Эсфирь 1 - Сибэтиэй Биибилийэ кинигэлэрэ

Ыраахтааҕы улуу малааһына

¹ Бу түбэлтэ Ахашверош ыраахтааҕы – били Индияттан Эфиопияҕа тиийэ сүүс сүүрбэ сэттэ уобалаһы салайбыт Ахашверош – кэмигэр буолбута.

² Ол саҕана саарыстыбатын бүрүстүөлүгэр Сузы бөҕөргөтүнүүлээх куоратыгар олорор Ахашверош ыраахтааҕы

³ салайбытын үһүс сылыгар бары үрдүк сололоохторугар, чугас үлэһиттэригэр анаан малааһын тэрийбитэ. Персия, Мидия сэриитин тойотторо, дьон-сэргэ үрдүкү араҥата уонна уобалас салайааччылара тиийэн кэлбиттэригэр

⁴ ыраахтааҕы кинилэргэ килбиэннээх саарыстыбатын баайын-дуолун, сүдү бэйэтин килэйбит-халайбыт мааны-далбар олоҕун сүүс аҕыс уон күнү быһа көрдөрбүтэ.

⁵ Онтон ити күннэр ааспыттарын кэннэ, ыраахтааҕы аны Сузы бөҕөргөтүнүүлээх куоратыгар баар норуокка бүттүүнүгэр, баайга-дьадаҥыга барытыгар, дыбарыаһын саадыгар сэттэ күннээх малааһыны тэрийбитэ.

⁶ Онно үрүҥ көмүс туорайдаах мыраамар остуолбаларга тардыллыбыт көҕөрүмтүйэн көстөр хараҥа кыһыл быаҕа күндү лүөн таҥаһы, халлаан күөҕэ чараас түү быыстары ыйаабыттара; өттүгэстээн сытан аһыыр намыһах кэтит олбохторо кыһыл уонна үрүҥ көмүс этилэр, оттон муосталара хараҥа кыһыл өҥнөөх хайа тааһа, мыраамар, чөмчүүк уонна да атын араас өҥнөөх күндү таас этэ.

⁷ Иһэр утахтарын эҥин-эгэлгэ бэйэлээх кыһыл көмүс иһиттэргэ кутан биэрэллэрэ; ыраахтааҕы дэлэйдик күндүлүүр буолан, иһэрдэр арыгыта үрүйэлии устубута.

⁸ Арыгыны ыалдьыттарга ханнык да хааччаҕа суох иһэрдэр туһунан дьаһал бэриллибитэ; ыраахтааҕы дыбарыас олоҕун-дьаһаҕын салайтарар үлэһиттэригэр барыларыгар итинник соруйбут буолан, кэлбит дьон арыгыны төһө баҕарар иһиэхтэрин сөбө.

⁹ Астинь сарыысса эмиэ Ахашверош ыраахтааҕы дыбарыаһыгар дьахталларга анаан туспа малааһын тэрийбитэ.

Астинь сарыысса үүрүллэр

¹⁰ Малааһын сэттис күнүгэр арыгыттан санаата көнньүөрбүт ыраахтааҕы киниэхэ үлэлиир Мегуман, Бизфа, Харбона, Бигфа, Авагфа, Зефар уонна Каркас диэн ааттаах сэттэ аттакыны ыҥыран ылан,

¹¹ хоруоналаах Астинь сарыыссаны киниэхэ аҕалалларыгар соруйбута. Сарыысса олус кыраһыабай этэ, ол иһин ыраахтааҕы баар дьоҥҥо уонна үрдүк сололоохторугар кини кэрэ дьүһүнүн көрдөрүөн баҕарбыта.

¹² Ол эрээри Астинь сарыысса, аттакылар ыраахтааҕы дьаһалын тиэрдибиттэригэр, онно барартан кыккыраччы аккаастанан кэбиспитэ. Ыраахтааҕы онтон улаханнык кыыһыран, уора-кылына оргуйан,

¹³ туһааннаах кэмҥэ сөптөөх быһаарыыны сатаан ылынар кыахтаах мындыр өйдөөх дьонун ыҥыран ылбыта (кини сокуону уонна быраабы билэр дьоннуун өрүү сүбэлэһэр үгэстээҕэ.

¹⁴ Ити кэмҥэ киниэхэ Персия, Мидия үрдүк сололоох сэттэ киһитэ – Каршена, Шефар, Адмафа, Фарсис, Мерес, Марсена уонна Мемухан – ордук чугастара, онон кинилэр ыраахтааҕыга киирэр бырааптаах, кини аттыгар олорор кыахтаах, саарыстыба тумус туттар тутаах дьоно этилэр).

¹⁵ Ыраахтааҕы кинилэртэн: «Ахашверош ыраахтааҕы аттакыларынан илдьиттээбитин ылымматах Астинь сарыыссаны сокуон хараҕынан хайдах дьүүллүөххэ сөбүй?» – диэн ыйыппыта.

¹⁶ Онуоха Мемухан ыраахтааҕыга уонна үрдүк сололоохторго эппитэ: «Астинь сарыысса ыраахтааҕы иннигэр эрэ буолбакка, Ахашверош ыраахтааҕы бас билэр бары уобаластарын үрдүк сололоохторун, туох баар норуоттарын барыларын иннилэригэр эмиэ буруйдаах.

¹⁷ Дьахталлар бука бары, сарыысса ити быһыытын билэн, эрдэрин ытыктаабат буолуохтара, «Астинь сарыысса бэл Ахашверош ыраахтааҕы ыҥыртарбытыгар барбатаҕа» дэһиэхтэрэ.

¹⁸ Персия, Мидия биллэр-көстөр дьахталлара сарыысса ити быһыытын истибиттэр, онон ити туһунан күн бүгүн ыраахтааҕы үрдүк сололоохторугар кэпсээн биэриэхтэрэ турдаҕа, дьэ оччоҕо саат-суут, иирээн тимэҕэ төлө тардыллыаҕа.

¹⁹ Ыраахтааҕы маны сөп диир буоллаҕына, кини көтүллүбэт ыйааҕа тахсан, Персия, Мидия сокуоннарыгар суруллуох тустаах: Астинь аны Ахашверош ыраахтааҕы хараҕар көстүө суохтаах. Онон ыраахтааҕы кинитээҕэр ордук, атын дьахтары сарыысса оҥордун.

²⁰ Ыраахтааҕы таһаарбыт ыйааҕын бүтүн киэҥ саарыстыба устун иһитиннэрдэхтэринэ, дьахталлар дьадаҥытыттан баайыгар тиийэ бука бары эрдэрин ытыктыыр буолуохтара».

²¹ Бу этиини ыраахтааҕы да, кини үрдүк сололоохторо да биһирии истибиттэрэ. Онон ыраахтааҕы, Мемухан сүбэтин ылынан,

²² илдьитин бас билэр сиригэр барытыгар, хас биирдии уобалас олохтоохторун суругунан-бичигинэн, хас биирдии норуот төрөөбүт тылынан суруйтаран ыыппыта. Онон бары омук тылынан барытынан: «Эр киһи дьиэтигэр-уотугар тойон буолуохтаах», – диэн иһитиннэрбиттэрэ.