Эсфирь 8 - Сибэтиэй Биибилийэ кинигэлэрэ

Эсфирь иудейдары быыһыыр

¹ Ол күн Ахашверош ыраахтааҕы иудейдар өстөөхтөрүн Аман баайын-дуолун барытын Эсфирь сарыыссаҕа биэрбитэ. Онтон Мардохей, Эсфирь кини туһунан убайым диэн кэпсээбит буолан, ыраахтааҕы иннигэр кэлэн турбута.

² Ыраахтааҕы Амантан төттөрү ылбыт бэчээттээх биһилэҕин устан Мардохейга биэрбитэ. Эсфирь буоллаҕына Мардохейы Аман бас билэр сирин-уотун салайааччытынан анаабыта.

³ Сотору Эсфирь ыраахтааҕыга хат кэлэн, ытыы-ытыы кини атаҕар умса нөрүйбүтэ уонна Агаг удьуора Аман хара санаата, иудейдары утары туруоруммут соруга туоларын туорайдас диэн көрдөспүтэ-ааттаспыта.

⁴ Ыраахтааҕы Эсфирьгэ кыһыл көмүс торуоскатын ууммутугар Эсфирь туран, кини иннигэр кэлэн,

⁵ эппитэ: «Өскөтүн ыраахтааҕы сөптөөх диэтэҕинэ, итиэннэ миэхэ үтүөтүк сыһыаннаһан, бу дьыаланы көрүү сиэрдээх суол диир, миигин ылынар буоллаҕына, Агаг удьуорун Амадаф уола Аман ыраахтааҕы бас билэр сиригэр барытыгар иудейдары эһээри тобулан таһаарбыт ыйааҕын көтүртэрэр дьаһал сурук сурулуннун.

⁶ Норуоппар итинник аан алдьархай ааҥнаан эрэрин мин хайдах холкутук көрөн олоруомуй? Аҕа ууһум эстэрин хайдах тулуйан көрөр кыахтаныамый?»

⁷ Ахашверош ыраахтааҕы Эсфирь сарыыссаҕа уонна Мардохей иудейга эппитэ: «Мин Аман баайын-дуолун барытын Эсфирьгэ биэрбитим, оттон Аманы бэйэтин, иудейдары эһиэн баҕарбытын иһин, мас остуолбаҕа ыйаабыттара.

⁸ Билигин эһиги иудейдар тустарынан биир тыын суолталаах диэбит ыйааххытын мин ааппыттан суруйан баран, онно мин бэчээппин туруоруҥ. Ыраахтааҕы аатыттан суруллан кини бэчээтинэн бигэргэтиллибит ыйаах көтүллүбэт».

⁹ Онон үһүс ый, ол эбэтэр сиван ый, сүүрбэ үһүс күнүгэр ыраахтааҕы суруксуттара ыҥырыллан, Мардохей чопчу ыйбытынан, Индияттан Эфиопияҕа диэри тайаан сытар сүүс сүүрбэ сэттэ уобалас бары иудейдарыгар, баһылыктарыгар, тойотторугар уонна салайааччыларыгар анаан саҥа ыйааҕы суруйбуттара. Ол дьаһал хас биирдии уобалас олохтоохторун суругунан-бичигинэн, хас биирдии норуот тылынан, оттон иудейдарга кинилэр бэйэлэрин суруктарынан, тылларынан-өстөрүнэн суруллубута.

¹⁰ Ахашверош аатыттан суруллан кини бэчээттээх биһилэҕинэн бигэргэтиллибит ыйааҕы ыраахтааҕы көньүүһүнэтин бастыҥ сүүрүк аттарын мииммит илдьиттэр тарҕаппыттара.

¹¹ Ыраахтааҕы ыйааҕынан куорат-куорат аайы иудейдар мустан тыыннарын көмүскэнэллэрэ – хас норуот, хас уобалас ахсын иудейдарга саба түһэр сэбилэниилээх күүстэри, кинилэр ойохторун, оҕолорун имири эһэллэрэ, өлөрөллөрө-өһөрөллөрө, суох оҥороллоро уонна өстөөхтөрүн баайдарын-дуолларын былдьаан ылаллара көҥүллэммитэ.

¹² Иудейдар Ахашверош ыраахтааҕы бас билэр сиригэр барытыгар итинник көмүскэнэр болдьохтоох күннэрэ – уон иккис ый, ол аата адар ый, уон үһүс күнэ этэ.

¹³ Иудейдар ити күн өстөөхтөрүттэн иэстэһэргэ бэлэм буолалларын туһугар, сокуон күүһүн ылбыт суругу устан ылан хас уобалас ахсын бары норуоттарга иһитиннэриэх тустаахтара.

¹⁴ Илдьиттэр ыраахтааҕы көньүүһүнэтигэр турбут сүүрүк аттары миинэн, сонно тута ыраахтааҕы сорудаҕын толоро ыстаннарбыттара; ыйаах Сузы бөҕөргөтүнүүлээх куоратыгар доргуччу иһитиннэриллибитэ.

¹⁵ Мардохей дыбарыастан ыраахтааҕы көҕөрүмтүйэн көстөр хараҥа кыһыл уонна маҥан өҥнөөх мааны таҥаһын-сабын таҥнан, төбөтүгэр улахан кыһыл көмүс мэнньиэһи кэтэн, күндү маҥан лүөн уонна кыһыл түү сабынан өрүллүбүт сонноох тахсыбыта. Онон Сузы куоракка үөрүү-көтүү, өрөгөй бөҕө өрө оргуйа түспүтэ.

¹⁶ Иудейдарга сырдык чаҕылыччы тыган, дьол-үөрүү тосхойон, көрдөөх-нардаах дьоро кэм үүммүтэ.

¹⁷ Ыраахтааҕы дьаһала, кини ыйааҕа тиийбит хас уобалаһын, хас куоратын ахсын, иудейдар үөрэн-көтөн, өрөйөн-чөрөйөн, малааһын тэрийэллэрэ, бырааһынньык оҥороллоро. Бу дойду норуоттарын үгүс дьоно эмиэ, кинилэртэн куттанан, бэйэлэрин аны иудейдарбыт дэнэр буолбуттара.