйиэхэ сиэртибэ биэриэҕим, эрэннэрбит тылбын толоруоҕум. Быыһабыл АЙЫЫ ТОЙОНТОН тосхойор!»

¹¹ АЙЫЫ ТОЙОН дьаһайбытыгар аарыма балык Ионаны сиргэ өҕүйэн кэбиспитэ.