Иоанн 1 - Сибэтиэй Биибилийэ кинигэлэрэ

Тыл Киһи буолан кэлбитэ

¹ Аан бастаан Тыл баара, Тыл Таҥараҕа баара, Тыл Таҥара этэ.

² Кини аан бастааҥҥыттан Таҥараҕа этэ.

³ Туох барыта Киниттэн саҕаламмыта, Кинитэ суох туох да саҕаламматаҕа.

⁴ Кини олох төрдө этэ, оттон олох киһи аймах сырдыга этэ.

⁵ Сырдык хараҥаҕа да сырдатар, хараҥа сырдыгы кыайар кыаҕа суох.

⁶ Таҥара ыыппыт киһитэ кэлбитэ, аата Иоанн диэн этэ.

⁷ Бары киниттэн истэн итэҕэйэллэрин туһугар, кини дьоҥҥо сырдык туһунан кэрэһиттии кэлбитэ.

⁸ Кини бэйэтэ сырдык буолбатах этэ, сырдык туһунан кэрэһиттии кэлбитэ.

⁹ Бу аан дойдуга кэлэр хас биирдии киһини сырдатар дьиҥнээх сырдык баара.

¹⁰ Сырдык бу дойдуга баара, бу дойду Киниттэн саҕаламмыта, арай бу дойду дьоно Кинини билбэтэхтэрэ;

¹¹ Бэйэтин дойдутугар кэлбитэ эрээри, Бэйэтин дьоно ылымматахтара;

¹² оттон ылыммыттарга, Кинини итэҕэйээччилэргэ, Кини Таҥара оҕолоро буолар быраабы биэрбитэ.

¹³ Кинилэр хаантан, эттэн-сиинтэн, эр киһи баҕатыттан буолбакка, Таҥараттан төрөөбүттэрэ.

¹⁴ Тыл Киһи буолан Киниэхэ толору баар илгэлээх үтүөнэн, кырдьыгынан сыдьаайан, биһигини кытта олорбута, онон биһиги Кини кэрэмэн килбиэнин, Аҕа Төрөппүт соҕотох Уолун килбиэнин, көрбүппүт.

¹⁵ Иоанн Кинини кэрэһиттээн этэрэ: «„Кэннибиттэн Кэлэн Иһээччи иннибэр буолла, тоҕо диэтэххэ, мин иннибиттэн баара“ диэн, мин бу Кини туһунан эппитим!»

¹⁶ Киниэхэ толору баар илгэлээх үтүө баайтан биһиги бары бииртэн биир алгыһы ылбыппыт.

¹⁷ Сокуону Таҥара Моисейынан бэрдэрбитэ, оттон тапталы уонна кырдьыгы Иисус Христос аҕалбыта.

¹⁸ Таҥараны ким да хаһан да көрбөтөҕө, арай Аҕатыгар баар Кини Төрөппүт соҕотох Уола биһиэхэ Таҥараны көрдөрбүтэ.

Иоанн Сүрэхтээччи кэрэһиттээһинэ

¹⁹ Иоанн маннык кэрэһиттээбитэ. Иудей тойотторо Иерусалимтан Иоаҥҥа аҕабыыттары кытта левиттэри ыытан: «Эн кимҥиний?» – диэн ыйыттарбыттара.

²⁰ Иоанн куотуна барбатаҕа, аккаастаммакка аһаҕастык эппитэ: «Мин Христос буолбатахпын».

²¹ «Оччоҕо кимҥиний, – диэбиттэрэ. – Илияҕын дуо?» «Суох», – диэбитэ кини. «Пророккун дуо?» «Суох», – диэн хоруйдаабыта.

²² «Оччоҕо кимҥин эт, – диэбиттэрэ. – Биһигини ыыппыт дьоҥҥо тиэрдиэхпитин бэйэҥ тускунан тугу этэҕин?»

²³ Иоанн эппитэ: «Исайя пророк эппитин курдук, мин „Айыы Тойоҥҥо көнө суолла солооҥ“ диэн кураайы куйаарга үөгүлээччи саҥатынабын».

²⁴ Онуоха фарисейдар ыыппыт дьонноро ыйыппыттара:

²⁵ «Эн Христос да, Илия да, Пророк да буолбатах буоллаххына, тоҕо сүрэхтиигин?»

²⁶ «Мин ууга сүрэхтиибин, – диэбитэ Иоанн. – Оттон эһигини кытта Ким турарын эһиги билбэккит:

²⁷ Кини кэннибиттэн иһэрэ да, билигин иннибэр буолла. Мин Кини атаҕын таҥаһын да быатын сүөрэргэ сөбө суохпун».

²⁸ Бу Иоанн сүрэхтиир сиригэр, Иордан аттыгар Вифаварга, буолбута.

