Иона 1 - Сибэтиэй Биибилийэ кинигэлэрэ

Иона АЙЫЫ ТОЙОНТОН куотар

¹ Биир күн Иона, Амиттай уола, АЙЫЫ ТОЙОН кинини ыҥырар саҥатын истибитэ.

² «Айаҥҥа тур! – диэбитэ ол саҥа. – Улахан куоракка Ниневияҕа баран, олохтоохтор аньыыларын-хараларын саралаа, Мин кинилэр хара дьайыыларын көрбүппүн иһитиннэр».

³ Иона айаҥҥа турбута эрээри, АЙЫЫ ТОЙОНТОН Тарсиска куотарга сананан Яффаҕа түспүтэ; онно Тарсистаары турар хараабылы булан, суолун төлөөн, АЙЫЫ ТОЙОНТОН Тарсиска тэскилиирдии, хараабылга киирсэн олорунан кэбиспитэ.

⁴ Ол эрэн АЙЫЫ ТОЙОН муораҕа улахан тыалы түһэрбитэ: суостаах буурҕа өрө ытыллан, айаннаан иһэр хараабыллара хайа барыах курдук буолбута.

⁵ Муораһыттар бары уолуйа куттанан, хас биирдиилэрэ үҥэр-сүктэр таҥараларын ыҥырбыттара, өлөртөн быыһааҥ диэн ааттаһан-көрдөһөн барбыттара. Онтон муҥур уһукка киирэн, хараабылларын чэпчэтээри, тиэйэн иһэр таһаҕастарын ууга тамнаабыттара. Иона буоллаҕына ити кэмҥэ хараабыл түгэҕэр киирэн сүр кытаанахтык утуйа сыппыта.

⁶ Ол сыттаҕына киниэхэ муораһыттар тойонноро тиийэн кэлэн: «Бу эн туох буолан утуйа сытар киһигиний? – диэн көбүөлээбитэ. – Тур, Таҥараҕыттан көрдөс! Баҕар, Кини биһигини санаан, биһиги тыыннаах ордуохпут!»

⁷ Муораһыттар ити кэмҥэ: «Чэйиҥ, түөрэх кэбиһэн, бу ким туһуттан манннык быһылааҥҥа түбэспиппитин билиэххэ!» – дэһиспиттэрэ. Түөрэх кэбиспиттэрэ, арай, түөрэхтэрэ Ионаҕа түспүтэ.

⁸ Ол иһин кинилэр Ионаттан: «Эт эрэ биһиэхэ, бу ким туһуттан биһиги маннык алдьархайга ыллардыбыт? – диэн ыйыппыттара. – Эн туох дьарыктаах киһигиний? Хантан айаннаан иһэҕин? Дойдуҥ ханнаный? Туох омуккунуй?»

⁹ «Мин дьэбириэйбин, – диэн хоруйдаабыта Иона, – АЙЫЫ ТОЙОҤҤО, байҕалы уонна сири айбыт халлааннааҕы Таҥараҕа, сүгүрүйэбин».

¹⁰ Кини АЙЫЫ ТОЙОНТОН күрэнэн иһэрин кэпсээбитигэр муораһыттар өссө ордук куттанан: «Оо, дьэ хайаан итинник быһыыламмытыҥ эбитэ буолла? – дэспиттэрэ. –

¹¹ Биһиги бу эйигин хайдах гынан муораны уоскутабыт? Буурҕабыт улам күүһүрэн иһэр дии!»

¹² Онуоха Иона эппитэ: «Миигин ууга ылан быраҕыҥ, оччоҕо муора уоскуйуо. Бу үлүгэрдээх буурҕаҕа эһиги мин туспуттан түбэспиккитин билэбин».

¹³ Ол үрдүнэн муораһыттар харса суох кытыл диэки эрдэ сатаабыттара да, сири кыайан булбатахтара: силлиэ эбии сэтэрэн иһэрэ.

¹⁴ Дьэ онно кинилэр АЙЫЫ ТОЙОНУ ыҥыран ааттаспыттара: «АЙЫЫ ТОЙОН, Эн бука диэн биһигини бу киһи өлүүтүгэр буруйдаама! Ыраас киһи хаанын тохтугут диэн, биһигиттэн ирдээмэ! Эн АЙЫЫ ТОЙОҤҤУН эбээт, Бэйэлээх Бэйэҥ оҥорууҥ итинник эбит!»

¹⁵ Ионаны ууга ылан быраҕааттарын кытта, муора сонно уоскуйан хаалбыта.

¹⁶ Дьон АЙЫЫ ТОЙОНТОН улаханнык дьулайан, Киниэхэ сиэртибэ биэрэн туран андаҕар тылларын эппиттэрэ.