Аан дойду аньыытын Бэйэтигэр ылынар Бараан Оҕото

²⁹ Сарсыныгар Иоанн киниэхэ кэлэн иһэр Иисуһу көрөн эппитэ: «Аан дойду аньыытын-харатын Бэйэтигэр ылынар Таҥара Бараанын Оҕото бу иһэр.

³⁰ „Кэннибиттэн Кэлэн Иһээччи иннибэр буолла, тоҕо диэтэххэ, мин иннибиттэн баара“ диэн бу Кини туһунан эппитим.

³¹ Мин Кинини билбэт этим гынан баран, Кини Израильга биллэрин туһугар ууга сүрэхтии кэлбитим».

³² Онтон Иоанн маннык туоһулаабыта: «Тыын холууп курдук халлаантан Киниэхэ түһэрин көрбүтүм.

³³ Мин Кинини урут билбэт этим, ол гынан баран ууга сүрэхтэтэ миигин Ыытааччы миэхэ Тыын үөһэттэн түһэн Кимиэхэ тохтуур да, Ол – Сибэтиэй Тыынынан Сүрэхтээччи буолар диэбитэ.

³⁴ Мин ону көрбүт буолан, Таҥара Уола бу Кини диэн туоһулуубун!»

Маҥнайгы үөрэнээччилэр

³⁵ Сарсыныгар Иоанн икки үөрэнээччитин кытта эмиэ ол сиригэр турбута.

³⁶ Кини Иисус кэлэн иһэрин көрөөт: «Таҥара Бараанын Оҕото бу иһэр!» – диэн саҥа аллайбыта.

³⁷ Маны истэн, үөрэнээччилэрэ иккиэн Иисуһу батыһан барбыттара.

³⁸ Иисус кэннин хайыһан көрөн: «Эһиги тугу көрдүүгүт?» – диэн ыйыппыта. «Равви (ол аата «Үөрэтээччи»), Эн ханна олороҕунуй?» – диэн кинилэр хардары ыйыппыттара.

³⁹ «Барсыҥ, оччоҕо көрүөххүт», – диэбитэ Иисус. Бу уон чаас саҕана этэ. Үөрэнээччилэр барсан, Иисус ханна олорорун көрбүттэрэ, итиэннэ киэһэриэр диэри, Киниэхэ олорбуттара.

⁴⁰ Иоантан истэн Иисуһу батыспыт икки киһиттэн биирдэстэрэ Симон Петр быраата Андрей этэ.

⁴¹ Андрей убайын Симоны бастакынан булан ылан эппитэ: «Биһиги Мессияны (ол аата Христоһу) буллубут».

⁴² Итиэннэ кинини Иисуска илдьэ кэлбитэ. Симон диэки көрөн баран Иисус: «Эн Иона уола Симоҥҥын, – диэбитэ. – Аны мантан инньэ Кифа диэн ааттаныаҥ». (Ол аата Петр, «таас» диэн суолталаах аат.)

Филиптээх Нафанаилы ыҥырыы

⁴³ Нөҥүө күнүгэр Иисус Галилеяҕа барардыы быһаарынан, Филиби булан: «Миигин батыс», – диэбитэ. (

⁴⁴ Филипп Вифсаидаттан, Андрейдаах Петр куораттарыттан, төрүттээҕэ.)

⁴⁵ Филипп Нафанаилы булан этэр: «Биһиги Моисей Сокуонугар уонна Пророктарга Суруллубуту – Назареттан төрүттээх Иосиф уолун Иисуһу – буллубут».

⁴⁶ «Ол Назареттан туох эмэ үтүө тахсыан сөп үһү дуо?» – Нафанаил саарбахтыыр. «Бараҥҥын көр», – диэн хоруйдуур Филипп.

⁴⁷ Иисус Киниэхэ кэлэн иһэр Нафанаилы көрөн этэр: «Бу туох да албына-көлдьүнэ суох дьиҥ чахчы Израиль киһитэ».

⁴⁸ «Эн миигин хантан билэҕиний?» – Нафанаил дьиктиргиир. «Мин эйигин, Филипп өссө ыҥыра илигинэ, смоковница анныгар көрбүтүм», – диэн хоруйдуур Иисус.

⁴⁹ «Равви! – Нафанаил саҥа аллайа түһэр. – Эн Таҥара Уолунаҕын, Израиль Ыраахтааҕытынаҕын!»

⁵⁰ «Эйигин смоковница анныгар көрбүтүм диэбитим иһин, Миигин итэҕэйэҕин; аны маннааҕар өссө улаханы көрүөҕүҥ, – диир Иисус

⁵¹ уонна салгыы этэр: – Дьиҥ кырдьыгы эһиэхэ этэбин: мантан инньэ эһиги халлаан арылларын уонна Таҥара Аанньаллара Киһи Уолугар кэлэллэрин-баралларын көрүөххүт».